Yuörö 39 - Bibilia Buk na Ŋun nagon koti luŋu a

Tetena na boŋgwat ti koanejin

¹ A se kitani ko waro naŋem, ko na ’bule, ko nator a boŋgwat na gweya a namunyak. Kine boŋgwat kitarikin i pirit nake na rurwan, a se tetenakiŋdye Arona boŋgwat nake na rurwan; gwoso na sarakiŋdye MATAT Mose nu.

² A nye gweji dakap, ko waro naŋem, ko na ’bule, ko nator, ko waro na sirita a namin a eŋoda.

³ A se niddye dakap a naparere na ’döpökök, a ’du’duŋge a patala anyen bodo gweja se ko waro naŋem, ko na ’bule, ko nator. ko boŋgo nagon a tetena ko waro na sirita a namin kune i pirit na geleŋ.

⁴ A se gweji eŋoda ko tomoresi murek na tomor a geliya i kutusen kanyit murek kune.

⁵ A kamba nanyit nagon dokorikin lepeŋ na, gweyani ko tobodwan jojo a gweyari geleŋ ko lepeŋ; kweja adi gweya ko dakap, ko waro naŋem, ko na ’bule, ko nator, ko boŋgo nagon a tetena ko waro na sirita a namin; gwoso na sarakiŋdye MATAT Mose nu.

⁶ A se teteŋdi ŋurupö nakwekwelen nagon a berilo, a to ’depakiŋdye se i dakap na gwegweya a ŋuŋukatu, a gigirukine karin ti ŋwajik ti Yisaraele nyin gwoso jokesi nagon jokaki ’e gwuluet na.

⁷ A nye to ’depakiŋdye kine ŋurupö i tomoresi ti geliya ti eŋoda, anyen yeyeörikin ŋwajik ti Yisaraele gwoso na sarakiŋdye MATAT Mose nu.

⁸ A nye teteŋdi muket na kido nagon bodo lo teteŋdya, gwoso na gweyari eŋoda na ko dakap, ko waro naŋem, ko na ’bule, ko nator, ko boŋgo nagon a tetena ko waro na sirita a namin.

⁹ A se teteŋdi muket na kido a gudula murek a gwe a regorego; a temet na tojolan nanyit gwe a ’dapanit na könin, a Köti temet na tugalaŋ nanyit gwe a ’dapanit na könin.

¹⁰ A se to ’depakiŋdye kanyit ’dokiŋ Iŋwan ti ŋurupö. A ’doke togeleŋ gwe a ŋurupö nagon karin kase a sardiö, ko topajo, ko samaragado;

¹¹ a ’doke tomurek gwe a antarak, ko sapira, ko yasipidi;

¹² a ’doke tomusala gwe a ligurion, ko akatiso, ko ametisito;

¹³ a ’doke to-Iŋwan gwe a krisölitö, ko berilo, ko onukion; a se to ’depakine i kine dakap na gwegweya a ŋuŋukatu.

¹⁴ A kine ŋurupö gwe puök wot murek ko karin kase gwoso i karin ti ŋwajik ti Yisaraele; a kine ŋurupö gwe gwoso jokesi na jokaki ’e gwuluet, se liŋ geleŋ geleŋ a gigiru ko karin kase gwoso i kotu-mitön puök wot murek.

¹⁵ A se tetenakiŋdye muket na kido toŋot logon a dakap nake na kakalapaji gwoso patala.

¹⁶ A se teteŋdi to ’depesi murek ti dakap na gwegweya a ŋuŋukatu, se ko re murek nagon a dakap; a se tiŋdi kine re murek i kutusen murek ti muket na kido.

¹⁷ A se sukiŋdye patala murek nagon a dakap i kine re murek lukata, i kutusen ti ŋina muket na kido.

¹⁸ A se tomorakiŋdye kutusen murek ti patala murek nagon a dakap na kakalapaji kune, i to ’depesi ti dakap na gwegweya a ŋuŋukatu, a tiŋdi se i tomoresi ti geliya ti eŋoda, i ŋerot nanyit.

¹⁹ A se teteŋdi re murek nagon a dakap, a se tiŋdi se i kutusen murek ti muket na kido, i kutuk nanyit na lukata a lo pelela ko eŋoda.

²⁰ A se teteŋdi re murek nagon a dakap, a tiŋdi se i tomoresi ti geliya murek ti eŋoda kak, i komor nanyit, i nyona na tomoret nanyit, i loki na kamba na gweya ko tobodwan.

²¹ A se tomorakiŋdye muket na kido ko pata naŋem i re kanyit tojo i re ti eŋoda, anyen nye böŋö si ’da i kamba na eŋoda loki na gweya ko tobodwan na, an muket na kido lakaji kaŋo i eŋoda; gwoso na sarakiŋdye MATAT Mose nu.

