Yuörö 33 - Bibilia Buk na Ŋun nagon koti luŋu a

Lepeŋat a saraki i ŋiorö kaŋo

¹ A MATAT kulyani ko Mose adi, Do se ko kilo Ŋutu logon do aje jon kaŋo i jur lo Ejipeto kulo, ŋiörö ta kaŋo, iti ta tojo i jur logon nan a milyekin tiŋdu Abarayama, ko Yisaka, ko Yakobo lu adi, ’Diri ’diri nan mo titin nyakwariat kasu.

² A nan mo sonyoddi malaikatat konut ŋerot; a nan mo riköddi Ŋutu ti Kanana kaŋo, ko Ŋutu ti Amori, ko ti Kiti, ko ti Periji, ko ti Kiwi, se ko ti Yebusi.

³ Iti ta tojo ko jur logon ko le ko siwatat ’do ’dokon kata lu; kogwon nan mo ti moraddu ko ta; kogwon ta a Ŋutu logon ko murutö a nawo ’duŋak, an nan ko tukaŋu ta i kiko.

⁴ A nagon Ŋutu kulo ko yiŋge lo lore loron, a se delyani delya a lele ŋuto gwe ’bayin lo jupukiŋdya minyojin kanyit.

⁵ A MATAT kulyani ko Mose adi, Taki Ŋutu ti Yisaraele adi, Ta a Ŋutu logon ko murutö a nawo ’duŋak; ko nan ködyö a moraddu ko ta ko diŋit a na ’dit döŋdi, a nan ködyö tukaŋi ta; nyenagon soŋinana rösöddi ta minyojin kasu kaŋo, anyen nan kukurun ko nan konakin ta nyo.

⁶ Nyena a Ŋutu ti Yisaraele ’dumaddi minyojin kase kaŋo a wöröni kana suluja i mere Orebe tojo ko ŋerot.

Kemia torumet

⁷ Ama a Mose yeŋe ’dumaddu kemia ko i ’bikikiŋdyö na lepeŋ kaŋo i mera, pajo ko mera; a nye gwije lepeŋ a kemia torumet. A ko gwe sona, a Ŋutu liŋ logon ga ’yu MATAT kilo iti kaŋo tojo ko kemia torumet na gwon kaŋo i mera na.

⁸ Nyena na tiri Mose kaŋo tojo i kemia nu, a Ŋutu liŋ ŋine ki a gwo ’de gwo ’dan, ŋadi kanyit i kötumit na kemia nanyit metaddu Mose tojo nye a lupö i kemia lukata.

⁹ A ko gwe sona, na lupöri Mose i kemia lukata nu, a bilili lo luru ŋoŋdi kak a gwo ’de gwo ’dan i kötumit na kemia na, a MATAT jambi ko Mose.

¹⁰ A na meddi Ŋutu liŋ lu luru i gwo ’dan i kötumit na ŋina kemia nu, a Ŋutu liŋ ŋine ki a rosokakine kak rupu, Ŋutu liŋ geleŋ geleŋ ŋadi i kötumit na kemia nanyit.

¹¹ A MATAT jambi ko Mose a lokomor gwoso na jambi ŋuto ko ju lonyit na. A Mose yitöni bot i mera, ama a köliŋönit lonyit Yosua ŋuro lo Nun logon a titinti lo tine kö ’yu ŋinu kemia.

MATAT a ruk adi nye mo tu ko Mose i pirit na geleŋ

¹² A Mose kulyani ko MATAT adi, Mete, do a kulya ko nan adi, Joŋdi kilo Ŋutu kaŋo; a do gwe a ko tokurukiŋdyö nan nye logon do sonyoro ko nan i pirit na geleŋ lo. Ama a do aje kulya adi, Nan a den do ko karin, a do Köti iŋge ryö ’busan köyö i komor.

¹³ Nyenagon soŋinana, böŋö ko nan a ryo ’busan konut i komor, a ti do böŋö kweki nan kikolin kulök i na diŋit, anyen nan bubulö deŋdya do, anyen nan böŋö ryeŋdu ’busan konut i komor. Köti meddi ’bura adi na kötumit gwon a Ŋutu kulök.

¹⁴ A MATAT kulyani adi, Nan ko mugun nio mo tu ko do a nan mo tiŋdi do i gwon taliŋ.

¹⁵ A Mose kulyani ko lepeŋ adi, Ko do ko mugun inot ti tu ko nan, an do ko barara yi ŋerot kwöŋ.

¹⁶ Kogwon mo dena ada adi nan se ko Ŋutu kulök a ryö ’busan konut i komor? Ŋutu mo deŋdya adi do a lyöŋön koyi kogwon do a moraddu koyi, ’bayin sona le? Nyena a yi mo gelwene ka ’de, nan ko Ŋutu kulök i kiden na Ŋutu liŋ lo gwon i na kak kulo.

¹⁷ A MATAT kulyani ko Mose adi, Nan mo koŋdya na ŋo gwak na kulyari do na; kogwon do a ryö ’busan köyö i komor, a nan deŋdi do ko karin kunök.

¹⁸ A Mose mo ’yi adi, Böŋö kweki nan minyo ilot.

¹⁹ A MATAT waddi adi, Nan tiŋdu löti liŋ lo rigwo liŋ i lwöpöddu konut i komor, a nan tuŋge karin kwe ti MATAT konut i komor; nan gwon ko töili lo lilik ko ŋuto logon nan ’dek gwon ko töili lo lilik ko nye lo, a nan yatakiŋdye ŋuto logon nan ’dek yatakiŋdya lo.

²⁰ A MATAT kulyani adi, Do ti bulö meddya komor nio; kogwon ŋuto mo ti met nan a gwe jörun.

²¹ A MATAT kulyani adi, Mete, pirit kata köyö nyona, a do gwo ’de gwo ’dan i lurutat loki;

²² a mo gwe sona adi na wöröji ’e minyo liŋ ni na, a nan mo tiŋdi do i kwake na lurutat, a nan mo muŋge do ko könin liŋ tojo nan a lwöpöddu;

²³ a nan mo nyökuŋdye könin liŋ bot, a do mo meddi ki ’diŋ nio; ama komor nio ti meta kwöŋ.