Yuörö 35 - Bibilia Buk na Ŋun nagon koti luŋu a

Saresi i kulya ti ’depa na sabata

¹ A Mose momori Ŋutu liŋ ti Yisaraele i pirit na geleŋ, a kulyani ko lepeŋat adi, Kulo a kulyaesi logon MATAT a sarakin ta i koŋdya na lepeŋat.

² Adi kita ködyo kökona ko perok buker, ama i lor toburyo lonyit ta ködyö gwon ko sabata loke logon a yukaet gwak lo MATAT; ko ŋa lo koŋdya nene kita i ŋilo lor a ti nye tatuani tatua.

³ Ta ködyö ti mokakin-dya kimaŋ kwöŋ kasu i piritön si ’daesi liŋ i lor lo sabata.

’Dokesi na ’dokari MATAT

⁴ A Mose kulyani ko momoret na Ŋutu ti Yisaraele liŋ adi, Kune a ŋo nagon MATAT a sarakin adi,

⁵ Ta liŋ ködyö ’dumuŋdya ’dokesi na ’dokari MATAT; ko ŋa logon ko tupalikan na töili a ti lepeŋ joŋdi ’doket na MATAT, kweja adi dakap, ko pödö, ko mölwö;

⁶ ko waro naŋem, ko na ’bule, ko nator, ko boŋgo na tetena ko waro pisite na sirita a namin, ko kupir ti yidin,

⁷ ko gobero ti lopijoki nagon a ŋinya, ko gobero ti kijakwa lo si ’da i pioŋ kata; ko kaden ’bokolot,

⁸ ko welet na lombojin, ko kwakwa ti kaden na mon ’bura nagon a ti welet nagon welari Ŋutu lo kitakiŋdya MATAT kulo, ko a ti bökur lo mon paleleŋ,

⁹ ko ŋurupö nakwekwelen nagon a berilo, se ko ŋurupö nagon jojo to ’depaki a tokwelenyesi ti eŋoda ko ti muket na kido.

Tito ti kemia (Köti Yuörö 39.32-43)

¹⁰ Ti Ŋutu liŋ kasu kiden logon a lokoŋ i kita. kulo ti se ŋoŋdi i teteŋdya na ŋo liŋ nagon MATAT a sarakin kune;

¹¹ kweja adi i teteŋdya na kemia, ko boŋgwat kanyit, ko mukesi ti ŋina kemia, ko tokowesi kanyit, ko baulan kanyit, ko turya kanyit görösi, ko togwi ’diesi kanyit, ko gwo ’diesi kanyit;

¹² ko saŋduk ko turya kanyit, ko muket nagon toronjin lala kata na, ko boŋgo koret nagon a muket;

¹³ ko misa ko turya kanyit, ko tito kanyit liŋ, se ko ambatajin na peta ko Ŋun i komor;

¹⁴ ko gwo ’diet lo lombojin anyen papararaju, ko tito kanyit, ko lombojin kanyit, ko welet na tiŋdu parara;

¹⁵ ko pirit ’yuret na bökur se ko turya kanyit, ko welet na welaki ’e Ŋutu i kita, ko bökur lo mon paleleŋ, ko boŋgo muket na gwon i kötumit na kemia na;

¹⁶ ko pirit ’yuret na rubaŋgajin lo ’yu ’yura ’buluŋ, ko keyekeye nanyit nagon a mölwö, ko turya kanyit, ko tito kanyit liŋ, ko lalaet ko mukök nanyit;

¹⁷ ko boŋgwat na leleyo a mariŋ, ko togwi ’diesi kase ko gwo ’diesi kase, ko boŋgo muket na kötumit na mariŋ;

¹⁸ ko kaleto ti kemia, ko kaleto ti mariŋ ko nekenejin kase;

¹⁹ ko boŋgwat na gwegweya a nakwekwelen nagon kitarikin i pirit nake na rurwan, ko boŋgwat nake na rurwan ti koane Arona, se ko boŋgwat ti ŋwajik kanyit anyen kita a koanejin.

Ŋutu a joŋdya ’dokesi

²⁰ A momoret liŋ na Ŋutu ti Yisaraele ŋiörö kaŋo ko Mose i komor.

