Yuörö 29 - Bibilia Buk na Ŋun nagon koti luŋu a

’Boroki na Arona se ko ŋwajik kanyit

¹ Nyena na a ŋo nagon do ködyö konakiŋdya i se i gelun-dya na se, anyen se böŋö kitakiŋdya nan a koanejin. ’Dumuŋdye dwöt geleŋ logon a lo ’dit ko lopijoki murek logon ’bak yuyukesi,

² ko ambata nagon ’bak kape, ko ambatajin nagon ’bak kape ko a ŋola ko welet kune, ko kisera nagon ’bak kape ko a welaki welet loki kune. A do teteŋdi se ko ’bolot na jiŋ a naliliŋök.

³ A do sopa-kiŋdye lepeŋat i kuŋo geleŋ lukata, a joŋdi lepeŋat i lu kupö, a do joŋdi dwöt se ko lopijoki murek.

⁴ A do joŋdi Arona se ko ŋwajik kanyit tojo i kötumit na kemia torumet, a do tukwöji lepeŋat ko pioŋ.

⁵ A do ’dumuŋdye kune boŋgwat, a tojubbi Arona ko jölöbiya, ko boŋgo muit nagon eŋoda a toraki nyin na, ko eŋoda, ko muket na kido, a do dukukiŋdye lepeŋ kamba na eŋoda na gweya ko tobodwan;

⁶ a do sukiŋdye ema kanyit i kwe, a do tiŋdi Iŋguya loke i nu ema loki.

⁷ a do ’dumuŋdye welet na welaki ’e Ŋutu i kita, a do ’buŋge kanyit i kwe, i welakiŋdya na lepeŋ.

⁸ A kirut do joŋdi ŋwajik kanyit, a tojubbi lepeŋat ko jölöbiyajin,

⁹ a do dukukiŋdye lepeŋat kambajin, a do torakiŋdye lepeŋat töröbusijin, a to-koanan ködyö gwe a na lepeŋat kogwon saret lo wurö anyen yeyeŋon ŋupi. Do ködyö ’börökiŋdya Arona ko ŋwajik kanyit sona.

¹⁰ A do joŋdi dwöt i komor na kemia torumet. A Arona se ko ŋwajik kanyit sopakiŋdye könisi kase ko ŋilo dwöt i kwe.

¹¹ A do ’duŋge dwöt ko MATAT i komor, i kötumit na kemia torumet.

¹² A do ’dumuŋdye kunie rima ti dwöt, a do ’bulukiŋdye se i oŋgwora ti pirit ’yuret na rubaŋgajin ko morinet ilot; a do ’bukökiŋdye kunie rima na pituŋdyö kune i mukök na pirit ’yuret na rubaŋgajin.

¹³ A do ’dumuŋdye welet liŋ na röbbu monyet, se ko pilya na munyet, se ko puleŋa murek, ko welesi na gwon ko lepeŋat kune, a do ’yuŋe lepeŋat i pirit ’yuret loki.

¹⁴ Ama do ködyö ’yuŋa lokore na dwöt ko gober lonyit, ko moyok kanyit ko kimaŋ i mera kaŋo; ŋilo a rubaŋga lo toron.

¹⁵ A do Köti ’dumuŋdye lele lo kilo lopijoki, a Arona ko ŋwajik kanyit sopakiŋdye könisi kase ko lopijot i kwe,

¹⁶ a kirut do ködyö ’duŋge lopijot, a do ’dumuŋdye rima kanyit, a ŋoka-kiŋdye se i mara ti pirit ’yuret na rubaŋgajin.

¹⁷ A do gögöŋdi ŋilo lopijot, a lalaji monyet kanyit ko ŋutukujin kanyit, a sopakiŋdye lepeŋat ko gonyesi kanyit se ko kwe nanyit i pirit na geleŋ,

¹⁸ a do ’yuŋe lopijot liŋ i ŋina pirit ’yuret na rubaŋgajin; ŋilo a rubaŋga lo ’yuraki MATAT ’buluŋ; nye a ŋo na mon paleleŋ nagon ’yuraki MATAT.

