Yuörö 31 - Bibilia Buk na Ŋun nagon koti luŋu a

Luŋu na Besalela ko Oliaba

¹ A MATAT kulyani ko Mose adi,

² Mete, nan aje luŋgu Besalela ŋuro lo Uri, ŋuro lo Kur, lo kötumit na Yuda ko karin kanyit.

³ A nan iŋge tojoreju lepeŋ ko Mulökötyo liŋ lo ŋun, i koŋon, ko i kuruŋdyö na kulya, ko i deŋdya na kitajin liŋ ti bodo,

⁴ i yeyeju na tobodwan nakoŋ, anyen kitarikin dakap, ko pödö, se ko mölwö,

⁵ ko i tutuŋu na ŋurupö nakwekwelen nagon jojo to ’depaki, ko i gigiŋu na kaden, anyen kikitarikin i gweyarijin liŋ ti kita.

⁶ Köti mete, nan a wulökin-dyö Oliaba ŋuro lo Akisamak lo kötumit na Dan anyen kita ko lepeŋ i pirit na geleŋ; Köti nan a tiŋdu tomi-rian ko Ŋutu liŋ logon a lokoŋ i kita kulo, anyen se böŋö bubulö teteŋdya ŋo liŋ nagon nan a sarakin do kine.

⁷ Kine ŋo na tetena kune ködyö gwon a kemia torumet, ko saŋduk na ŋurupö tökoresi, ko muket nagon toronjin lala kata na muggö lepeŋ na, ko tito liŋ ti kemia,

⁸ ko misa ko tito kanyit, ko gwo ’diet lotulöŋ lo lombojin ko tito kanyit liŋ, ko pirit ’yuret na bökur,

⁹ ko pirit ’yuret na rubaŋgajin lo ’yu ’yura ’buluŋ ko tito kanyit liŋ, ko lalaet ko mukök nanyit,

¹⁰ ko boŋgwat na gwegweya a nakwekwelen, nagon a boŋgwat nake na rurwan ti koane Arona, ko boŋgwat ti ŋwajik kanyit, anyen kita a koanejin;

¹¹ ko welet na wewelarikin, se ko bökur lo mon paleleŋ. Kilo ŋo liŋ a ti pirit nake na rurwan. Ti lepeŋat koŋdi ŋo liŋ gwoso na saŋi nan do na.

’Debba na lor lo sabata a kweyet

¹² A MATAT kulyani ko Mose adi,

¹³ Taki Ŋutu ti Yisaraele adi, Ta ködyö ’de ’deŋ sabatajin kwe ’bura, kogwon ŋina a kweyet i kiden nikaŋ ko ta i nyakwariat kasu liŋ, anyen böŋö dedena adi nan lo gwon a MATAT logon a geluŋdya ta kaŋo a loke lo.

¹⁴ Nyenagon ’debbi ta sabata kogwon nye a loke kasu; Ŋutu liŋ logon köŋu sabata kulo ködyö ’diri tatatua, kogwon ko ŋa lo koŋdya nene kita i sabata a ŋilo ŋuto ’duŋöjine kaŋo i Ŋutu kanyit.

¹⁵ Kita ködyö kona ko perok buker, ama i lor toburyo lonyit a gwe a sabata yukaet gwak, a loke lo MATAT; ko ŋa lo koŋdya nene kita i lor lo sabata a ti nye tatuani tatua.

¹⁶ A Ŋutu ti Yisaraele ködyö ’debbi sabata, i tiju na sabata temba i nyakwariat kase liŋ a tomoret nagon ti ’baka.

¹⁷ A sabata gwe a kweyet ŋupi i kiden nikaŋ ko Ŋutu ti Yisaraele, kogwon MATAT a gweja ko ki ko kak i perok buker, a i lor toburyo a nye gwo ’de gwo ’dan i kita, a yuke yukan.

Tagwok nagon a dakap

¹⁸ A na tutuŋge MATAT i jambu ko Mose i mere Sinai ki nu, a nye tiŋdi lepeŋ go ’boro murek nagon a tökoresi nagon a ŋurupö na ’dayatak, kine ŋurupö ŋun a wur ko morinet lonyit.