Tolupesi 23 - Bibilia Buk na Ŋun nagon koti luŋu a

¹ Ko ta a si ’da kak i nyesu ko ŋuto duma logon a matat, dene den ’bura adi ŋa lo gwon konut i komor;

² a ko do a gworoŋ lo kinyo tore tor gworo ilot kiyaŋ.

³ An do ko ŋoma ko kinyojin kanyit lo paleleŋ, kogwon meta a kinyo mumuluket.

⁴ Ko tudaraju mugun i ŋa ’yu na tukworien; gwe a ŋuto lokoŋ ko kölöki se.

⁵ I diŋit na boŋgi do se nu, a se mo gwe ’bayin; a se mo suje köpukön a ’daaddi ki gwoso yuku.

⁶ An do ko nyesu kinyo lo ŋuto logon a wele; an do ko ŋoma ko kinyojin kanyit lo paleleŋ;

⁷ kogwon lepeŋ gwoso ŋuto logon yeyeju kanyit i töili ko do nyesu gwanan. A lepeŋ jujukindye do adi, Nyesi ko möji! ama töili lonyit ti ’bön do.

⁸ Do mo jajaun kaŋo ŋo na ’di ’dik nagon do a nyö kune, a do mo tolikindye jamiat kulök lo tutulyöŋgu.

⁹ An do ko jambu na yiŋge ŋuto lu ’böŋ nu, kogwon lepeŋ de ’dö ’dö kulyaesi kulök ti koŋon.

¹⁰ An do ko tomijörö ŋurupö ti lokökori lo ’beron, an do ko lupö i meleseno ti kikijikö;

¹¹ kogwon Kajunyönit lose a iŋgo; a nye mo jundye se adi do a loron.

¹² Tindi töili i tojumisi, pakindye swö kulök i kulyaesi ti koŋon.

¹³ Ko renya tojumbu ŋuro, ko do a ’bit lepeŋ ko köli nye ti twan.

¹⁴ Ko do a ’bit lepeŋ ko köli do mo lwölwök lepeŋ i tu kak i pirit na mulökö.

¹⁵ Ŋuro lio, ko töili ilot a lokoŋ, töili lio köti mo gwon ko lyöŋön.

¹⁶ Ködudwö nio mo lyölyöŋön i diŋit nagon kutuk inot a jambu ŋo na rigwo.

¹⁷ Ti toili ilot gwe ti be ’ya katoronyak, ama yeŋe yeŋon i kugga na MATAT temba i lor.

¹⁸ Kogwon ’diri kulya ti molu kata, a yenet inot mo tine ’duŋöji kaŋo.

¹⁹ Ŋuro lio, yiŋe anyen do gwon a lokoŋ, tuwöröddi toili ilot i kiko lo ’but.

²⁰ Ko si ’da i kiden na ŋutu kamerak, kode i kiden na ŋutu lo gogoma i nyesu na lokore;

²¹ kogwon ŋutu kamerak ko ŋutu kagomak mo wora a lomerika, a ŋuto lo meran logon doto adi mwön mo jupuni kereketwat.

²² Yiŋge munyi lo yupundyö do, an do ko laundya ŋuti ko nye gwe a modoŋ.

²³ Gwörundye to ’diri, an do ko tugwör lepeŋ; gwörundye koŋon, ko tojumisi, se ko kurundyö na kulya.

²⁴ Monye ŋuto lo ’but mo lyölyöŋön parik; a nye lo yupundyö ŋuro lokoŋ mo nyolani nyola ko lepeŋ.

²⁵ Ti munyi ko ŋuti gwe ko lyöŋön, ti nye na yupundyö do na lyöŋi lyöŋön.

²⁶ Ŋuro lio, tirikuni yiŋga nan, ko ti konyen kulök diŋe kikolin kwe go.

²⁷ Kogwon nakwan nagon a kawute a dili nagulu, a nakwan nagon ko konyen a lopi gwe a kidi logusu.

²⁸ Iŋkoi, lepeŋ gwon i domba gwoso karyakanit, a tindi ŋutu lyan jore i dudumuja.

²⁹ Ŋa lo lulujö adi, Wöidiö? ŋa lo gwi adi, Wuwu? ŋa logon ko rerenyesi? Ŋa logon ko wiwinyesi? Ŋa lo wuju ’dikasin ’bak böŋöji? ŋa logon ko konyen a lotor?

³⁰ Kilo a ŋutu logon karara i möju na yawa diŋit a najo, se lo jujumbu waŋgu binyo na gola.

³¹ Ko meddya binyo nagon a nator a gwe a nasulyöŋök i koŋo, a lupöni ko ŋuto i gworo adi yoŋ.

³² A i mukök a köji gwoso munu, a toggi gwoso munu gwgokorokok.

³³ A do mo meddi ŋo ka ’de ka ’de konut i konyen, a töili ilot mo tindi do i jambu na kulya nagon a wuya.

³⁴ Iŋkoi, a do mo gwe gwoso ŋuto lo piriki i tör kiden, ko gwoso ŋuto logon a piriki i kwe na ködini logon toraki ’e boŋgwat nagon wuköji ’e ki ’bo.

³⁵ A do mo kulyani adi, Se a gwugwutu nan, ama nan a ko se a jojoko nan, ama nan a ko den mien. Nan de ko purwe nanu? A nan galaddu kunie yawa.