Yuörö 38 - Bibilia Buk na Ŋun nagon koti luŋu a

Tetena na pirit ’yuret na rubaŋgajin lo ’yu ’yura ’buluŋ

¹ A nye teteŋdi kaden ’bokolot a pirit ’yuret na rubaŋgajin lo ’yu ’yura ’buluŋ. Tojolan nanyit a lokiliŋan mukanat, ko tugalaŋ nanyit a lokiliŋan mukanat; a nye gwe jojo a regorego, a tojolan nanyit ki gwe a lokiliŋan musala.

² A nye tetenakiŋdye lepeŋ oŋgwora i goŋesi kanyit Iŋwan; a oŋgwora kanyit gwe a ŋo geleŋ ko lepeŋ, a nye muluje lepeŋ ko mölwö.

³ A nye teteŋdi tito liŋ ti pirit ’yuret na rubaŋgajin ko mölwö, kweja adi yekesi kanyit ti kurök, ko korekan kanyit, ko kalabajin kanyit, ko sowesi kanyit ti lokore, ko ta ’doka kanyit.

⁴ A nye tetenakiŋdye pirit ’yuret keyekeye nagon a mölwö; a nye tiŋdi lepeŋ i geŋet mukök a yeŋga tojo ko kiden nanyit ki.

⁵ A nye nitökiŋdye i nu keyekeye re Iŋwan nagon a mölwö i goŋesi kanyit Iŋwan, anyen turya suki nyin.

⁶ a nye teteŋdi kaden ’bokolot a turya, a muluje se ko mölwö.

⁷ A nye sukiŋdye turya i re na gwon i mara ti pirit ’yuret na rubaŋgajin kune, anyen ’dokorikin lepeŋ; a nye teteŋdi nye ko baulan a kölökiŋdye lukata nanyit kana.

Tetena na lalaet

⁸ A nye teteŋdi lalaet nagon a mölwö, a mukök nanyit gwe a mölwö. ŋina lalaet tetenwe i maŋöarajin nagon a mölwö ti Ŋutu wate na kita i kötumit na kemia torumet kune.

Mariŋ na kemia

⁹ A nye teteŋdi mariŋ; a boŋgwat kanyit na leleyo iŋge gweya ko waro na sirita a namin, a ririkörö nase gwe a lokiliŋan mia geleŋ i merete lo swöt lo loki;

¹⁰ a togwi ’diesi kase gwe a merya murek, ko gwo ’diesi kase merya murek logon a mölwö; ama a rekesi ti kulo togwi ’diesi ko re kase na dudukuki kune gwe a pödö.

¹¹ A i swöt lo lobot ririkörö nase liŋ gwe a lokiliŋan mia geleŋ, ko togwi ’diesi kase merya murek, ko gwo ’diesi kase merya murek logon a mölwö, ama a rekesi ti togwi ’diesi ko re kase na dudukuki kune gwe a pödö.

¹² A i swöt lo tokotyaŋ boŋgwat na leleyo ririkörö nase gwe a lokiliŋan merya mukanat, ko togwi ’diesi kase puök, ko gwo ’diesi kase puök; a rekesi ti togwi ’diesi se ko re kase na dudukuki kune gwe a pödö.

¹³ A i komor nanyit i swöt lo ’yure ririkörö nase gwe a lokiliŋan merya mukanat.

¹⁴ A boŋgwat na leleyo i swöt geleŋ lo kötumit kune ririkörö nase gwe a lokiliŋan puök wot mukanat, ko togwi ’diesi kase musala, ko gwo ’diesi kase musala.

¹⁵ A i lu swöt lo kötumit Köti gwe jojo; kweja adi boŋgwat na leleyo nagon ririkörö nase a lokiliŋan puök wot mukanat, ko togwi ’diesi kase musala, ko gwo ’diesi kase musala gwe i lo könin ko i lu könin lo kötumit na mariŋ.

¹⁶ A boŋgwat na leleyo liŋ nagon a mariŋ kune iŋge gweya ko waro na sirita a namin.

¹⁷ A gwo ’diesi ti togwi ’diesi kulo gwe a mölwö, ama rekesi ti kulu togwi ’diesi se ko re kase na dudukuki kune gwe a pödö; a kusik kase muluani ko pödö, a togwi ’diesi liŋ ti mariŋ iŋge dodoko ko re nagon a pödö.