¹⁹ A do ködyö ’dumuŋdye lele lopijot; a Arona ko ŋwajik kanyit sopakiŋdye könisi kase ko lopijot i kwe,

²⁰ a kirut do ’duŋge lopijot, a ’dumuŋdye kunie rima kanyit, a sekiŋdye i kaböbö-löŋti na swöt lo Arona lo lutaten, ko i kaböbölöŋön ti swö ti ŋwajik kanyit lutatenyan, ko i morin dumalak ti könisi kase lutatenyan, ko i morin dumalak ti mokosi kase lutatenyan, a do ŋokakiŋdye pitönö ti rima i mara ti pirit ’yuret na rubaŋgajin.

²¹ A kirut do ’dumuŋdye kunie ti rima na gwon i pirit ’yuret loki kune, se ko nene welet na wewelaki ’e, a do gwatakiŋdye se ko Arona ko i boŋgwat kanyit, ko i ŋwajik kanyit, ko i boŋgwat ti ŋwajik kanyit ko lepeŋ i pirit na geleŋ; a nye se ko boŋgwat kanyit kune mo gelwene a loke, se ko ŋwajik kanyit ko boŋgwat kase ko lepeŋ i pirit na geleŋ.

²² A do Köti ’dumuŋdye welesi ti lopijot, se ko kotet nagon a welet na, ko welet na röbbu monyet, ko pilya na munyet, ko puleŋa murek, ko welesi kase, se ko nyuti lo lutaten (kogwon ŋilo a lopijot ’boriet),

²³ ko ambata geleŋ, ko ambata nagon a ŋola ko welet, ko kisera geleŋ, na ’dumwe kaŋo i kupö lo ambatajin nagon ’bak kape na gwon ko MATAT i komor kune;

²⁴ a do ködyö tiŋdi kine ŋo liŋ ko Arona i ’dapan ti könisi ko i ’dapan ti könisi ti ŋwajik kanyit, a do kweji se a rubaŋga lo kwekweya ko MATAT i komor.

²⁵ a kirut do ’dumuŋdye se kase i könisi, a ’yuŋe se i pirit ’yuret na rubaŋgajin i rubaŋga lo ’yu ’yura ’buluŋ loki, anyen möara paleleŋ ko MATAT yu; ŋilo a rubaŋga lo ’yuraki MATAT.

²⁶ A do ködyö ’dumuŋdye jujuk na lopijot lo ’boroki ’e Arona lo, a kweji lepeŋ a rubaŋga lo kwekweya ko MATAT i komor; a nye gwe a koret inot.

²⁷ A do geluŋdye jujuk na rubaŋga lo kwekweya se ko nyuti lo ’dumwe logon a lo koanejin, logon kwekweya lo, logon a ’dumwe i lopijot ’boriet, kweja adi ŋilo a lopijot logon ’boroki ’e Arona se ko ŋwajik kanyit.

²⁸ A nye ködyö gwe a lo Arona ko ŋwajik kanyit a koret na yeŋ nyin na Ŋutu ti Yisaraele; kogwon nye a ’doket na ’dumwe na wukin Ŋutu ti Yisaraele i ’dupesi ti rubaŋgajin kase ti taliŋ, iŋkoi, a ’doket nagon se a tin MATAT.

²⁹ A boŋgwat nake na rurwan ti Arona ködyö gwe a ti ŋwajik kanyit, kanyit i mukök, i welaki ’e nase ko i ’boroki ’e nase.

³⁰ a lu ŋuro logon ruddya tokoaŋan nanyit lo mo jupuni kine boŋgwat ko perok buryo, i diŋit na lupöri nye i kemia torumet i kita i pirit nake na rurwan nu.