²¹ A Ŋutu liŋ logon töilyet kase a toŋiju se ko se liŋ logon ködu dwölön kase ’de ’deggi tiŋdu kulo ŋoŋdi ŋo, jakiŋdya MATAT ’dokesi, anyen kitarikin i kemia torumet, ko a ti kita nanyit liŋ, Köti anyen kitarikin boŋgwat nake na rurwan.

²² Nyena a Ŋutu liŋ logon töilyet kase ’de ’deggi kulo ŋoŋdi ŋo i pirit na geleŋ, lulyan ko nawate, joŋdya tokowesi minyojin, ko re ti swö, ko katiman nagon jokaki ’e gwuluet, ko re ti könisi, kweja adi gweyarijin ti minyojin liŋ nagon a dakap, a Ŋutu liŋ geleŋ geleŋ wukiŋdye MATAT ’dokesi nagon a dakap.

²³ A Ŋutu liŋ logon kata ko waro naŋem, ko na ’bule, ko nator, ko boŋgo nagon a tetena ko waro na sirita a namin, ko kupir ti yidin, ko gobero ti lopijoki nagon a ŋinya, ko gobero ti kijakwa lo si ’da i pioŋ kata kulo, joŋdi joŋdya.

²⁴ A Ŋutu liŋ geleŋ geleŋ logon a ’dumuŋdya ’doket nagon a pödö ko mölwö kulo joŋdi se a ’dokesi ti MATAT; Köti Ŋutu liŋ logon kata ko kaden ’bokolot logon jojo kitarikin i ŋina kita kulo joŋdi se.

²⁵ A wate liŋ nagon a nakoŋ i kita kune wiwije ko könisi kase, a joŋdi waro na wiwi se kune, kweja adi waro naŋem, ko na ’bule, ko nator, ko boŋgo nagon a tetena ko waro na sirita a namin;

²⁶ a wate liŋ nagon a nakoŋ i kita kune pakiŋdye ’börik i wiwijö na kupir ti yidin.

²⁷ A Ŋutu temejik joŋdi ŋurupö nakwekwelen nagon a berilo, ko ŋurupö nagon jojo to ’depaki a tokwelenyesi ti eŋoda ko ti muket na kido,

²⁸ ko kwakwa ti kaden na mon ’bura, ko welet na tiŋdu parara, ko welet na welaki ’e Ŋutu i kita, se ko bökur lo mon paleleŋ.

²⁹ A Ŋutu liŋ ti Yisaraele geleŋ geleŋ lulyan ko nawate, logon töilyet kase a toŋiju se kulo jakiŋdye MATAT ’dokesi ti tupalikan na töilyet, anyen kitarikin kita liŋ nagon MATAT a sarakin ko Mose i kutuk i kona na.

Luŋu na Besalela ko Oliaba

³⁰ A Mose kulyani ko Ŋutu ti Yisaraele adi, Mete ta, MATAT aje luŋgu Besalela ŋuro lo Uri, ŋuro lo Kur lo kötumit na Yuda ko karin kanyit;

³¹ a nye iŋge tojoreju lepeŋ ko Mulökötyo lo Ŋun, i koŋon ko i kuruŋdyö, ko i deŋdya na kitajin liŋ ti bodo;

³² ko i yeyeju na tobodwan nakoŋ, anyen kitarikin dakap, ko pödö, ko mölwö,

³³ ko i tutuŋu na ŋurupö nakwekwelen nagon jojo to ’depaki, ko i gigiŋu na kaden, anyen kikitarikin i gweyarijin liŋ ti tobodwan.

³⁴ A nye iŋge tiŋdu lepeŋ se ko Oliaba ŋuro lo Akisamak lo kötumit na Dan töilyet lo ’but, anyen se ködyö todinikiŋdyö Ŋutu kita.

³⁵ A nye iŋge tojoreju lepeŋat ko koŋon kitaet anyen kita gweyarijin liŋ ti kita, kweja adi kita na kaŋigirunit, ko na bodo, ko na karipanit katokwelenyonit logon ribba ko waro naŋem, ko na ’bule, ko nator, ko boŋgo nagon a tetena ko waro na sirita a namin, ko na kaŋweyanit lo boŋgwat — kode na lon kakitanit, kode a na lon bodo.