Tolupesi 29 - Bibilia Buk na Ŋun nagon koti luŋu a

¹ Ŋuto logon a ririŋa ko kulyaesi daŋin jore ko a kawo ’duŋanit lo murut mo gwagwalaka asut ’de ’de kijek ti bulö tetena.

² Ko ŋutu lo rigwo lo gwon a kasa-rak, ŋutu gwon ko lyöŋön; ama ko ŋutu lorok lo saŋu a ŋutu gwe ko ’du ’duatu.

³ Ŋuto logon nyanyar kogon tu-lyöŋgu monye, ama nye logon morga töjulin ko wate nagon a kawutejin köŋu tukwörien nanyit.

⁴ Mor togwo ’ya jur go ko ’duŋgö gwogwo, ama nye lo ri ’dikindya ŋutu i tindu na ’dokesi kökör jur.

⁵ Ŋuto logon ’bo ’boŋa marate lonyit rikindyö boyi ko lepeŋ i mokosi.

⁶ Toronjin ti ŋuto katoronyanit na logga lepeŋ, ama a ŋuto lo rigwo yoloni yolo a lyöŋi lyöŋön.

⁷ Ŋuto lo rigwo yeye putet lo lomeri; ama ŋuto loron ti kurun yeyeesi gwoso kine.

⁸ ŋutu ka ’dö ’döyök kutakindya kimaŋ köji, ama ŋutu lokoŋ tindu woran i yukörö.

⁹ Ko ŋuto lokoŋ rerenya ko ŋuto lu ’böŋ i ri, a ŋuto lu ’böŋ wore woran a kwenine kweni, a yukan gwe ’bayin.

¹⁰ ŋutu logon ko kure i ’bukundyö na rima maman ŋuto logon ’bak yuyuket, ama ŋutu lo rigwo gaju ru na ŋilo ŋuto.

¹¹ Ŋuto lu ’böŋ tutuŋun woran nanyit kago lio, ama ŋuto lokoŋ toligga woran nanyit.

¹² Kasaranit logon yiŋga kulya ’buröno ŋutu kanyit liŋ kakitak gwon a katoronyak.

¹³ Ŋuto lomeri ko ŋuto karudanit momora i pirit na peleŋ; a MATAT tindi se lio murek i meddya na parara.

¹⁴ Mor lo ’duoŋö putet lo lomerika gwogwo si ’daet nanyit na tumatyan mo totogwo ’da go ŋupi.

¹⁵ Köti ’bitet ko kulya ririoesi tindu koŋon, ama ŋuro lo kölöki i kondya gwoso nye ’de ’dekan jakindya gote yu na kwe.

¹⁶ Ko ŋutu lorok gwon i tumatyan, kulya nakwölöpök ŋöndi; ama a ŋutu lo rigwo mo meddi ’doro nase.

¹⁷ Tojumbi ŋuro ilot, a lepeŋ mo tindi do i yukan, a nye mo tulyöŋgi töili ilot.

¹⁸ Ko nebijin ’bayin logon Ŋun a kwekin kulya, a ŋutu reki rekin abur, ama ŋuto lo ’debba saresi a kalyöŋi.

¹⁹ ’Dupiet ti bulö tojumuki ko kulya kana, kogwon ma ’di nye ködyö kukurun kulya lepeŋ ti tikin tirikwet.

²⁰ Do a met ŋuto logon jambu ’de ’de ’bak yeyeju le? Ŋuto lu ’böŋ bubulö yiniki lwö-lwöŋ lepeŋ.

²¹ Ŋuto logon konakindya ’dupiet lonyit go liŋ na ’but ’bak göja i to ’dit nanyit, ŋilo ’dupiet mo ti twö lepeŋ i ’dutet.

²² Ŋuto kawore toggu mörö, a ŋuto lo woran ’de ’de kondi lyaŋesi diŋitan liŋ.

²³ Bu ’ya na mugun nyökundyo ŋuto kak, ama ŋuto logon a lokoyok i töili mo bubula.

²⁴ Ŋuto logon mora ko kolanit maman mugun, lepeŋ yiyiŋ milye lömit ama ti tuggö nene ŋo.

²⁵ Kujönö kulye ŋutu gwon a birya, ama nye logon yinikindyö muŋun ko MATAT mo lwölwökö.

²⁶ Ŋuto jore ŋa ’yu nyara ko kasaranit, ama ŋutu wuju ’duggö na rigwo ko MATAT.

²⁷ Ŋuto lo rigwo maman katoronyanit, a katoronyanit mandi ŋuto logon kiko lonyit gwon gwogwo.