²² A nye Köti teteŋdi boŋgo muit najo na eŋoda a gweya ko waro naŋem liŋ;

²³ a dili roset i kiden na boŋgo muit gwe gwoso nene roset na boŋgo nagon kutuk nanyit a to ’dikiŋ ko pata na gwegweya, an nye ko kerenya.

²⁴ A se tetenakiŋdye i kume lo nu boŋgo muit ŋo gwoso ludweki logon a ruman, a gweya ko waro naŋem, ko na ’bule, ko nator, ko boŋgo nagon a tetena ko waro na sirita a namin.

²⁵ A se Köti teteŋdi luŋwö logon a dakap nake, a gwegwelakiŋdye kilo luŋwö i kiden na ludweki ti ruman i loloraddu na kume lo nu boŋgo, i kiden na ludweki ti ruman;

²⁶ luputöt ko ludwe lo ruman, luputöt ko ludwe lo ruman, i loloraddu na kume lo nu boŋgo kitaet; gwoso na saŋi MATAT Mose nu.

²⁷ A se tetenakiŋdye Arona se ko ŋwajik kanyit jölöbiyajin na gweya ko waratat naparere,

²⁸ ko ema na waratat naparere, ko töröbusijin lo gweya ko waratat naparere, ko boŋgwat ti mok na gweya ko waro na sirita a namin,

²⁹ se ko kamba na boŋgo nagon a tetena ko waro na sirita a namin, ko waro naŋem, ko na ’bule, ko nator nagon karipanit katokwelenyonit lo ribba; gwoso na saŋi MATAT Mose nu.

³⁰ A se teteŋdi dakap nake a beleŋ beleŋ nagon a Iŋguya loke lo rurwan, a gigiŋi lepeŋ gwoso gigirisi ti joket na jokaki ’e gwuluet na. A kulyaesi lo gigiruki nyin kulo gwe adi, A gelwe a loke lo MATAT.

³¹ A se torakiŋdye lepeŋ pata naŋem, anyen tomora-kiŋdya lepeŋ i ema loki; gwoso na saŋi MATAT Mose nu.

Tito ti kemia aje tetena ajo

³² Nyenagon a kita liŋ na nu kemia torumet iŋge tutuŋö ajo sona; a Ŋutu ti Yisaraele iŋge koŋdya ŋo liŋ gwoso na sarakiŋdye MATAT Mose nu; iŋkoi, a se iŋge koŋdya.

³³ A lepeŋat joŋdi nu kemia ko Mose ni, kweja adi kemia ko tito kanyit liŋ, ko tokowesi kanyit, ko baulan kanyit, ko turya görosi kanyit, ko togwi ’diesi kanyit, ko gwo ’diesi kanyit;

³⁴ Ko muket nagon a gobero ti lopijoki nagon a ŋinya kune, ko muket na gobero ti kijakwa logon si ’da i pioŋ kata, ko boŋgo koret nagon a muket;

³⁵ ko saŋduk na ŋurupö tökoresi, ko turya kanyit, ko muket nagon toronjin lala kata na;

³⁶ ko misa ko tito kanyit liŋ, ko ambatajin na peta ko ŋun i komor;

³⁷ ko gwo ’diet lo lombojin logon a dakap lotulöŋ, ko lombojin kanyit logon a tiki nyin kase i piritön, ko tito kanyit liŋ se ko welet na tiŋdu parara;

³⁸ ko pirit ’yuret na bökur nagon a dakap, ko welet na welaki ’e Ŋutu i kita, ko bökur lo mon paleleŋ, ko muket na kötumit na kemia;

³⁹ ko pirit ’yuret na rubaŋgajin nagon a mölwö, se ko keyekeye nanyit nagon a mölwö, ko turya kanyit, ko tito kanyit liŋ, ko lalaet ko mukök nanyit;

⁴⁰ ko boŋgwat na leleyo nagon a ti mariŋ, ko togwi ’diesi kanyit, ko gwo ’diesi kanyit, ko boŋgo muket na kötumit na mariŋ, ko patala kanyit, ko kaleto kanyit, ko tito kitaesi liŋ ti kemia, kweja adi ti kemia torumet;

⁴¹ ko boŋgwat na gwegweya a namu-nyak nagon kitarikin i pirit nake na rurwan, kweja adi kine a boŋgwat nake na rurwan ti koane Arona, ko a boŋgwat ti ŋwajik kanyit anyen kita a koanejin.

⁴² Nyenagon a Ŋutu ti Yisaraele koŋdi ŋina kita liŋ gwoso i ŋo liŋ nagon MATAT a sarakin Mose kunu.

⁴³ A Mose ko meddi adi Ŋutu kulo aje koŋdya kita liŋ gwoso na saŋi MATAT nu, a nye ’boroji lepeŋat.