Tolupesi 25 - Bibilia Buk na Ŋun nagon koti luŋu a

Todinesi i kulya ti gwolor na ŋutu

¹ Kulo köti a tolupesi ti kulya ti Solomona logon ŋutu ti Kijikia mor lo Yuda a mirakin i wuŋö.

² ’De ’ya na kulya gwon a bulet na Ŋun, ama a palundya na kulya kago gwe a bulet na moran.

³ Töilyet ti moran ti bulö palwe kago, gwoso na gwondi ki pajo ko kak a nagulu na.

⁴ ’Dume lut kago i pödö, a kanitonit gwe kata ko go nagon nye ninit a titoni;

⁵ ’dumara ŋutu lorok kago ko mor i komor, a si ’daet nanyit na tumatyan mo togwo ’dani go ko torigwo.

⁶ Ko mijörö ko mor i komor kode gwo ’dan i pirit na geleŋ ko ŋutu temejik;

⁷ kogwon bia a na ’but i luŋu adi, Pondi ŋerot, lwölwöŋ nyökwe inot kak i komor na ŋutu lokukwön.

⁸ Ko nyogga tukökindyö ŋutu i ri go nagon do a met; a do mo kondi nyo i ’dutet ko marate ilot a toyuun kwe inot?

⁹ Nyönyöggi ta kulya kasu ko marate ilot, ama an do ko kweja lwönö ti lele ŋuto;

¹⁰ an lepeŋ lo yiŋga do lo toyuun kwe inot, nyena a kulya kunök mo jamajine arabat ŋupi.

¹¹ Kulya na tetemakindya i jama i diŋit nanyit gwon gwoso dakap na tetena a ludweki logon a to ’depaki i pödö na gigiru.

¹² Kulyaesi ririŋesi lo jama ko ŋuto lokoŋ gwon gwoso reyat na dakap i swöt lo ŋuto lo yiyiŋga, kode gwoso minyo lo murut logon a dakap.

¹³ Luyökie lo yiyiniki ko ŋutu lo sunyundyö nye kulo gwon gwoso lik na torok ti kudu i diŋit na meliŋ, nye totoru töilyet ti ŋutu kanyit temejik.

¹⁴ Ŋuto logon laŋa ’dokesi kanyit ama ti tindu lo gwon gwoso ’dikolo ko köbuŋöt logon ti jondya kudu.

¹⁵ Kasaranit bubulö lulukaji ko a jamarikin madaŋ, a ŋedep lokoyok ’beleŋgi ma ’di kuyutyo.

¹⁶ Ko do a ryeju siwatat, tuŋ nyesi nagon tetemakindya konut, ti do gwe ti yimönöri parik an do ja.

¹⁷ Ko wörö ko marate ilot mede diŋitan liŋ, an lepeŋ dara ko do, a mane man do.

¹⁸ Katokoronit ’burönit lo kulya ti marate lonyit gwon gwoso ture wuluk, kode bandu, kode lowe lopi.

¹⁹ Yinikindyö na mugun i ŋuto loron i diŋit sasanyet gwon gwoso kele lo ’buron kode moköt ŋöde.

²⁰ Ŋuto lo yulukindyo ŋuto logon ko töili lo pömöni kölisi, gwon gwoso ŋuto lo rosoddu ŋgogo kago i lor lo katirut, ko gwoso po na pötwör i ’dika.

²¹ Ko miriku ilot gwon ko magor, tiki lepeŋ kinyo ti nyesi, ko lepeŋ ko kure, tiki pioŋ ti möji,

²² kogwon do mo tindu kwe nanyit i yu gwoso ŋuto logon a yunaki kuk na nyonyoran kanyit i kwe, a MATAT mo ropakindye do.

²³ Köbuŋöt lo wukundyö i swöt lo lobot jondya kudu, a ŋedep kasasanyanit jondi gwurie-ŋga na woran.

²⁴ Bia si ’da i tuset lo lo ’dek lo ’dayat lwölwöŋ si ’da i kadi geleŋ ko nakwan kawoponit.

²⁵ Iŋgo lo ’but ti jur lo pajo gwon gwoso pioŋ na lilik i ŋuto lo moka kure.

²⁶ Ŋuto lo rigwo logon kölökindyö ŋuto loron kiko, lepeŋ gwon gwoso loro logon pioŋ kanyit a köburö, kode gwoso kidi lo körö.

²⁷ ’Bayin a na ’but i nyesu na siwatat a duma, köti a go na pömöni i ŋa ’yu na kulya bulesi.

²⁸ Ŋuto logon ti teŋgu mugun gwon gwoso köji nagon aje turö a mariŋ nanyit iŋge körö.