Esikel 1 - Baebol Long Bislama

HAE GOD I PUTUMAP ESIKEL I KAM PROFET ( 1.1—3.27 ) Profet Esikel i luk we Hae God i stap sidaon long bigfala jea blong hem

^1-3 Mi Esikel, we papa blong mi Busi, mo mi mi pris* we mi stap wok slef* wetem ol man ples blong yumi ol laen* blong Isrel,* long saed blong Kebara Reva long Babilonia. Nao long namba toti yia, long namba fo manis,* long namba faef dei blong hem, mi mi stap long saed blong reva ya, nao mi luk wan vison.* Hemia long namba faef yia biaen long taem ya we oli holem King Jehoeakin long Jerusalem,* oli karem hem i kam wok slef long Babilonia. Long vison ya, mi luk we skae i open, nao mi luk ol samting we Hae God i soemaot long mi. Nao mi harem we hem i toktok long mi, mo mi harem we paoa blong hem i holem mi.

⁴ Mi lukluk i go antap, nao mi luk wan bigfala klaod blong hariken i aot long not, i stap kam, mo laetning i stap laet i kamtru long klaod ya, mo skae i red raonabaot long hem. Mo long ples ya we laetning i stap laet long hem, i gat wan samting i stap saen olsem bras.

⁵ Long medel blong hariken ya, mi luk olsem fo laef samting i stap we oli olsem man.

⁶ Be olgeta wanwan i gat fo fes mo fo wing.

⁷ Ol leg blong olgeta oli stret gud mo leg blong olgeta daon i olsem leg blong buluk. Oli saen olsem bras we man i saenemgud.

⁸ Ol samting ya wanwan oli gat fo fes mo fo wing, be aninit long olgeta wing ya wanwan, oli gat han olsem han blong man.

⁹ Olgeta wanwan, wan i stretem tu wing blong hem, wan i stretem tu wing blong hem, blong oli mekem wan skwea we en blong ol wing ya blong olgeta i stap tajem olgeta long ol fo kona blong skwea ya. Taem oli go samples, oli muv olsem wan kampani nomo we oli no stap tantanem bodi blong olgeta.

¹⁰ Ol samting ya wanwan oli gat fo naranarafala fes. Long fored i gat fes blong man, mo long raet saed i gat fes blong laeon, mo long lef saed i gat fes blong bul, mo long baksaed i gat fes blong bigfala pijin ya igel.*

¹¹ Mo olgeta wanwan, wan i stretem tu wing blong hem, wan i stretem tu wing blong hem, we en blong ol wing ya i stap tajem olgeta, mo oli kavremap bodi blong olgeta long ol narafala tu wing blong olgeta.

¹² Ol samting ya wanwan oli stap lukluk i go long evri saed, from we olgeta wanwan oli gat fo fes, nao oli stap go long weples we God i wantem olgeta oli go long hem, we oli no save tanem olgeta.

¹³ Long medel blong ol samting ya, i gat wan samting olsem sakol faea we i stap laet, no i olsem faea we i stap laet i stap muvmuv olbaot. Faea ya i stap laet, mo i stap sutumaot laet blong hem i go olsem laetning.

¹⁴ Olgeta oli stap muv kwiktaem olsem laetning. Oli stap muv i go, oli stap muv i kam.

¹⁵ Taem mi stap lukluk long ol fo samting ya, mi luk fo wil we oli stap long saed blong olgeta wanwan, we ol wil ya oli go kasem graon.

¹⁶ Ol fo wil ya evriwan oli sem mak nomo, mo olgeta wanwan i saen olsem flas ston ya krisolaet.* Mo ol wil ya wanwan i gat narafala wil i gotru long hem, we i mekem fo kona long medel blong hem,

¹⁷ blong bambae ol wil ya oli save muv i go long ol fo saed, we oli no save tanem olgeta.

¹⁸ Ol aean blong ol wil ya oli bigbigwan we i mekem mi mi fraet blong lukluk olgeta, from we oli gat plante ae blong man i kavremapgud olgeta.

¹⁹ Taem ol samting ya oli muv i go, oli go wetem ol wil ya, mo taem oli girap i go antap, oli go wetem ol wil ya.

²⁰ Weples we God i wantem olgeta oli go long hem, olgeta oli stap muv wetem ol wil ya, from we ol wil ya oli haf blong olgeta.

²¹ Nao oltaem, taem ol samting ya oli muv i go, no oli stanap, no oli girap i go antap, be ol wil ya tu oli mekem sem samting, from we oli haf blong olgeta.

²² Antap long hed blong ol samting ya, i gat wan samting olsem ruf we i raon, mo i saen we i saen olsem glas we i klia gud, we i mekem mi mi harem we mi no naf blong go klosap long hem.

²³ Olgeta oli stanap aninit long ruf ya, mo olgeta wanwan, wan i stretem tu wing blong hem, wan i stretem tu wing blong hem, we en blong ol wing ya i stap tajem olgeta, mo oli kavremap bodi blong olgeta long ol narafala tu wing blong olgeta.

²⁴ Taem oli flae mi harem noes blong ol wing blong olgeta we i olsem noes blong bigfala solwota we i brok long rif, mo i olsem noes blong wan bigfala kampani blong ol soldia, mo i olsem voes blong God ya we i gat olgeta paoa. Taem oli no flae, wing blong olgeta i godaon.

²⁵ Mo i gat wan voes i kamaot antap long ruf ya, antap long hed blong olgeta, i toktok i kam.

²⁶ Antap long ruf ya i gat wan samting olsem bigfala jea blong king i stap we oli wokem long flas ston ya safaea,* mo mi luk olsem we i gat wan man i stap sidaon long hem.

²⁷ Man ya, i stat long ples blong strap blong hem, i go antap, bodi blong hem i saen olsem bras we i stap bon insaed long faea, mo i gat faea i laet raonabaot long hem. Mo i stat long ples blong strap i godaon, bodi blong hem i olsem faea we i laet, mo bigfala laet i stap saen raonabaot long hem,

²⁸ we i gat olgeta kala blong renbo long hem. Bigfala laet ya i soemaot we Hae God i stap. Nao taem mi luk samting ya, mi foldaon we fes blong mi i godaon long graon. Nao mi harem Hae God i toktok.