¹⁸ A boŋgo muket na kötumit na mariŋ tetenani ko karipanit katokwelenyonit ko waro naŋem, ko na ’bule, ko nator, ko boŋgo nagon a tetena ko waro na sirita a namin; a jolan nanyit gwe a lokiliŋan merya murek, ko tugalap nanyit ki a lokiliŋan mukanat, jojo ko kunu boŋgwat na leleyo nagon a mariŋ kune.

¹⁹ A togwi ’diesi ti ŋina boŋgo muket gwe Iŋwan, ko gwo ’diesi kase Iŋwan logon a mölwö; a rekesi kase gwe a pödö, a kusik kase se ko re kase na dudukuki kune muluani ko pödö.

²⁰ A kaleto liŋ ti kemia ko ti mariŋ na lorga nye kune gwe a mölwö.

²¹ Sekine ŋo liŋ nagon tetena a ti kemia, kweja adi a ti kemia na ŋurupö tökoresi gwoso na sarakiŋdye Mose i kenet na ŋo liŋ nu. Kine ŋo a tiki Lewi-jin anyen kikitari, a Itamar ŋuro lo koane Arona lo meddi se.

²² A Besalela ŋuro lo Uri, ŋuro lo Kur lo kötumit na Yuda, iŋge teteŋdya ŋo liŋ nagon MATAT a sarakin Mose kune.

²³ A Oliaba ŋuro lo Akisamak, lo kötumit na Dan, logon a kaŋigirunit, ko a bodo, ko a karipanit katokwelenyonit logon ribba ko waro naŋem, ko na ’bule, ko nator, se ko boŋgo nagon a tetena ko waro na sirita a namin lo kitani ko lepeŋ i pirit na geleŋ.

Witiöt nagon tetenarikin pirit nake na rurwan

²⁴ A dakap liŋ na kikitarikin ŋina kita, i teteŋdya na pirit nake na rurwan liŋ nagon a dakap ’dokesi kune, temuŋdye a talentajin merya murek wot buŋwan ko sekelejin miajin buryo ko merya musala, gwoso i sekele na pirit nake na rurwan.

²⁵ A pödöjin na ’dumwe i Ŋutu logon a kena i nu momoret kune gwe a talentajin mia geleŋ ko sekelejin aliŋ geleŋ, ko miajin buryo ko merya buryo wot mukanat, gwoso i sekele na pirit nake na rurwan;

²⁶ adi beka geleŋ a swöt na sekele gwoso i sekele na pirit nake na rurwan, kweja adi Ŋutu liŋ logon a lapaddu i se logon aje kena kulo, ŋuto geleŋ aje ’dumuŋdya beka geleŋ. Ŋutu logon a kena kulo a aliŋan miajin buker ko musala ko miajin mukanat ko merya mukanat.

²⁷ A pödö nagon temuŋdya a talentajin mia geleŋ kune iŋge nitö a gwo ’diesi ti pirit nake na rurwan, ko a gwo ’diesi ti boŋgo koret; kweja adi gwo ’diesi mia geleŋ iŋge nitwe i pödö talentajin mia geleŋ; gwo ’diet geleŋ nitwe i pödö talenta geleŋ.

²⁸ A nye niddye pödö nagon temuŋdya a sekelejin aliŋ geleŋ ko miajin buryo ko merya buryo wot mukanat kune a rekesi ti togwi ’diesi, a muluje kusik kase, a dukukiŋdye se ko re.

²⁹ A mölwö ’dokesi kune temuŋdye a talentajin merya buryo, ko sekelejin aliŋan murek ko miajin Iŋwan.

³⁰ A nye teteŋdi se a gwo ’diesi ti kötumit na kemia torumet, a teteŋdi a pirit ’yuret na rubaŋgajin nagon a mölwö, ko keyekeye nanyit nagon a mölwö, se ko tito liŋ ti nu pirit ’yuret,

³¹ ko gwo ’diesi ti mariŋ, ko gwo ’diesi ti kötumit na nu mariŋ, ko kaleto liŋ ti kemia, se ko kaleto liŋ ti mariŋ nanyit.