Ruta 1 - Bibilia Buk na Ŋun nagon koti luŋu a

Ruta ko Naomi

¹ A ko gwe sona i diŋit saret na ka ’duŋök a dyaŋ gwe i jur, a lele nuto lo Beteleme na Yuda yuörö i jur lo Moaba, se ko narakwan nanyit ko ŋwajik kanyit murek.

² Karin ti nilu ŋuto a Elimelek a karin ti narakwan nanyit gwe a Naomi, a karin ti kilo ŋwajik kanyit murek gwe a ko Makelon ko Kiliona; lepeŋat a ti Eparata na Beteleme na Yuda. A se ’dure i jur lo Moaba a si ’dani nyu.

³ A Elimelek lalet lo Naomi twane twan, a Naomi kölökine ko ŋwajik kanyit murek kulo.

⁴ A se yembi wate i ŋutu ti Moaba; karin kase a ko Orupa ko Ruta. A se mönuŋdye nyu gwoso kiŋajin puök.

⁵ A Makelon se ko Kiliona liŋ murek twatwane twatwa, a nu ŋuto kölökine a likiso ’bak ŋwajik kanyit murek se ko lalet lonyit köti.

⁶ A Naomi ŋine ŋien ko kinu wate ti ŋwajik kanyit, a yitöni i jur lo Moaba, kogwon lepeŋ aje yiŋga i jur lo Moaba adi MATAT aje ’yö ’yu ŋutu kanyit i tiŋdu na se kinyo.

⁷ Nyena a lepeŋ ŋine ŋien ko wate ti ŋwajik kanyit murek kune i pirit na gwoŋdi nye nu, a se kebbi kiko logon yitö i jur lo Yuda.

⁸ A Naomi kulyani ko wate ti ŋwajik kanyit murek kune adi, Iti ta, yitöni ta liŋ kase komunyi midijik. Ti MATAT konakiŋdye ta ’busaŋ gwoso köju na konakiŋdye ta lutwatwa kulu ko nan köti.

⁹ Ti MATAT paraki ta anyen ta liŋ geleŋ geleŋ boŋo ryeju yukan i midijik ti lyan kasu. A nye kirut ’biyun-dye se, a lepeŋat ’dorone i gwien.

¹⁰ A se kulyani ko lepeŋ adi, ’Bayin, yi de yitö kasu i ŋutu ko do i pirit na geleŋ.

¹¹ Ama a Naomi kulyani adi, Yitöni ta bot ŋwajik kwe, nyo nagon ta ’dek tu ko nan? Nan ŋona nyuŋ kata ko kulye ŋwajik köyö i pele le anyen se lo ko gwon a lyan kasu?

¹² Yitöni ta bot ŋwajik kwe, iti ta, kogwon nan gwe a modoŋ parik i gwon ko lalet köti. A ma ’di ködyö nan a kulya adi nan gwon ko yenet na yupuŋdyö na ŋwajik lulyan ko nan ködyö a gwon ko lalet i lo tukwaje,

¹³ nyenagon ta ŋona momon se tojo se a ’duŋö le? Nyenagon ta ŋona bubulö si ’da kana anyen gwon ti yema i kulya kase le? ’Bayin sona ŋwajik kwe, kogwon gwe a delya duma parik koyo i kulya kasu kogwon MATAT a ’bo ’yu nan.

¹⁴ A lepeŋat köti ’dorone i gwien; a Orupa ’biyuŋdye moken nanyit, a iti tu, ama a Ruta na ’depakiŋdye kanyit i mukök.

¹⁵ A lepeŋ kulyani adi, Meddi ku ’ba inot aje yitö bot kanyit i ŋutu ko i ŋunyen kanyit, iŋgo yitöni ko ku ’ba inot i mukök.

¹⁶ A Ruta kulyani adi, An do ko ri ’dikin nan i kö ’yu na do kode i yitö bot i kepöddu na do; kogwon ko do tu da a nan de iti yu, koti ko do gwon ya a nan de gwe nyu; a ŋutu kulok de gwe a ŋutu kwe, a ŋun ilot de gwe a ŋun lio;

¹⁷ ko do de twakin da a nan de twaki nyu, a nukani nyu. Ti MATAT konakiŋdye nan arabat ko lwolwoŋ kine koti ko kodyo ’bayin a twan na koŋa yi ko do.

¹⁸ A Naomi ko meddi adi lepeŋ gwon i tiddya i tu ko nye a nye yiŋani taliŋ.

¹⁹ Nyena a se liŋ murek iti tu tojo se a ’dur Beteleme. A ko gwe sona na ’durökiŋdye se Beteleme nu, a köji liŋ iŋge soŋu i kulya kase, a ŋutu wate kulyani adi, Ŋina ’diri a Naomi le?

²⁰ A nye kulyani ko lepeŋat adi, Ko nyuŋ luŋ ta nan a Naomi, nagon lupe ta nan a Mara, a kogwon Ŋun Kabulönit lo ŋo liŋ a konakiŋdya nan kulya na pötwör.

²¹ Yi köju tu kaŋo Jore, ama MATAT aje nyökuŋdyö nan bot kana. Nyo ta koti luŋ nan a Naomi? MATAT aje tukökiŋdyö kulya kwe adi nan a naron, iŋkoi Ŋun Kabulönit lo ŋo liŋ a konakin nan arabat.

²² Nyena a Naomi yitöni yitö se ko Ruta Moabatyo narakwan na tore, nagon a yitö ko nye i Jur lo Moaba nu. A se ’dure Beteleme i suluwa na ’butun ŋeret lo ’bolot saora.