Yeremia 1 - Bibilia Buk na Ŋun nagon koti luŋu a

ŋun a luŋ Yeremia ko a yökijö lepeŋ

¹ Kilo a kulyaesi ti Yeremia ŋurolo Kilikia, lele lo koanejin lo gwon Anatot i jur lo Benyamina.

² Kulyaet lo MATAT a pokin ko lepeŋ i kiŋa tupuök wot musala lo tumatyan na Yosia ŋuro lo Amon, mor lo Yuda.

³ A köti poki ko lepeŋ i diŋit na tumatyan na Yeyoyakim ŋuro lo Yosia, mor lo Yuda, tojo ko kiŋa topuök wot geleŋ lo tumatyan na Sedekia ŋuro lo Yosia, mor lo Yuda, tojo ko joŋa na ŋutu ti Yerusalema i to ’dupien i yapa tomukanat lo ŋilu kiŋa.

⁴ A kulyaet lo MATAT poki köyö adi,

⁵ I ŋerot nagon nan gweji do i pele nu nan aje den do, a i ŋerot nagon do a ko nyuŋ yuŋwe nu, nan aje gelun do, nan aje wulun do a nebi lo jurön.

⁶ A kirut a nan kulyani adi, Pon MATAT ŋun, mete, nan ti den jambu, kogwon nan nyuŋ a ŋuro lo ’dit.

⁷ Ama a MATAT kulyani ko nan adi, An do ko luŋgu mugun a ŋuro lo ’dit; iti i ŋutu liŋ logon nan a soŋdi do kulu, a do jambi ŋo nagon nan a yökijö do i jambu kune.

⁸ An do ko kujönö lepeŋat kwöŋ, kogwon nan gwon ko do i lwöggu na do. Kilo a kulyaesi kwe ti MATAT.

⁹ A kirut MATAT riuŋdye könin lonyit a taŋdi kutuk nio, a kulyani ko nan adi, Mete, nan aje tiŋdu kulyaesi kwe konut i kutuk.

¹⁰ Meddi, i lo lor nan aje tiŋdu do a ’duma lo jurön ko a duma lo tumatyanŋin anyen gwunyuŋdyö se kaŋo ko, anyen dukakiŋdya se kak, anyen köŋu se ko anyen söpuggö se, köti anyen to ’duŋö se ko anyen ’yuddu se anyen raradan.

¹¹ A kulyaet lo MATAT poki köyö ladi, Yeremia, do a meddya nyo? A nan waddi adi, Nan a meddya kene na ködini sakeda nagon möŋdu turö i suluki na kiŋa.

¹² A kirut MATAT kulyani ko nan adi, Do a meddya ’bura, kogwon nan möŋdu koŋdya kulyaet lio.,

¹³ A kulyaet lo MATAT poki köyö daŋ tomurek adi, Do a meddya nyo? A nan waddi adi, Nan a meddya mu ’da deret logon yuyu logon kutuk nanyit metuŋdya i swöt lo lobot.

¹⁴ A kirut MATAT kulyani ko nan adi, Karan mo pupukun kaŋo i swöt lo lobot i ŋutu liŋ ti lo jur.

¹⁵ Kogwon mete, nan MATAT lo kulya adi, Nan ŋilo soŋinana gwon i luŋgu na gweyajin liŋ ti ŋutu ti tumatyanjin ti lobot; a lepeŋat mo poŋdi po, a se liŋ geleŋ geleŋ mo tiŋdi si ’daesi kase ti tumatyan­jin i lupesi ti kötumitön ti Yerusalema, ko i swötön liŋ ti goroma kanyit nagon a mariŋan, se ko i köjino liŋ ti Yuda.

¹⁶ A nan mo ’duŋökiŋdye putesi kwe i ŋutu kwe, kogwon toronjin liŋ nagon se a kon i kölokiŋdyö na nan kune; lepeŋat aje ’yurakiŋdya kulye ŋunyen bökur a kwakwaddi kita na könisi kase.

¹⁷ Ama do Yeremia, ŋine ki, kukunaki mugun ajo, jamaki lepeŋat ŋo liŋ nagon nan a sarakin do kine. An do ko kölökin lepeŋat i tokujöŋdu na do, an nan tokujön do kase i komor.

¹⁸ Mete, i lo lor nan aje tin do i gwo ’dan go gwoso köji nago na titiyu, ko a iŋgo gwoso togwi ’diet logon a witi, ko a iŋgo gwoso mariŋ nagon a molwö i lo jur ’bukuluŋ, kweja adi i moran ti Yuda, ko i ŋutu temejik kanyit, ko i koanejin kanyit se ko i ŋutu ti jur.

¹⁹ Lepeŋat mo mömöröri do, ama nagon se mo ti re do, kogwon nan gwon ko do i lwöggu na do. Kilo a kulyaesi kwe ti MATAT.