Tolupesi 27 - Bibilia Buk na Ŋun nagon koti luŋu a

¹ Ko bu ’ya mugun i kulya ti ko ’bure, kogwon do ti den go nagon pupukun i lor.

² Ti lele ŋuto pupure do, an do ko pupurja mugun ko kutuk inot, ti ŋutu lepelok pupure do, an do ko pupurja mugun ko ŋedep ilot.

³ ŋurupit pömöni, sese köti pömöni, ama yöyöggu na ŋuto lu ’böŋ pömöni lwölwöŋ tupömöni nase liŋ murek.

⁴ Tukaŋan gwon ko töili lurwö, woran na pape muluja ŋuto; ama ŋa logon bubulö gwo ’dan ko kayinönit i komor?

⁵ Bia ririŋesi na jama a lokomor, lwölwöŋ nyaŋu nagon mumukö.

⁶ Ŋuto logon nyanyar do böŋöddu do ko töili lo to ’diri, ama ŋuto logon maman do ’bi ’bi do parik i ŋebi.

⁷ Ŋuto logon a yimönö maman siwatat. ama ŋuto logon ko magor go liŋ napötwör paleleŋ kanyit.

⁸ Ŋuto lo wöröji abur kö ’yu mede nanyit gwon gwoso kwenti nagon wöröji abur kölöki-ndyö kadi nanyit.

⁹ Welet na mon paleleŋ se ko riya tulyöggu töili, sona köti ’busan na ŋuto logon po ko töili jujuwet lo ’but tulyöggu töili lo ju lonyit.

¹⁰ An do ko kö ju ilot kode ju lo munyi; an do ko tu ko luŋösur mede i lor logon do a ryeju kulya narok. Marate logon nyona a lo ’but lwölwöŋ luŋaser logon pajo.

¹¹ Gwe do a lokoŋ ŋuro lio, ko tulyöggi töili lio, anyen nan böŋö jojo ruggö ŋuto lo ’dö ’döju nan lo.

¹² Ŋuto logon deden kulya meddya go naron a ’danani ’dana; ama a ŋuto logon ko yeyeesi a namunyak iti nyin a wuji gogga.

¹³ ’Dumundye boggo na ŋuto ko lepeŋ a gwo ’dan i kulya ti lepetyo, ’debbi nene go na kölöki a togwoet na ŋuto lo gwo ’dan i kulya ti Lwaka.

¹⁴ Ŋuto lo roman ko marate lonyit ko ’bure kobubut ko gworo a lobot i ’boroja na lepeŋ kudyakan lepeŋ luŋu a kalömonit.

¹⁵ Kadi na wowon ŋupi i lor lo kudu se ko nakwan kawogonit se liŋ gwon jojo;

¹⁶ ŋuto logon bubulö sugga lepeŋ bubulö sugga köbuŋöt, kode musugga welet ko könin lonyit lutaten.

¹⁷ Witi jujö lele witi, sona köti ŋuto jujö yeyeesi ti ju lonyit.

¹⁸ Ŋuto lo rurugga ki ’bi mo nyönyö ludweki kanyit, a nye lo tiju duma lonyit lo mo twöyöni twöyi.

¹⁹ Töili lo ŋuto kweja gwiliŋit lonyit lepeŋ, gwoso nagon ŋuto meddi komor nanyit i pioŋ kata na.

²⁰ Pirit na mulökö se ko twan ti yimönö kwoŋ, a konyen ti ŋutu köti tine yimönö asut.

²¹ Pödö tema i tuka a dakap temani i pirit namet, a ŋuto temani ko kuön nanyit.

²² Ma ’di do a juk ŋuto lu ’böŋ se ko ’bolot i pirit na geleŋ i kujukit, pudi nagon a tu ’böŋön nanyit nyuŋ ti kölökin lepeŋ.

²³ Dene den gwiliŋit lo teŋ na köbilu kunök, ko tini ti teŋon ti yidin kunök ’bura;

²⁴ kogwon tukwörienjin ti yegon ŋupi; loruya gona yeyegon i nyakwariat liŋ le?

²⁵ Ko döru aje ’baka a ludukötyo lo ŋunu, a go lorem ti merya lo ŋerani,

²⁶ a do mo jupuni ko yisi kunök, a melon lopijoki mo gwe a gwöriesi ti melesen;

²⁷ a le ti melon mo gwe jore a kinyo ilot, ko a kinyo lo mede inot, ko i tunyerikin na kö ’disi na kitakindya do.