Yuörö 40 - Bibilia Buk na Ŋun nagon koti luŋu a

Kemia a togwi ’diki ki ko a ’borowa

¹ A MATAT kulyani ko Mose adi,

² lor geleŋ lo yapa lo kokwe, togwi ’dikiŋdye kemia ki nagon a kemia torumet.

³ A do tiŋdi saŋduk na ŋurupö tökoresi i lukata nanyit, a do muŋge saŋduk ko boŋgo koret.

⁴ A do joŋgi misa lukata, a do peddi tito kanyit jojo i loki nanyit; a do Köti joŋgi gwo ’diet lo lombojin i lukata nanyit, ko tiŋdi lombojin kanyit nyin.

⁵ A do tiŋdi pirit ’yuret na bökur nagon a dakap i ŋerot na saŋduk na ŋurupö tökoresi, a do lilikiŋdye boŋgo muket na kötumit na kemia ki.

⁶ A do tiŋdi pirit ’yuret na rubaŋgajin lo ’yu ’yura ’buluŋ i ŋerot na kötumit na kemia nagon a kemia torumet.

⁷ A do tiŋdi lalaet i kiden na kemia torumet se ko pirit ’yuret, a do tiŋdi pioŋ nyin.

⁸ A do togwi ’dikiŋdye ki mariŋ nagon lorga kemia na, a lilikiŋdye boŋgo muket na kötumit na mariŋ.

⁹ Nyena a do ’dumuŋdye welet na wewelarikin, a do we ’yi kemia se ko ŋo liŋ na gwon kanyit lukata kune, anyen geluŋdya lepeŋ se ko tito kanyit liŋ a nake; a nye mo gwe a nake na rurwan.

¹⁰ A do Köti we ’yi pirit ’yuret na rubaŋgajin lo ’yu ’yura ’buluŋ se ko tito kanyit liŋ, anyen geluŋdya se a nake; a pirit ’yuret mo gwe a nake parik na rutwan.

¹¹ Köti a do we ’yi lalaet ko mukök nanyit, anyen geluŋdya lepeŋ a nake.

¹² A kirut do joŋdi Arona ko ŋwajik kanyit tojo i kötumit na kemia torumet, a do tukwöji lepeŋat ko pioŋ.

¹³ A do tojubbi Arona ko boŋwat nake na rurwan; a do we ’yi lepeŋ, a geluŋdye lepeŋ a loke, anyen nye böŋö kitakiŋdya nan a koane.

¹⁴ A do joŋdi ŋwajik kanyit Köti, a tojubbi lepeŋat ko jölöbiyajin,

¹⁵ a do we ’yi lepeŋat gwoso na we ’yi do monye lose nu, anyen se böŋö kitakiŋdya nan a koanejin; a welaki nase a koanejin mo yeŋe yeŋon temba i nyakwariat kase liŋ.

¹⁶ Nyenagon a Mose koŋdi sona gwoso i ŋo liŋ nagon MATAT a sarakin lepeŋ kune.

¹⁷ A i yapa lo kokwe lo kiŋa tomurek i lor geleŋ lo yapa, a kemia iŋge togwi ’diki ki.

¹⁸ A Mose togwi ’dikiŋdye kemia ki, a nye petaddi gwo ’diesi kanyit, a togwi ’dikiŋdye baulan kanyit, a sukiŋdye turya görösi kanyit, a nye togwi ’dikiŋdye togwi ’diesi kanyit ki.

¹⁹ A nye muŋge kemia ku boŋgwat kanyit, kirut a nye tiŋdi kanyit loki muket na kemia; gwoso na sarakiŋdye MATAT Mose nu.

²⁰ A nye ’dumuŋdye ŋurupö nagon a tökoresi kune a tiŋdi se i saŋduk lukata, a sukiŋdye turya i saŋduk anyen ’do ’dokorikin, a tiŋdi muket nagon toronjin lala kata na i loki na saŋduk;

²¹ a nye joŋgi saŋduk i kemia lukata, a togwi ’dikiŋdye boŋgo koiet ki, a muŋge saŋduk na ŋurupö tökoresi; gwoso na sarakiŋdye MATAT Mose nu.

²² A nye tiŋdi misa i kemia torumet lukata, i swöt lo lobot lo kemia, i kaŋo na boŋgo koret.

²³ A nye petakiŋdye nyin ambatajin jojo ko MATAT i komor; gwoso na sarakiŋdye MATAT Mose nu.

²⁴ A nye tiŋdi gwo ’diet lo lombojin i kemia torumet a lo pelela ko misa i merete lo loki lo kemia.

²⁵ A nye tiŋdi lombojin ki ko MATAT i komor; gwoso na sarakiŋdye MATAT Mose nu.

²⁶ A nye tiŋdi pirit ’yuret na bökur nagon a dakap i kemia torumet lukata i komor na boŋgo koret,

²⁷ a nye ’yuŋe bökur lo mon paleleŋ kanyit loki; gwoso na sarakiŋdye MATAT Mose nu.

²⁸ a nye tiŋdi boŋgo muket na kötumit na kemia kanyit i pirit.

²⁹ A nye tiŋdi pirit ’yuret na rubaŋgajin lo ’yu ’yura ’buluŋ nyona ko kötumit na kemia nagon a kemia torumet, a nye wukiŋdye rubaŋgajin lo ’yu ’yura ’buluŋ se ko ’doket na ’bolot kanyit loki; gwoso na sarakiŋdye MATAT Mose nu.

³⁰ A nye tiŋdi lalaet i kiden na kemia torumet se ko pirit ’yuret, a tiŋdi pioŋ nyin a lalaesi.

³¹ A Mose ko Arona se ko ŋwajik kanyit kulo lalaji könisi kase ko mokosi kase i kine pioŋ;

³² kweja adi se lalaju na lupöri se i kemia torumet lukata, ko na ŋoŋdi se nyona i pirit ’yuret na rubaŋgajin nu; gwoso na sarakiŋdye MATAT Mose nu.

³³ A nye togwi ’dikiŋdye mariŋ ki na lorga kemia ko pirit ’yuret, a nye lilikiŋdye boŋgo muket na kötumit na mariŋ ki. Nyenagon a Mose tutuŋge kita liŋ sona.

Luru a muggö kemia

³⁴ A kirut a luru muŋge kemia torumet, a minyo lo MATAT töjoreji kemia.

³⁵ A Mose tine bulö lupö i lukata na kemia torumet kogwon luru lo gwon i kemia loki lo, a minyo lo MATAT töjoreji nu kemia.

³⁶ Nyena temba ijölö nase na wusaji ’e luru ki i loki na kemia nu, a Ŋutu ti Yisaraele ŋiörö ŋiörö;

³⁷ ama ko luru a ko nyuŋ wusaji ki, a se tine ŋiörö tojo ko lor lo jopari lepeŋ ki lu.

³⁸ Kogwon luru lo MATAT gwon i kemia loki temba i tuparan, a kimaŋ gwe i luru lukata temba i tukwaje; kötumit na Yisaraele liŋ memeddya luru temba i jölö nase.