Tolupesi 30 - Bibilia Buk na Ŋun nagon koti luŋu a

Kulya na jam Agur

¹ Kulo a kulyaesi ti Agur ŋuro lo Yake ŋuto lo Masa. Lo ŋuto kulya adi, Pon Ŋun nan a tudaraju mugun, iŋkoi, nan a tudaraju mugun a nan ’bakani ’baka.

² ’Diri nan a lu ’böŋ i gwon nio a ŋuto lalet, nan ’bak kurundyö nagon a na ŋuto.

³ Nan a ko jujumbu kogon, kode wuju dendya na kulya ko ŋilu Loke.

⁴ ŋa logon a tu ki a pondi kak? ŋa logon a tutunakindya köbuŋöt kanyit i ŋulu ’buöt ti könisi? ŋa logon a torakindya törön kanyit i boŋgo? ŋa logon a tetenakindya ’dutesi liŋ ti kak? Karin kanyit a ŋa, ko karin ti ŋuro lonyit a ŋa, ko ta ’diri deden?

⁵ Kulyaesi ti Ŋun liŋ a denwe kaŋo adi se a gwak; lepeŋ a ’buku ŋayet na ŋutu lo ’dana kanyit kilo.

⁶ An do ko ’ya ’ya kulyaesi kanyit, an lepeŋ riŋ do, a do ryeni a ’burönit.

⁷ Nan mo ’yu do ko go murek; an do ko renya tindu nan se i ŋerot na twan nio;

⁸ adi: ti nan gwe pajo i mumulugga se ko i ’burönö; ti nan gwe ti gwon a lomeri kode a kwörinit; tindi nan kinyo logon do titikin nan,

⁹ an nan ko yimönö a renyani do, a pipije adi, MATAT a ŋa? kode an nan ko gwon a lomeri a koko ’yi koko ’ya, a toluddye karin kunök ti Ŋun lio.

¹⁰ Ko pökindyö kölipönit ko duma lonyit i komor, an lepeŋ ko lömbu do, a do mo ’duŋökine arabat.

¹¹ Kulye ŋutu kata logon momoröju komonye a tine bu ’ya kŋgote.

¹² Kulye ŋutu kata logon yeyeju kase i töilyet adi se a loke, ama lut ti toronjin kase a ko tokela.

¹³ Kulye ŋutu kata logon meddya ko ’du ’dugga, ko boboŋoja a lwo ’duŋak.

¹⁴ Kulye ŋutu kata logon kala kase a bandujin, logon lili kase a walya, anyen tutuŋge nyesi lomerika i kak, ko se lo gwon ko yöŋö i kiden na ŋutu.

¹⁵ Lo ’bi ’biyit kata ko ŋwajik wate murek, a lepeŋat gwine adi, Tiki yi, tiki yi. Ŋo musala kode iŋwan kata logon ti yimönö kwöŋ, se ti bulö kulya adi, Aje jo.

¹⁶ Kilo go a pirit na mulökö, ko ŋuto nagon a ’baŋ, ko kak nagon ko kure na pioŋ, se ko kimaŋ nagon ti kulya kwöŋ adi, Aje jo.

¹⁷ Korukan ti pirit na ’dir mo wulu-dun konyen ti ŋuto kaŋo logon a ka ’dö ’döyönit lo monye, a renyani twöju ŋote, a logulusen mo nyesi se.

¹⁸ ŋo musala kode iŋwan kata nagon a tusör nan parik; nan ti kurun se kwöŋ.

¹⁹ Kilo ŋo a wörö na yuku ki yu, ko na munu i lele loki, ko na ki ’bo i tör kata, se ko na ŋuto ko ŋuro narakwan.

²⁰ Wörö na ŋuto nagon a kalupe gwon sona; lepeŋ nyenyesu, a seji kutuk nanyit, a kulyani adi, Nan a ko kondya toron kwöŋ.

²¹ ŋo musala kode iŋwan gwon i loki na kak, a kak böndi böndu a tine jukin ’doggu se.

²² Kilo go a ’dupiet logon wora a mor, ko a ŋuto lu ’böŋ logon a ŋworoŋ lo kinyo ko lepeŋ a yimönö,

²³ ko a nakwan nagon ti nyara ko nye a yema, se ko kölipönit nagon ruddya gote.

²⁴ ŋo iŋwan kata i kak logon a lo ’di ’dik, ama lepeŋat a lokoŋ parik.

²⁵ Kilo go a miki logon ’bak riŋit, ama lepeŋat ŋa ’yu kinyojin kase i diŋit na ja ’be;

²⁶ kileŋan a kijakwa nagon ’bak riŋit, ama lepeŋat tetendya kadijik kase i lelya kata;

²⁷ mayat nagon ’bak mor, ama lepeŋat liŋ wörö i pirit na geleŋ;

²⁸ se ko ŋurutöt logon do momok ko könin, ama lepeŋ bubulö rye i kadijik ti moran.

²⁹ ŋo musala kode iŋwan kata logon kwekwelen i wörö, se wörö ko ’du ’dugga parik.

³⁰ Kilo go a kömiru logon a kaŋa i kiden na kijakwa, lepeŋ ti löpukoddu kaŋo ko lele ŋo i komor;

³¹ ko sukuri mönik logon wörö ko ’du ’dugga, ko meetyo lopijot, se ko mor lo nyömöddu ŋutu kanyit kamörök.

³² Ko do a lu ’böŋ ko a kabulanit lo mugun, ko do a yeyeju kondya kulya narok, muŋge kutuk inot.

³³ Kogwon ko le a gwoŋa a gwo-ŋali na pondi kata, a ko kume a ’yoroto a rima na pondi, a ko woran na tisa a mörö na pondi.