Daniel 12 - Baebol Long Bislama

Lasdei

¹ “Nao man ya we i werem gudfala klos we oli wokem long linen,* i talem se, ‘Long taem ya, bambae enjel ya Mikael we i hae we i hae, we i stap lukaot long ol man ples blong yu bambae hem i kamtru. Mo bambae i gat wan taem blong trabol i kam we i mowas olgeta, i winim ol narafala taem blong trabol, i stat long taem ya bifo we i gat ol fas man i stap, i kam kasem tede. Long taem ya, olgeta man long kantri blong yu we oli gat nem blong olgeta long buk blong God, bambae oli sef.

² Mo plante long olgeta we oli ded finis bambae oli laef bakegen. Sam long olgeta bambae oli stap harem gud long laef ya we i no save finis, be sam long olgeta bambae oli sem, mo oli stap harem nogud gogo i no save finis.

³ Mo olgeta we oli waes gud bambae oli saen we i saen olsem san. Mo olgeta we oli bin tijim ol man blong mekem ol stret fasin, bambae oli saen olsem ol sta gogo i no save finis.’

⁴ “Nao hem i talem long mi se, ‘Daniel. I gud yu satem buk* ya, yu putum wan mak long hem blong blokem i stap olsem gogo kasem klosap en blong wol ya. Mo gogo kasem taem ya, plante man bambae oli stap resis olbaot blong traem save ol samting we i stap kamtru.’ ”

⁵ “Nao biaen, mi luk tu man we tufala i stap stanap long saed blong wan reva, wan i stanap narasaed, mo wan i stanap narasaed.

⁶ Man ya we i werem gudfala klos we oli wokem long linen,* hem i stap stanap long saed blong reva ya antap lelebet i go, nao wan long tufala ya i askem long hem se, ‘?Bambae ol samting ya blong sapraes i stap olsemia gogo i finis wetaem?’

⁷ “Ale, man ya i leftemap tufala han blong hem i poen i go long heven, nao i mekem wan strong promes long nem blong God ya we i stap oltaem nomo, gogo i no save finis. Nao mi harem hem i talem se, ‘Bambae ol samting ya i stap gogo kasem tri yia haf. Taem fasin blong spolem ol man blong God i finis, bambae ol samting ya tu i finis.’

⁸ “Mi harem samting ya we hem i talem, be mi no save mining blong hem nating. Nao mi askem se, ‘?Masta,* be bambae en blong ol samting ya i olsem wanem?’

⁹ “Nao hem i talem se, ‘Daniel, i gud yu gohom. Ol toktok ya i tokhaed nomo, mo bambae i stap haed olsem gogo kasem klosap en blong wol ya.

¹⁰ Bambae God i letem plante man oli gotru long hadtaem blong oli kam klin long fes blong hem, mo oli kam strong. Be olgeta we oli man nogud bambae oli no save luksave samting ya, bambae oli gohed nomo blong mekem ol fasin nogud. Olgeta ya nomo we oli waes bambae oli luksave.

¹¹ “ ‘I stat long taem we oli blokem ol sakrefaes we ol man blong God oli stap mekem evri dei, we hemia taem ya we oli putumap rabis god ya blong ol hiten man, bambae i gat wan taosen tu handred naenti dei i pas.

¹² Olgeta we tingting blong olgeta i stap strong long God gogo kasem taem we wan taosen tri handred toti faef dei i pas, olgeta ya bambae oli harem gud.

¹³ “ ‘Daniel. Yu mas mekem tingting blong yu i stap strong long God gogo kasem en blong laef blong yu. Nao bambae yu yu ded, be bambae yu laef bakegen blong kasem pei blong yu long en blong wol.’ ”