Daniel 7 - Baebol Long Bislama

DANIEL I TOKBAOT OL VISON WE GOD I SOEMAOT LONG HEM ( 7.1—12.13 ) Daniel i luk fo bigfala anamol

¹ Long taem we King Belsasa i rul long Babilon, long fas yia blong hem, wan naet Daniel i luk wan vison.* Nao biaen, hem i raetemdaon ol samting we God i soemaot long hem long vison ya, mo hemia stori blong hem.

² Hem i talem se, “Long vison ya, mi mi luk we win i blu i kam long evri saed, nao i mekem solwota i girap we i raf we i raf.

³ Nao i gat fo bigbigfala anamol i kamaot long solwota, we evriwan oli naranarafala.

⁴ Faswan, hem i olsem laeon, be i gat tufala wing blong hem olsem wing blong igel.* Be taem mi stap lukluk hem, God i pulumaot tufala wing ya blong hem. Nao hem i leftemap anamol ya, i mekem hem i stanap long tufala leg blong hem olsem man, mo i givim tingting blong man long hem.

⁵ Nao namba tu anamol i kamaot. Hem i olsem wan bea, mo hem i stanap be i lei wansaed, mo i holem tri rib blong anamol long maot blong hem. Nao mi harem wan man i tok long anamol ya, i talem se, ‘!Yu gohed, yu kakae plante mit olsem we yu wantem!’

⁶ Nao taem mi stap lukluk anamol ya, namba tri anamol i kamaot. Hem i olsem leped,* be i gat fo wing blong hem long baksaed blong hem we oli olsem wing blong pijin. Anamol ya i gat fo hed blong hem, mo God i givim paoa long hem blong i save rul.

⁷ “Nao taem mi stap lukluk hemia, namba fo anamol i kamaot. Hem i strong we i strong, mo fes blong hem i nogud we i nogud, i mekem mi mi fraet we mi fraet tumas blong luk. Hem i stap brebrekem ol kakae blong hem long ol bigbigfala tut blong hem we oli olsem aean. Hem i brebrekemgud ol kakae ya, i kakae, mo ol haf kakae we i stap, hem i purumpurumbut long hem blong spolem. Be hem i no olsem ol tri narafala anamol ya, hem i gat ten hon blong hem.

⁸ Mo taem mi stap lukluk ol hon ya, mi luk wan smol hon tu i stap gru, i kam antap long medel blong ol narafala hon ya. Nao smol hon ya i pusumaot tri hon long olgeta ya we oli stap fastaem, blong mekem ples blong hem. Smol hon ya i gat tufala ae blong hem olsem ae blong man, mo hem i gat maot tu, nao i stap tok flas we i bigmaot tumas.

Daniel i luk wan Olfala we i stap fastaem bifo olgeta, mo bambae i stap gogo i no save finis

⁹ “Nao taem mi stap lukluk, mi luk sam man oli karem ol spesel jea blong king i kam, nao oli putumrere olgeta i stap wanples. Mo mi luk wan Olfala we i stap fastaem bifo olgeta, mo bambae i stap gogo i no save finis, hem i kam sidaon long wan long ol jea ya. Olfala ya, ol klos blong hem i waet we i waet, mo hea blong hem i waet gud, olsem koten we i klin gud. Bigfala jea ya blong hem i gat faea i stap laet olbaot long hem, mo i gat ol wil blong hem we oli stap laet olsem faea.

¹⁰ Mo faea we i stap kamaot long jea ya, i stap ron olsem reva. Mo i gat plante taosen man we oli man blong wok blong hem, oli stap long ples ya, mo i gat plante narafala man we oli plante we plante tumas, man i no save kaontem olgeta, oli stap stanap long fes blong hem. Nao Olfala ya i sidaon blong jajem ol man, mo ol man blong hem oli openem ol buk.

¹¹ “Nao taem mi stap lukluk olgeta ya, mi stap harem smol hon ya yet, i stap bigmaot long ol tok flas blong hem. Mo taem mi stap lukluk hem, mi luk we oli kilim namba fo anamol ya, oli sakem i go insaed long bigfala faea ya we i stap laet, nao i bon evriwan.

¹² Mo Olfala ya we i mekem kot i tekemaot paoa blong ol narafala anamol ya, be i letem olgeta oli stap laef blong smol taem.

¹³ “Nao long vison* ya, mi luk wan man we i olsem man blong wol ya. Hem i stap kam stret long mi, mo klaod i stap raonabaot long hem. Nao hem i go stanap long fes blong Olfala ya we i stap fastaem bifo olgeta, mo bambae i stap gogo i no save finis.

