Yuörö 6 - Bibilia Buk na Ŋun nagon koti luŋu a

¹ A MATAT kulyani ko Mose adi, Soŋinana do de memet ŋo nagon nan de kökonakin Paro kune; kogwon nye mo kökölörö se ko könin lonyit iŋgo lo riŋit, iŋkoi, nye mo ririkörö lepeŋat kaŋo kanyit i jur ko könin lonyit iŋgo.

Luŋu na Mose daŋ tomurek

² A Ŋun kulyani ko Mose adi, Nan a MATAT.

³ Nan köju a pukökin ko Abarayama, ko Yisaka, se ko Yakobo, adi nan a Ŋun Kabulönit, ama nan a ko tiŋdu lepeŋat i deŋdya na nan ko karin kwe ti MATAT.

⁴ A nan Köti togwi ’dikiŋdye tomoret nio ko se i tiŋdu na lepeŋat jur lo Kanana a lose, kweja adi ŋilu jur logon lepeŋat si ’da kata a lepelok lu.

⁵ Köti nan lepeŋ aje yiŋ wiwinyesi ti Ŋutu ti Yisaraele logon Ŋutu ti Ejipeto a ri ’dikin a ’dupi kulo, a nan iŋge yiyiuŋdyö tomoret nio.

⁶ Nyenagon kulyani ko Ŋutu ti Yisaraele adi, Nan a MATAT, nan mo jojon ta kaŋo i kita na pömöni nagon Ŋutu ti Ejipeto a ri ’dikin ta na, a nan mo lwökuŋdye ta kaŋo i to ’dupien nasu, a nan mo kölöddi ta a lui ko könin lo riöji se ko konesi temejik ti ’duŋgö na putet,

⁷ a nan mo joŋgi ta a Ŋutu kwe, a nan mo gwe a Ŋun losu, a ta mo dene den adi nan a MATAT Ŋun losu logon a joŋdya ta kaŋo i kita na pömöni nagon Ŋutu ti Ejipeto a ri ’dikin ta na.

⁸ A nan mo tolupödöi ta i ŋilu jur logon nan a ’doggu könin lio ki i milyekiŋdyo tiŋdu Abarayama, ko Yisaka, se ko Yakobo lu; a nan mo tiŋdi ta ŋilu jur a lomore losu. Nan logon a MATAT.

⁹ A Mose nyönyokökiŋdye Ŋutu ti Yisaraele kilo kulyaesi, ama a se tine ’bön yiŋga Mose asut, kogwon lokole lose se ko to ’dupien nase na pömöni.

¹⁰ A MATAT kulyani ko Mose adi,

¹¹ Lupöni ko Paro mor lo Ejipeto yu, jamaki lepeŋ adi ti nye kölörö Ŋutu ti Yisaraele kaŋo kanyit i jur.

¹² A Mose jambi ko MATAT i kömöŋ adi, Mete, Ŋutu ti Yisaraele ti yiŋ nan kwoŋ; nyena a Paro de yiŋge nan ada nan logon a ŋulu ’be lo?

¹³ Ama a MATAT kulyani ko Mose ko Arona, a sarakiŋdye lepeŋat i kulya ti Ŋutu ti Yisaraele se ko ti Paro mor lo Ejipeto, kweja adi anyen se joŋga Ŋutu ti Yisaraele kaŋo i jur lo Ejipeto.

Kenet na kötumit nase Mose ko Arona

¹⁴ Kilo a kusik ti kötumitön ti merenyejin kase. Ŋwajik ti Rubena ŋuro kayu lo Yisaraele, karin kase a ko Kanok, ko Palu, ko Keseron, ko Karmi; kweja adi kilo a nyakwariat ti Rubena gwoso i midijik kase.

¹⁵ A ŋwajik ti Simeona gwe a ko Yemuele, ko Yamin, ko Oda, ko Yakin, ko Sokar, ko Saula ŋuro lo ŋuto na Kanana; kilo a nyakwariat ti Simeona gwoso i midijik kase.

¹⁶ A kune gwe a karin ti ŋwajik ti Lewi gwoso i nyakwariat kase. Lepeŋat a ko Gereson, ko Kowat, ko Merari. Kiŋajin ti Lewi a mia geleŋ ko merya musala wot buryo.

¹⁷ A ŋwajik ti Gereson gwe a ko Libeni ko Simei gwoso i midijik kase.

¹⁸ A ŋwajik ti Kowat gwe a ko Ameram, ko Yisar, ko Keberon, se ko Ujiele. Kiŋajin ti Kowat a mia geleŋ ko merya musala wot musala.

¹⁹ A ŋwajik ti Merari gwe a ko Makeli ko Musi. Kine a midijik ti Ŋutu ti Lewi gwoso i nyakwariat kase.

²⁰ A Ameram yembi Yokebede kiaser na monye a nakwan nanyit, a nye yuŋwekiŋdye lepeŋ Arona ko Mose. Kiŋajin ti Ameram a mia geleŋ ko merya musala wot buryo.

²¹ A ŋwajik ti Yisar gwe a ko Korak, ko Nepeŋe, ko Jikeri.

²² A ŋwajik ti Ujiele gwe a ko Misaele, ko Elesapana, ko Siteri.

²³ A Arona yembi Eliseba ŋuro na Aminadaba ko a kiaser na Nasona a nakwan nanyit; a nye yuŋwekiŋdye lepeŋ Nadaba, ko Abiu, ko Elejara, ko Itamar.

²⁴ A ŋwajik ti Korak gwe a ko Asir, ko Elekana, ko Abiasaŋ; kine a midijik ti Ŋutu ti Korak.

²⁵ A Elejara ŋuro lo Arona yembi nene na ŋwajik ti Putiele; a nye yuŋwekiŋdye lepeŋ Pinasa. Kilo a kusik ti kötumitön ti merenyejin ti Ŋutu ti Lewi gwoso i midijik kase.

²⁶ Kilo a ko ŋilo Arona ko ŋilo Mose logon MATAT a kulya ko lepeŋat adi, Joŋgi ta Ŋutu ti Yisaraele kaŋo i jur lo Ejipeto gwoso i lodirön kase.

²⁷ Kilo a ko Mose ko Arona lo jambu ko Paro mor lo Ejipeto, i kulya ti joŋga na Ŋutu ti Yisaraele kaŋo i jur lo Ejipeto.

MATAT sarakin Mose ko Arona kulya nagon jamaki Paro kune

²⁸ A ko gwe sona i ŋilu lor lo jambi MATAT ko Mose nyu i jur lo Ejipeto lu,

²⁹ a MATAT kulyani ko Mose adi, Nan logon a MATAT; nyönyököki Paro mor lo Ejipeto ŋo liŋ na sarakin nan do kine.

³⁰ Ama a Mose pipije MATAT a lokomor adi, Mete, nan a ŋulu ’be, a Paro de yiŋge nan ada?