Tolupesi 26 - Bibilia Buk na Ŋun nagon koti luŋu a

¹ Ŋuto lu ’böŋ ti jukin bula, gwoso nagon torok ti kudu ti jukin ’don i diŋit na meliŋ.

² Lömit logon lömörikin ’bak kwe na kulya ti kegga, nye gwon gwoso kukuli na bibirtö ko gwoso lopiret i gogoroju nanyit.

³ Kurubat ’bitörikin kusan, a ’böriköt jikörikin kaine, a ture ’bitörikin ŋuto lu ’böŋ.

⁴ Ko ruggö ŋuto lu ’böŋ gwoso i tu ’böŋön nanyit, an do kelaji ko lepeŋ.

⁵ Ruŋge ŋuto lu ’böŋ gwoso i tu ’böŋön nanyit, an lepeŋ ko yeyeju adi nye a lokoŋ.

⁶ Ŋuto lo sondu lore i könin lo ŋuto lu ’böŋ ’du ’duŋgö mokosi kanyit a möji kulya nagon.

⁷ Tolupesi ti kulya na jam ŋutu lu ’böŋ kune gwon gwoso mokosi lokelekak ti ŋuto gode.

⁸ Ŋuto lo bu ’ya ŋuto lu ’böŋ gwon gwoso ŋuto logon ŋurupit lonyit a ’depakindya i lowiset.

⁹ Tolupesi ti kulya na jam ŋuto lu ’böŋ gwon gwoso kikwöti na söju könin lo ŋuto kamere.

¹⁰ Ŋuto lo luŋgu ŋuto lu ’böŋ kode kamere i kita ko ropet, gwon gwoso kagoronit lo böŋöddu ŋutu liŋ lo lwölwöŋöddu.

¹¹ Ŋuto lu ’böŋ lo nyöggu kulya kanyit na ’böŋ gwon gwoso ’dioŋ lo yitö kanyit i jaat.

¹² Do a met lele ŋuto lo yeyeju adi nye a lokoŋ le? Ŋuto lu ’böŋ bubulö yiniki lwö-lwöŋ lepeŋ.

¹³ Ŋuto yoke kulya adi kömiru kata köke, kömiru lu i kiko!

¹⁴ Ŋuto yoke yoyoŋga mugun kanyit i dotoet, gwoso kötumit na wiŋgö i tomoresi kanyit.

¹⁵ Ŋuto yoke a sukindyö könin lonyit i kalaba; a lepeŋ darani dara i nyököddu kanyit i kutuk.

¹⁶ Ŋuto yoke yeyeju adi nye a lorgo lwölwöŋ ŋutu buryo lo ruggö ko denesi nakoŋ.

¹⁷ Ŋuto lo morakindya i mörö nagon ’bayin a nanyit gwon ’gwoso ŋuto lo piggö swö ti ’digo lo tu i kiko.

^18-19 Ŋuto lo mumulugga marate lonyit a kulyani adi, Nan dika bibirye, lepeŋ gwon gwoso ŋuto lo mamala lo ŋumba tukuyet ti kimaŋ, ko loya se ko twan.

²⁰ Kimaŋ twatwan kogwon kaden ’bayin, a rerenyesi ’bakani ’baka ko kamo-ŋanit ’bayin.

²¹ Ŋuto lo lodokon lo toju ’yö kulya rerenyesi gwon gwoso kuk na to ’deparikin kimaŋ na twatwaara, ko gwoso kaden na torekarikin kimaŋ.

²² Tamiat ti kamoranit gwon gwoso tupesi ti kinyo na paleleŋ, logon wiloji i pele adi mot.

²³ Kulyaesi lo paleleŋ mora ko töili loron gwon gwoso mu ’da logon a linyö ko yo ’du a gwe a lomilyaŋ.

²⁴ Ŋuto logon a kamananit jamakindya do kulya na ’but, ama töili lonyit ’de ’ya mumulugga;

²⁵ ko lepeŋ jambu jamiat lo ’but an do ko yuŋ lepeŋ kwöŋ, kogwon go buryo kata kanyit i töili na mamana;

²⁶ ma ’di ködyö mandu nanyit a mukö ko dumesi, toron nanyit mo kwekweya i komor na ŋutu lo momora.

²⁷ Ŋuto logon a ’bogga dili mo ’do ’doro nyin, a ko lepeŋ gwugwuluŋöddu ŋurupit a ŋilu ŋurupit mo gwuluŋöki-ndye kanyit loki.

²⁸ Ŋedep lo ŋuto ’burönit mandu ŋuto logon nye sasan, a kutuk na ka ’bu ’busanit jondi kulya narok.