¹⁴ Nao Olfala ya i putumap man ya i king, i leftemap nem blong hem i hae we i hae, mo i givim bigfala paoa long hem, blong bambae olgeta man blong olgeta kantri mo olgeta kala mo olgeta lanwis oli wok blong hem. Hem i king we paoa blong hem bambae i stap oltaem nomo, mo rul blong hem bambae i no save finis samtaem.

Daniel i kasem mining blong ol samting we hem i luk

¹⁵ “Nao vison* ya i mekem mi mi fraet, mo tingting blong mi i trabol tumas.

¹⁶ Ale, mi go luk wan long olgeta ya we oli stap stanap long ples ya, mi askem long hem blong i talemaot mining blong olgeta samting ya long mi. Nao hem i talem long mi se, ‘Mining blong olgeta samting ya i olsem.

¹⁷ Ol fo bigfala anamol ya i min se i gat fo kantri we bambae oli girap wanwan long wol ya, blong oli rulum olgeta man.

¹⁸ Mo biaen, ol man blong God ya we i hae we i hae, bambae oli kasem paoa blong king, mo bambae oli holem oltaem gogo i no save finis.’

¹⁹ “Nao mi askem bakegen mining blong namba fo anamol ya, we i no olsem tri narafala ya. Hem i wan anamol we i mekem mi mi fraet we mi fraet tumas blong luk, mo hem i stap brebrekem ol kakae blong hem long ol selfingga blong hem we i olsem bras, mo long ol bigbigfala tut blong hem we i olsem aean. Hem i brebrekemgud ol kakae ya, i kakae, mo ol hafkakae we i stap, hem i purumpurumbut long hem blong spolem.

²⁰ Mo mi askem bakegen mining blong ol ten hon ya long hed blong hem, mo smol hon ya we i kamaot biaen, i mekem tri hon long olgeta ya we oli stap fastaem, trifala i foldaon. Hem i gat tu ae blong hem mo wan maot blong hem, mo hem i stap tok flas we i bigmaot tumas. Smol hon ya i nogud we i nogud, i mekem mi mi fraet moa blong luk, i winim we mi fraet long ol narafala hon ya.

²¹ “Mo taem mi stap lukluk, mi luk we hem i girap, i faet agens long ol man blong God, mo i stap winim olgeta.

²² Be Olfala ya we i stap bifo olgeta, mo bambae i stap gogo i no save finis, hem i jajem smol hon ya, se hem i mas lus. Olfala ya, hem i God ya, mo hem i hae we i hae, nao hem i leftemap ol man ya blong hem, i givim paoa blong king long olgeta.

²³ “Hemia mining blong ol samting ya we man ya i soemaot long mi. Hem i talem se, ‘Namba fo anamol ya, hem i namba fo kantri ya we bambae i rul long wol ya, be bambae hem i narafala long ol tri narafala kantri ya we oli stap rul. Bambae hem i winim olgeta ples long wol ya, i mekem olgeta oli stap aninit long paoa blong hem, nao i spolemgud olgeta olsem we i stap purumpurumbut long olgeta.

²⁴ Mo ten hon ya blong hem i min se i gat ten king we bambae oli rul long ples ya. Mo biaen bambae i gat narafala king i kamaot, we hem bambae i narafala olgeta long ol ten king ya, mo bambae hem i winim tri long olgeta ya, i kilim trifala i ded.

²⁵ God i hae we i hae, be bambae king ya i tok agens long hem, i spolemgud ol man blong hem, i mekem olgeta oli harem nogud tumas. Mo bambae hem i traem blong jenisim ol spesel taem blong olgeta mo Loa blong olgeta. Mo bambae ol man blong God oli stap aninit long paoa blong hem go kasem tri yia haf.

²⁶ Be biaen, God bambae i mekem kot, i tekemaot paoa long hem, mo bambae i spolem hem we i spolemgud.

²⁷ Mo paoa blong olgeta king, wetem ol gudgudfala samting blong ol kingdom blong olgeta, God bambae i givim long ol man blong hem. Paoa ya blong olgeta bambae i no save finis samtaem, mo bambae olgeta king long wol ya oli stap wok blong olgeta, mo oli stap obei long olgeta.’

²⁸ “Hemia nao en blong stori blong vison ya we mi mi luk. Vison ya i mekem mi mi fraet we mi fraet, we mi harem bodi blong mi i kolkol, be mi no talemaot ol samting ya.”