Yuörö 36 - Bibilia Buk na Ŋun nagon koti luŋu a

¹ A Besalela ko Oliaba se ko Ŋutu liŋ logon a lokoŋ i kita kulo mo kitani kita, gwoso i ŋo liŋ nagon MATAT a sarakin kune, kogwon MATAT a tokoŋgu se ko kuruŋdyö i deŋdya na kita tetenet na pirit nake na rurwan ko ködyö gwegweya ada.

Ŋutu a yekuŋdya ’dokesi jore lwölwöŋgu

² A Mose luŋgi Besalela ko Oliaba se ko Ŋutu liŋ logon a lokoŋ i kita, logon MATAT a tokoŋgu, kweja adi se liŋ logon töilyet kase a toŋiju se i ŋo i koŋdya na nu kita kulo;

³ a se wuyuŋdye ko Mose i könin ’dokesi liŋ ti tupalikan na töili nagon Ŋutu ti Yisaraele aje jon anyen kitarikin pirit nake na rurwan kune. Nyenagon a Ŋutu kulo yeŋe yekakiŋdya lepeŋ ’dokesi ti tupalikan na töili temba i ko ’bure.

⁴ Nyena a Ŋutu lokoŋ liŋ logon koŋdya kitajin liŋ ka ’de ka ’de i pirit nake na rurwan kulo iŋge ŋo, ŋadi kö ’yu kita nanyit,

⁵ a se kulyani ko Mose adi, Kilo Ŋutu yekuŋdya ŋo jore lwölwöŋ nagon kitarikin kita nagon MATAT a sarakin i kona na.

⁶ A Mose tiŋdi saret, a ŋilo saret laikine i mera ’bukuluŋ, adi ti Ŋutu liŋ lulyan ko nawate gwe ti teteŋdya kunie ŋo Köti a ’dokesi ti pirit nake na rurwan. Nyena a kulu Ŋutu iŋge teŋo sona i yekuŋdya;

⁷ kogwon tito na gwon ko lepeŋat kune a temakiŋdya i kitarikin na nu kita liŋ, ko a lwöŋgu Köti.

Tetena na kemia (Köti Yuörö 26.1-37)

⁸ A Ŋutu logon a lokoŋ i kita i kiden na Ŋutu logon koŋdya nu kita kulo teteŋdi kemia ko boŋgwat puök; kine boŋgwat gweya ko waro na sirita a namin, ko waro naŋem, ko na ’bule, ko nator nagon bodo karipanit a ripakin ŋöjinö ti kerubajin nyin.

⁹ Tojolan na boŋgwat liŋ geleŋ geleŋ gwon a lokiliŋan merya murek wot budök, ko tugalaŋ nase liŋ geleŋ geleŋ gwon a lokiliŋan Iŋwan; boŋgwat liŋ gwon ko temet na geleŋ.

¹⁰ A nye totomori boŋgwat mukanat i pirit na geleŋ nene ko nene; a kunie mukanat kune Köti tomorakine i pirit na geleŋ nene ko nene.

¹¹ A nye tetenakiŋdye tupesi ti boŋgo naŋem a ŋuŋukatu, a ripaki i kutuk na boŋgo na ’dutet na kine boŋgwat mukanat kune; a nye tetenakiŋdye tupesi ti boŋgo naŋem a ŋuŋukatu, a ripaki i kutuk na boŋgo na ’dutet na kunie boŋgwat kune.

¹² Kweja adi nye a teteŋdya tupesi merya mukanat ti boŋgo na ŋuŋ ukatu, a ripaki i kutuk na boŋgo geleŋ, a nye teteŋdi tupesi merya mukanat ti boŋgo a ŋuŋukatu, a ripaki i kutuk na boŋgo na gwon i ’dutet na boŋgo tomurek na; a kine pukesi todire a lo pelela.

¹³ A nye teteŋdi tokowesi merya mukanat nagon a dakap, a tomori kine boŋgwat ko tokowesi, nene ko nene, anyen boŋgwat ti kemia gwon a ŋo geleŋ.

¹⁴ A nye teteŋdi kupir ti yidin a boŋgwat mukesi anyen muggö kemia. boŋgwat na teten nye kune gwon a puök wot geleŋ.

¹⁵ A tojolan na boŋgwat liŋ geleŋ geleŋ gwe a lokiliŋan merya musala, a tugalaŋ nase gwe a lokiliŋan Iŋwan; a kine boŋgwat puök wot geleŋ gwe ko temet na geleŋ.

