Tolupesi 28 - Bibilia Buk na Ŋun nagon koti luŋu a

Ŋutu lorok ko ŋutu lo rigwo

¹ Katoronyanit wöwökön ŋuto ’bayin lo riköddu lepeŋ, ama ŋutu lo rigwo a riör gwoso kömiruöt teton.

² Ko toronjin kata i jur kasarak gwon jore; ama ko ŋutu logon kukurun kulya se ko dendya kata jur gwogwolor ’bura diŋit a najo.

³ Ŋuto lomeri logon ru ’ya lomerika gwon gwoso kudu lo gwutöki-ndyö kinyo kak.

⁴ Ŋutu lo renya saresi pupurja ŋutu lorok, ama se lo ’debba saresi mörö ko ŋutu lorok.

⁵ Ŋutu lorok ti kurun ’duggö na putet gwogwo, ama se lo ŋa ’yu MATAT kukurun go liŋ ’bura.

⁶ Bia ŋuto lomeri lo wörö i kiko lo to ’diri lwölwöŋ ŋuto kwörinit logon kikolin kanyit a lukwölöŋök.

⁷ Ŋuto lo ’debba saresi a ŋuro lokoŋ ama nye logon a julo ŋutu kagomak toyujö kwe na monye lonyit

⁸ Ŋuto logon buŋö möri ko wöli kode ’yalet anyen tundijö tukwörien nanyit ŋilo ŋuto ’de ’ya ŋurut kanyit a ti ŋuto lo won konyen ko lomerika.

⁹ Ko ŋuto logon kölökindyö yiŋga na saresi, ma ’di kwakwasesi kanyit mamana.

¹⁰ Ŋuto logon tulyaŋaddu ŋuto lo rigwo i kiko loron mo ’doro i dili na ’bok nye na; ama ŋuto logon ’bak yuyukesi mo ruddya go na ’but.

¹¹ Ŋuto kwörinit yeyeju adi nye a lokoŋ, ama ŋuto lomeri logon deden kulya mo ŋaŋalun lepeŋ kago.

¹² Ko ŋutu lo rigwo a te ’ya, a lyöŋön gwe kata a duma parik; ama ko ŋutu lorok a ŋien a ŋutu ’de ’deleji ’börik.

¹³ Ŋuto lo muggö toronjin kanyit mo ti puputuru ŋerot, ama nye lo tutuggö toronjin a kö ’yi se lo mo pipitöki.

¹⁴ Ŋuto logon böböndu ko MATAT i komor perok liŋ a kalyöŋi; ama nye lo togo ’yu töili mo ’do ’doro i kulya narok.

¹⁵ Kasaranit loron lo saŋu ŋutu lomerika gwon gwoso kömiru lo rurumön kode gwoso gworoŋ lo totŋgoŋa.

¹⁶ Kasaranit logon ’bak kurundyö ru ’ya ŋutu parik; ama nye logon maman ’bulit na wuyu a lwön lo mo gwolor diŋit a najo.

¹⁷ Ŋuto logon a ’buköddu rima ti lele ŋuto ti nye wöwökine wöwöki tojo ko twan; ti lele ŋuto gwe ti parakin lepeŋ.

¹⁸ Ŋuto lo wörö i kiko lo to ’diri mo lwölwökö, ama ŋuto logon kikolin kanyit a lukwölöŋök mo ’do ’doro i daŋ geleŋ.

¹⁹ Ŋuto lo kuŋu melesen nanyit mo gwon ko kinyo a duma, ama nye lo kepöddu go nagon ’bak ’bulit mo gwon ko tolomerian a duma.

²⁰ Ŋuto logon yiyiniki i konesi kanyit mo gwon ko ’boriesi jore, ama nye logon ’demeja tukwörien mo ti tu kana ’bak riŋet.

²¹ ’Bayin a na ’but i nyaŋu na swöt geleŋ; ama ŋuto bubulö torondya ko nye a wuju pitönö na ambata.

²² Ŋuto logon a wele ’demeja tukwörien, ti den adi yöŋö na ŋo mo ’du ’dukin kanyit loki.

²³ Ŋuto logon ririŋga ŋuto mo ryeryeju ’busan i mukök, lwölwöŋ nye logon jambu kulya ’bu ’busesi.

²⁴ Ŋuto logon ryaggu ŋo ti monye kode ti gote a kulyani adi, ŋina ’bayin a toron, lepeŋ a ju lo katukaranit.

²⁵ Ŋuto logon gogoma toŋiju mörö, ama a nye lo yinikindyö mugun ko MATAT lo mo worani a kwörinit.

²⁶ Ŋuto logon yendu yeyeesi kanyit lo a lu ’böŋ, ama nye lo wörö ko tokogon mo lwölwökö.

²⁷ Ŋuto logon ’do ’dogga lomeri mo ti yöŋö nene ŋo, ama nye lo ’de ’ya konyen kanyit mo momoro parik.

²⁸ Ko ŋutu lorok a ŋien a ŋutu ’de ’deleji ’börik, ama ko se a twatwa, a ŋutu lo rigwo ndine ndi.