Yuörö 27 - Bibilia Buk na Ŋun nagon koti luŋu a

Pirit ’yuret na rubaŋgajin lo ’yu ’yura ’buluŋ

¹ A do ködyö teteŋdi kaden ’bokolot a pirit ’yuret na rubaŋgajin, tojolan nanyit a lokiliŋan mukanat, ko tugalaŋ nanyit a lokiliŋan mukanat; a nye gwe jojo a regorego, a tojolan nanyit ki gwe a lokiliŋan musala.

² A do tetenakiŋdye lepeŋ oŋgwora i goŋesi kanyit Iŋwan; a oŋgwora kanyit ködyö gwe a ŋo geleŋ ko lepeŋ, a do muluje lepeŋ ko mölwö.

³ A do teteŋdi yekesi kanyit ti kurök, ko korekan kanyit, ko kalabajin kanyit, ko sowesi kanyit ti lokore, ko ta ’doka kanyit; do ködyö teteŋdya kine tito kanyit liŋ ko mölwö.

⁴ A do tetenakiŋdye lepeŋ keyekeye nagon a mölwö; a do nitökiŋdye i nu keyekeye re Iŋwan nagon a mölwö i goŋesi kanyit Iŋwan.

⁵ A do tiŋdi lepeŋ i goŋet mukök na lo lorga pirit ’yuret na rubaŋgajin kak, anyen nu keyekeye yeŋga ki tojo ko kiden nanyit.

⁶ A do teteŋdi kaden ’bokolot a turya ti pirit ’yuret na rubaŋgajin, a do muluje se ko mölwö.

⁷ A kilo turya sukine i re lukata, anyen kilo turya gwon i mara murek ti pirit ’yuret na rubaŋgajin na ’doggi se nye nu.

⁸ A do teteŋdi nye ko baulan a kölökiŋdye lukata nanyit kana; ti lepeŋ tetenani gwoso na kweki ’e do i mere na.

Mariŋ na kemia

⁹ A do teteŋdi mariŋ na kemia. Boŋgwat na leleyo nagon a tetena ko waro na sirita a namin kune ködyö gwon a mariŋ i merete lo swot lo loki, ririkörö nase liŋ i merete geleŋ a lokiliŋan mia geleŋ;

¹⁰ a togwi ’diesi kase gwe a merya murek, ko gwo ’diesi kase merya murek logon a mölwö; a rekesi ti kulo togwi ’diesi ko re kase na dudu-kuki kune gwe a pödö.

¹¹ Köti i tojolan na merete lo lobot, boŋgwat na leleyo ködyö gwon a lokiliŋan mia geleŋ i ririkörö nase, ko togwi ’diesi kase merya murek ko gwo ’diesi kase merya murek logon a mölwö, ama rekesi ti togwi ’diesi ko re kase na dudukuki kune gwon a pödö.

¹² a tugalaŋ na mariŋ i swöt lonyit lo tokotyaŋ gwe a boŋgwat na leleyo, ririkörö nase a lokiliŋan merya mukanat, ko togwi ’diesi kase puök, ko gwo ’diesi kase puök.

¹³ A tugalaŋ na mariŋ i komor nanyit i swöt lo ’yure gwe a lokiliŋan merya mukanat.

¹⁴ A boŋgwat na leleyo i swöt geleŋ lo kötumit kune, ririkörö nase ködyö gwe a lokiliŋan puök wot mukanat, ko togwi ’diesi kase musala, ko gwo ’diesi kase musala.

¹⁵ A i lele swöt gwe a boŋgwat na leleyo, ririkörö nase a lokiliŋan puök wot mukanat, ko togwi ’diesi kase musala, ko gwo ’diesi kase musala.

¹⁶ A boŋgo muket na kötumit na mariŋ ködyö gwe a lokiliŋan merya murek nagon a tetena ko waro naŋem, ko na ’bule, ko nator, ko boŋgo nagon a tetena ko waro na sirita a namin nagon a kita na karipanit katokwelenyonit. Togwi ’diesi ti ŋina muket Iŋwan ko gwo ’diesi kase Iŋwan.

¹⁷ A togwi ’diesi liŋ lo lo lorga mariŋ kulo ködyö gwe ko re ti pödö na dudukuki; rekesi kase a pödö ko gwo ’diesi kase a mölwö.

¹⁸ a tojolan na mariŋ ködyö gwe a lokiliŋan mia geleŋ, a tugalaŋ nanyit gwe a merya mukanat, ko tojolan nanyit ki a lokiliŋan mukanat. Boŋgwat kanyit a tetena ko waro na sirita a namin, ko gwo ’diesi kase a mölwö.

¹⁹ a tito kitaesi ti kemia na kitarikin ŋo liŋ, ko kaleto kanyit liŋ, se ko kaleto liŋ ti mariŋ gwe a mölwö.

Tetena na lombo

²⁰ A do saŋi Ŋutu ti Yisaraele, anyen se jakiŋdya do welet nake na ludweki ti jeitun na jujukö anyen tiŋdu parara, anyen lombo ködyö togwi ’diki i tule diŋitan liŋ.

²¹ A nye gwe i kemia toru-met, i kaŋo na boŋgo koret na gwon i komor na ŋurupö tökoresi, a Arona ko ŋwajik kanyit ködyö teteŋdi lepeŋ i tokotyaŋ tojo ko ko ’bure ko MATAT i komor. Ŋilo a saret lo wuröki Ŋutu ti Yisaraele i yeŋon ŋupi tojo i nyakwariat kase.