Hibrus 1 - Baebol Long Bislama

God i yusum Pikinini blong hem blong tok long yumi

¹ Bifo, long ol yia we i pas finis, plante taem, God i stap yusum ol profet blong toktok long ol olfala blong yumi long plante naranarafala fasin.

² Be naoia we i klosap taem we wol ya bambae i finis, hem i yusum Pikinini blong hem blong toktok long yumi. Pikinini ya, hem i stap wok blong God fastaem, taem God i mekem olgeta samting we i stap long wol. Mo God i jusumaot hem finis, blong bambae, taem wol ya i finis, be olgeta samting ya blong wol oli blong hem nomo.

³ Oltaem, God i stap insaed long bigfala laet blong hem, nao Pikinini ya blong hem i olsem laet ya we i saenaot i kam long yumi. Hem i stret pija blong God, we i stap soemaot prapa fasin blong hem. Mo long tok blong hem we i gat paoa, hem i stap holem olgeta samting long wol ya oli stap gud. Taem hem i tekemaot ol sin blong ol man finis, hem i go long heven, i sidaon long raet saed blong God ya we i gat olgeta paoa.

Pikinini ya blong God i hae moa long olgeta enjel

⁴ God i leftemap Pikinini ya blong hem finis, nao hem i hae moa long olgeta enjel, stret olsem we nem ya we God i givim long hem i hae moa long nem blong olgeta.

⁵ Neva God i talem long wan enjel blong hem se, “Yu yu Pikinini blong mi. Tede mi mi kam stret Papa blong yu.” Mo God i no tokbaot wan enjel blong hem se, “Mi bambae mi Papa blong hem, mo hem bambae i Pikinini blong mi.”

⁶ Be klosap long taem ya we God i sanem fasbon blong hem i kam long wol, hem i talem se, “I gud olgeta enjel blong mi oli bodaon blong presem hem.”

⁷ Taem God i tokbaot ol enjel, hem i talem se, “Mi mi mekem ol enjel blong mi oli olsem win we i stap go olbaot. Mi mekem olgeta we oli stap wok blong mi oli olsem faea we i stap laet.”

⁸ Be taem hem i toktok long Pikinini blong hem, hem i talem se, “God, paoa blong yu we yu yu King, bambae i stap oltaem nomo, i no save finis. Yu yu stap rulum ol man blong yu long stret fasin.

⁹ Yu yu laekem ol fasin we i stret, be ol fasin we i nogud yu agens long olgeta. Nao from samting ya, mi we mi God blong yu, mi mi jusumaot yu, mo mi mekem yu yu harem gud, from we mi leftemap nem blong yu i go antap moa i winim we mi mekem long ol fren blong yu.”

¹⁰ Mo bakegen, God i talem se, “Masta*, bifo olgeta, yu yu mekem wol ya, mo long han blong yu nomo yu mekem evri samting we i stap long skae.

¹¹ Olgeta samting ya bambae oli lus, bambae oli brobrok olsem klos, be yu bambae yu stap oltaem nomo.

¹² Bambae yu yu rolemap olgeta, olsem we man i rolemap olfala kot blong hem blong sakem. Bambae yu yu jenisim olgeta samting ya, olsem we man i jenisim sot blong hem. Be yu, oltaem yu yu stap sem mak nomo, mo neva bambae laef blong yu i finis.”

¹³ Neva God i talem long wan enjel blong hem se, “Yu sidaon long raet saed blong mi, yu wet. Bambae mi mekem ol enemi blong yu oli stap aninit long paoa blong yu, oli slef* blong yu.”

¹⁴ Ol enjel ya, oli spirit nomo, we oli stap mekem ol wok blong God. Hem i stap sanem olgeta blong oli kam givhan long ol man ya we bambae i sevem olgeta.