¹⁶ A nye tomori boŋgwat mukanat ka ’de, ko kunie boŋgwat buker ka ’de.

¹⁷ A nye teteŋdi tupesi ti boŋgo merya mukanat a ŋuŋukatu, a ripaki i kutuk na boŋgo na gwon i ’dutet na boŋgo togeleŋ na, a nye teteŋdi tupesi ti boŋgo merya mukanat a ŋuŋukatu, a ripaki i kutuk na boŋgo tomurek.

¹⁸ A nye teteŋdi tokowesi merya mukanat nagon a mölwö, anyen tomorakiŋdya kemia i pirit na geleŋ anyen gwon a ŋo geleŋ.

¹⁹ A nye teteŋdi gobero ti lopijoki nagon a pinya kune a nene muket na kemia, ko nene muket Köti a gobero ti kijakwa logon si ’da i pioŋ kata kulo anyen muggö lepeŋ.

²⁰ A nye teteŋdi baulan nagon a ’bokolot anyen gwo ’dan ki a ti kemia.

²¹ A tojolan na bau geleŋ gwe a lokiliŋan puök, a tugalap nase geleŋ geleŋ gwe a lokiliŋ geleŋ ko swöt.

²² A baulan liŋ geleŋ geleŋ gwe ko mokosi murek murek a tomoresi; a nye koŋdi sona i baulan liŋ ti kemia.

²³ A nye teteŋdi baulan ti kemia sona, kweja adi baulan merya murek a ti merete i swöt lo loki.

²⁴ A nye teteŋdi gwo ’diesi merya Iŋwan logon a pödö anyen gwon i mukök na kunu baulan merya murek; kweja adi gwo ’diesi murek i mukök na bau geleŋ anyen kilo mokosi murek suki kata, gwo ’diesi murek i mukök na bau geleŋ anyen kilo mokosi murek suki kata;

²⁵ a nye teteŋdi baulan merya murek a ti merete tomurek lo kemia i swöt lo lobot,

²⁶ ko gwo ’diesi kase merya Iŋwan logon a pödö, gwo ’diesi murek i mukök na bau geleŋ, murek i mukök na bau geleŋ.

²⁷ a nye teteŋdi baulan buker a ti buŋ ki ’diŋ na kemia i swöt lo tokotyaŋ.

²⁸ A nye teteŋdi baulan murek a ti gopesi murek ti kemia i buŋ ki ’diŋ nanyit.

²⁹ A nye gwe a ko tomora kak yu, ama ki totomora, suluja i reyat na kokwe; a nye koŋdi sona i se murek liŋ i kulu gopesi murek.

³⁰ Kweja adi baulan kata budök, ko gwo ’diesi kase logon a pödö kulo gwe a gwo ’diesi puök wot buker; kweja adi gwo ’diesi murek i mukök na bau geleŋ, murek i mukök na bau geleŋ.

³¹ A nye teteŋdi turya görösi logon a kaden ’bokolot; turya mukanat a ti merete geleŋ lo kemia,

³² kulye mukanat a ti lele merete lo ŋina kemia, ko kulye mukanat Köti a ti ŋina kemia i buŋ ki ’diŋ i swöt lo tokotyaŋ.

³³ a nye teteŋdi ture lo kiden i tulöddu i kiden na baulan, suluja i nene ’dutet tojo i nene ’dutet.

³⁴ a nye muluje kine baulan ko dakap, a teteŋdi re kase ko dakap anyen turya görösi suki kata; a nye muluje kilo turya ko dakap.

³⁵ A nye teteŋdi waro naŋem, ko na ’bule, ko nator, se ko boŋgo na tetena ko waro na sirita a namin kune a boŋgo koret; a nye ripakiŋdye pöjinö ti kerubajin nyin nagon bodo karipanit lo ribba.

³⁶ a nye tetenakiŋdye ŋina boŋgo koret togwi ’diesi Iŋwan logon a kaden ’bokolot, a muluje se ko dakap; a rekesi kase gwe a dakap, a nye nitö-kiŋdye se gwo ’diesi Iŋwan logon a pödö.

³⁷ A nye Köti teteŋdi boŋgo muket na kötumit na kemia, ko waro naŋem, ko na ’bule, ko nator, se ko boŋgo nagon a tetena ko waro nagon a sirita a namin, nagon a kita na karipanit katokwelenyonit;

³⁸ se ko togwi ’diesi kanyit mukanat ko rekesi kase; a nye muluje kusik kase se ko re kase na dudukuki kune ko dakap; a gwo ’diesi kase mukanat gwe a mölwö.