Obadaea 1 - Baebol Long Bislama

Fastok

¹ Ol tok we i stap long buk ya, Hae God we i Masta* blong yumi i givim long Profet Obadaea, blong tokbaot ol man Edom. Nao Profet Obadaea i talem se, “Hae God i sanem wan man blong karem tok blong hem i go long olgeta kantri, mo mifala ol profet i harem tok ya blong hem. Hem i talem long olgeta se, ‘Naoia yufala i mas mekemrere blong yumi go faet long ol man Edom.’ ”

Hae God bambae i panisim ol man Edom

² Mo Profet Obadaea i gohed i talemaot we Hae God i talem se, “Ol man Edom. Mi bambae mi mekem we paoa blong yufala i finis. Olgeta man bambae oli lukluk rabis long yufala.

³ Yufala i praod tumas. Taon we i kaptel blong yufala, yufala i wokem long wan bigfala ston antap long bigfala hil, mo ol haos blong yufala oli stap antap long hil ya we i hae we i hae. Nao from samting ya, yufala i stap tingting se bambae i no gat man i save pulumdaon yufala. Be ol tingting ya i blong giaman long yufala nomo.

⁴ Nating we yufala i wokem ol haos blong yufala antap long hil we i antap olgeta, olsem nes blong bigfala pijin ya igel* we i putum antap olgeta, mo nating we ol haos ya oli antap olgeta klosap long ol sta, be mi bambae mi pulumdaon yufala bakegen.

⁵ “Sipos man blong stil i kam long naet, hem i save stilim ol samting ya nomo we hem i wantem. Mo taem ol man oli stap tekemaot ol frut blong grep,* oltaem oli mas livim sam i stap long rop blong hem. Be taem ol enemi blong yufala oli kam, bambae oli kilim yufala evriwan i ded we oli no save livim wan i stap.

⁶ Ol man Edom. Yufala i laen blong Esao. Ol gudgudfala samting blong yufala, ol enemi bambae oli tektekemaot evriwan, oli karem i blong olgeta.

⁷ Ol fren blong yufala nomo, be bambae oli giaman long yufala, oli ronemaot yufala i gowe long ol graon blong yufala. Mo olgeta ya we naoia oli stap gud nomo wetem yufala, bambae oli winim yufala. Mo ol gudfala fren blong yufala we yufala i stap kakae wanples, bambae oli putum trap, blong yufala i fas long hem, mo bambae oli stap tokbaot yufala se, ‘?Wehem waes blong ol man ya we bifo oli flas tumas long hem?’

⁸ “Ol man Edom. Long dei ya we bambae mi mi givim panis long yufala, bambae mi kilim olgeta waes man blong yufala, mo bambae i no moa gat waes long kantri blong yufala.

⁹ Ol strong man blong yufala we oli stap long taon ya Teman, bambae oli seksek, oli fraet. Mo olgeta soldia blong yufala, bambae mi kilim olgeta evriwan i ded.”

Hae God i talemaot from wanem ol man Edom oli mas kasem panis

¹⁰ Nao Profet Obadaea i gohed, i talemaot we Hae God i talem se, “Ol man Edom. Bambae yufala i sem bigwan. Mi bambae mi kilim yufala evriwan i ded, from we bifo, yufala i bin ravem ol brata ya blong yufala we oli laen* blong Isrel,* mo yufala i bin kilim olgeta tu.

¹¹ Bifo, taem ol strenja oli kam long Jerusalem,* oli brekem ol doa* blong stonwol blong taon ya, oli kam insaed, be yufala i stap lukluk nomo, yufala i no givhan nating long ol brata ya blong yufala. Fasin blong yufala i olsem fasin blong ol strenja ya stret, we oli kam insaed long Jerusalem, nao oli tekemaot ol gudgudfala samting blong ples ya, oli seraot long olgeta.

¹² Ol man Juda* ya oli brata blong yufala. ?Be taem oli stap long trabol, from wanem yufala i laf nogud long olgeta? ?Taem ol enemi blong olgeta oli spolem ples blong olgeta, be yufala i harem gud from wanem? ?Taem oli harem nogud, be from wanem yufala i laf long olgeta?

¹³ ?Long dei ya we trabol i kasem ol man ya blong mi mo oli stap harem nogud, be from wanem yufala i go insaed long taon blong olgeta, yufala i stap tekemaot ol gudgudfala samting blong olgeta, yufala i karem i blong yufala?

¹⁴ ?From wanem yufala i stap wet long ples we ol rod i kros, blong holem olgeta we oli wantem ronwe? ?Olgeta oli harem nogud finis, be from wanem yufala i holem olgeta, yufala i givim olgeta i go long ol enemi blong olgeta?”

Hae God bambae i jajem olgeta kantri from fasin blong olgeta

¹⁵ Mo Profet Obadaea i gohed, i talemaot we Hae God i talem se, “Ol man Edom. Mi mi Hae God, mo Dei* ya blong mi i stap kam klosap we mi bambae mi jajem olgeta kantri long hem. Fasin ya we yufala i mekem long ol man Juda,* bambae mi mekem sem fasin ya long yufala bakegen. Bambae yufala i kasem sem samting we yufala i bin mekem long olgeta.

¹⁶ Ol man Juda. Yufala i man blong mi. Yufala i kasem strong panis finis long tabu hil* blong mi, nao yufala i harem nogud from. Be ol narafala kantri we oli stap raonabaot long yufala, panis blong olgeta bambae i strong moa. Bambae oli kasem panis ya, nao oli go lus olgeta.”

Ol laen blong Isrel bambae oli win

¹⁷ Mo Profet Obadaea i gohed, i talemaot we Hae God i talem se, “Be long hil ya Saeon,* bambae i gat ol man we oli stap gud, oli sef, nao ples ya bambae i kam wan tabu ples. Ol laen* blong Isrel* bambae oli holem graon ya bakegen we i stret graon blong olgeta.

¹⁸ “Ol laen ya blong Isrel we oli kamaot biaen long Josef mo ol narafala laen blong Isrel, bambae oli olsem faea. Bambae oli flatemgud ol laen blong Esao olsem we faea i flatemgud ol gras. Mo bambae i no gat wan man long laen blong hem i stap laef. Mi mi Hae God, mo hemia tok blong mi.

¹⁹ “Olgeta man we oli stap long Juda* long saed i go long saot, bambae oli holem kantri ya Edom. Mo olgeta we oli stap long botom blong ol hil long wes, bambae oli holem kantri ya Filistia. Mo ol laen blong Isrel bambae oli holem ol ples ya long Efrem,* mo long Sameria.* Mo ol laen blong Benjamin,* bambae oli tekem ol graon ya long Gilead i blong olgeta.

²⁰ Ol laen blong Isrel ya we bifo oli stap long kantri blong olgeta long not, mo we ol enemi oli kam tekemaot olgeta oli go stap wok slef* long ol narafala kantri, oli plante we plante. Be bambae olgeta oli kambak, oli winim ol ples long kantri ya Fonisia, go kasem taon ya Jarefat long not. Mo ol man Jerusalem* we oli stap wok slef long taon ya Sadis, bambae oli kam holem ol taon long Juda long saed i go long saot.

²¹ Mo ol man ya we oli win long faet bambae oli go antap long hil ya Saeon,* nao bambae oli rulum kantri ya Edom, mo mi Hae God, bambae mi nomo mi King.”