³¹ A do ’dumuŋdye lopijot ’boriet, a deŋi lokore nanyit i nene pirit nake na rurwan;

³² a Arona ko ŋwajik kanyit ködyö nyesi lokore na lopijot ko ambata na gwon i kupö i kötumit na kemia torumet nu.

³³ a se nyesi ŋo nagon a tokelarikin se kune, i ’boro-kiŋdya na se ko i geluŋdya na se a loke, ama a lwakatyo tine bulö nyesu lepeŋat kogwon se a nake na rurwan.

³⁴ a ko nene pitönö na lokore ’boriet, kode na ambata na a pituŋdyö tojo ko ko ’bure, a do ködyö ’yuŋe pitönö na ko kimaŋ; a nye tine nyei, kogwon nye a na rurwan.

³⁵ A do konakiŋdye Arona sona se ko ŋwajik kanyit, gwoso i ŋo liŋ nagon nan a sarakin do kune; a do ’boro-kiŋdye se i perok buryo.

³⁶ Temba i lor a do ködyö tiŋdi dwöt a rubaŋga tokelet lo toron. A na tiŋdi do lu rubaŋga tokelet nu, a do gwe i toke ’ya na pirit ’yuret na rubaŋgajin, a do welakiŋdye lepeŋ i geluŋdya na lepeŋ a nake na rurwan.

³⁷ a do toke ’yi pirit ’yuret na rubaŋgajin ko perok buryo, i geluŋdya na lepeŋ a nake na rurwan, a pirit ’yuret na rubaŋgajin ködyö gwe a nake parik na rurwan; a ŋo liŋ logon a ’bo ’yu pirit ’yuret na rubaŋgajin kulo gelwene kaŋo a loke.

Rubaŋgajin lo wuki temba i lor

³⁸ Nyenagon kine a ŋo nagon do ködyö wuwukin i pirit ’yuret na rubaŋgajin loki; kweja adi do wukiŋdya yisi murek logon ko kiŋa geleŋ kulo temba i lor ŋupi ŋupi.

³⁹ Do ködyö wukiŋdya lele kilolor temba i ko ’bure, ko lele temba i sömukö;

⁴⁰ a do wukiŋdye i pirit na geleŋ ko kilolor lo kokwe swöt topuökit geleŋ na koret na ’bolot naliliŋök, nagon a ŋola ko welet na jujukö nagon a swöt geleŋ na Iŋwan na temet nagon a yin, se ko swöt geleŋ na Iŋwan na yin na binyo nagon a rubaŋga ’bu ’buket.

⁴¹ A do wukiŋdye lele kilolor lo i sömukö, a do ködyö wukiŋdye lepeŋ ko ’doket na ’bolot se ko rubaŋga ’bu ’buket lonyit gwoso na wukiŋdye do i ko ’bure na, anyen mon paleleŋ, ŋilo a rubaŋga logon a ’yuraki MATAT ’buluŋ.

⁴² A nye ködyö gwe a rubaŋga lo ’yu ’yura ’buluŋ lo yeyeŋon i nyakwariat kasu; ŋilo rubaŋga ’yura i kötumit na kemia torumet köyö i komor nan MATAT na momori nan ko ta nyu, i jambu ko do.

⁴³ A nan mo momori ko Ŋutu ti Yisaraele nyu, a nu kemia mo gelwene a nake na rurwan kogwon minyo liŋ.

⁴⁴ A nan mo geluŋdye kemia torumet a nake na rurwan, se ko pirit ’yuret na rubaŋgajin; a nan mo geluŋdye Arona se ko ŋwajik kanyit a loke lo rurwan, anyen se kitakiŋdya nan a koanejin.

⁴⁵ A nan mo gwolope i kiden na Ŋutu ti Yisaraele, a mo gwe a ŋun lose.

⁴⁶ A se mo kuruŋdye adi nan logon a MATAT Ŋun lose logon a joŋdya se kaŋo i jur lo Ejipeto, anyen nan böŋö gwolor kase kiden; nan a MATAT Ŋun lose.