Ruta 2 - Bibilia Buk na Ŋun nagon koti luŋu a

Ruta kwökwöddu pitöno ti ’bolot ko Boaja i melesen

¹ A Naomi gwe ko marate lo lalet lonyit, ŋilu ŋuto a kwörinit duma a lo kotumit na Elimelek, karin kanyit a Boaja.

² a Ruta Moabatyo kulyani ko Naomi adi, Ti nan iti i melesen, ko ti nan ’du ’dumbe pitönö ti ’bolot lo ŋeŋera i mukök na ŋuto lo won konyen ko nan. A nye kulyani ko lepeŋ adi, Iŋgo iti pon ŋuro nio.

³ Nyena a lepeŋ ko iti a ’duröki nyu i ’du ’dumba na pitönö ti ’bolot i melesen ko kaŋerak i mukök, a nye iŋge ’durökin i swöt lo melesen nagon a na Boaja lo kotumit na Elimelek.

⁴ Mete, a Boaja lo po Beteleme rome ko kaŋerak kulo adi, Ti MATAT gwe ko ta! A se ruŋge adi, Ti MATAT ’boroji do.

⁵ A Boaja pipije kölipönit lonyit logon a duma lo kaŋerak lo adi, Na ŋuro a niŋa?

⁶ A kölipönit logon a duma lo kaŋerak lo waddi adi, Lepeŋ a Moabatyo, nagon a yitwe bot se ko Naomi i jur lo Moaba.

⁷ A lepeŋ na mo ’yi adi, Boŋo ti nan kwökwöddi ko ’du ’dumaddu na pitönö ti ’bolot i kepöddu na kaŋerak i kiden na ’domio. Nyena lepeŋ a po a suluje kita i ko ’bure kobubut tojo ko na diŋit ’bak yukan ma ’di ko diŋit a na ’dit.

⁸ A kirut Boaja kulyani ko Ruta adi, Yiŋge nan soŋinana ŋuro nio, an do ko nyuŋ tu i ’du ’dumba i nene melesen a kö ’yi na, ama morakiŋdye ko kune ŋwajik kwe.

⁹ Mete met melesen nagon lepeŋat neper na ko ti do iti kase i mukök. Nan a saŋu teton kulo an se ’bo do. A ko do a moka ko kure a ti do iti yu i kilu sapya anyen tu möju ŋo nagon kilu teton lo ’yiluŋdya kune.

¹⁰ Nyena a lepeŋ nu ’dorone kak rupu i twoju na lepeŋ, a kulyani adi, Nan a lwakatyo, ada nagon nan a ryo ’busan konut i komor anyen do tiriku nan sona na?

¹¹ A Boaja nyobbi lepeŋ adi, Ŋo lio nagon do aje konakin moken inot, suluja i twan na lalet ilot aje nyönyököki nan liŋ; do koti a ko ’yu munyi ko ŋuti ko jur losu a poŋdi i ŋutu logon do köju a ko den.

¹² Ti MATAT ropakiŋdye do kita inot. Ti MATAT ŋun lo Yisaraele logon do a po i rupu ko lepe ŋ i mugun lo, ti ropaki do ’bura ’bak temet.

¹³ A Ruta kulyani adi, Ti nan boŋo ryeji ’busan konut i komor pon duma lio, kogwon do a togo ’yu kölipönit inot ko do a jamakiŋdya nan ’bura koyo i töili, ma ’di nagon nan ’bayin a nene na kölipönök kunok.

¹⁴ A i diŋit nyeŋ a Boaja kulyani ko lepeŋ adi, Poŋdi ni i nyesu na ambata ko i nyulukiŋdyo i binyo lukata, a kirut nye si ’dakine ko kaŋerak i merete, a nye ŋutukiŋdye nu ŋuro ’bolot lo kelo a nyesi nyesu tojo a yimönö, a iŋge pitun kulye.

¹⁵ A nagon nye koti ŋiki i ’du ’dumba nu, a Boaja takiŋdye teton kanyit kulo adi, Ti nye ’du ’dumbe ma ’di i ’domio kiden, an ta ko riŋ ta lepeŋ.

¹⁶ Koti ’dutuki ta lepeŋ kulye kak i kiden na ’domio aka, ko kölöki ta lepeŋ anyen ’du ’dum, ko an ta ko riŋ ta lepeŋ.

¹⁷ A nye gwe i ’du ’dumba i melesen tojo ko sömukö; kirut a nye poki i jojogga na se a kilo poŋdi gwoso wuyit na ’bolot saora nagon a epa.

¹⁸ A nye ’dumuŋdye se a iti köji, a nye kwekiŋdye moken nanyit ŋo nagon nye aje ’du ’dum kune, a nye koti kweuŋdye kaŋo pitönö ti kinyojin na pituŋdyö nagon nye aje yimönö nu, a tiŋdi moken nanyit.

¹⁹ A moken nanyit pipije lepeŋ adi, Do lolor ’du ’dumba ya i lo lor? Koti do kita ya? Ti ŋun ’boroji ŋuto logon a won konyen ko do lo. Nyena a nye nyönyökö-kiŋdye moken nanyit ko nye a kita ko ŋa, adi, Karin ti ŋuto logon nan a kita ko lepeŋ i lo lor lo a Boaja.

²⁰ A Naomi kulyani ko narakwan na tore adi, Ti MATAT logon a ko ’dumara ’busan nanyit i ŋutu lo gwon jorun ko lo twatwa lo ti ’boroji lu ŋuto. A Naomi koti kulyani ko lepeŋ adi, ŋilu ŋuto a marate likaŋ, nye a karutyo likaŋ lo nyona.

²¹ A Ruta Moabatyo na kulyani adi, Lepeŋ koti a jambu ko nan adi, Ti nan morakiŋdye ko kinu ŋwajik kanyit tojo lepeŋat a tutuŋgö ’butun lonyit ’bukuluŋ.

²² A Naomi kulyani ko Ruta narakwan na tore lonyit adi, ŋina a ŋo na ’but ŋuro nio, nagon adi do tu i kita ko ŋwajik kanyit na, an do ko konaki arabat i nene melesen.

²³ A nye kirut morakiŋdye i ŋwajik ti Boaja i ’du ’dumba tojo ko ’dutet na ŋera na ’bolot saora ko ’bolot lo luŋu a kiti, a lepeŋ si ’dani si ’da ko moken nanyit.