Nemaya 13 - Bibilia Buk na Ŋun nagon koti luŋu a

Nemaya a möŋu teteŋdya kulya nagon a lyaŋesi kune

¹ A gwe sona i ŋilu lor, a lepeŋat kena kiŋdye ŋutu liŋ buk na Mose; a se iŋge ryo a wuroki i lukata nanyit adi ŋuto lo Amon, kode lo Moaba kodyo ti bulö ruköki kwöŋ i momoret na ŋun likaŋ ŋupi;

² kogwon se koju a ko tu i rum ko ŋutu ti Yisaraele i lwöggu na lepeŋat ko kinyo kode ko pioŋ, ama kölumbö a gwörökiŋdye Balam a miriku i lömbu na se—ama a Ŋun likaŋ lopuke lömo a ’boriet.

³ A nagon ŋutu liŋ aje yiŋ ŋilo saret nu, a ŋutu ti Yisaraele geladdi ŋutu liŋ kaŋo kase kiden logon ’bayin a gweyari lose.

⁴ I ŋerot na kine kulya, koane Elia­siba a wulwe a kamemetanit lo kadijik na ’di ’dik ti kadi na Ŋun likaŋ. Kudyakan toyem kata i kiden na kotumit na Eliasiba ko na Tobia.

⁵ a Eliasiba wulökiŋdye Tobia kadi duma nagon köju ’delarikin ’dokesi ti ’bolot, ko bökur, ko tito, se ko swötön topuökisi ti ’bolot, ko ti binyo, ko ti welet nagon a saraki adi ködyö a ti Lewijin, ko a ti kayolok, ko a ti katiyuk ti kötumitön, se ko koresi ti kinyojin nagon a ti koanejin.

⁶ Ama i diŋit na konarikin kine kulya nu, a nan gwe ’bayin Yerusa­lema, kogwon i kiŋa tomerya musala wot murek na gwoŋdi Aretasaseta a mor lo Babela nu, nan a tu ko lepeŋ yu. A i mukök nanyit a nan pipije mor

⁷ anyen ruköddu nan i tu Yerusalema, a na ’durökiŋdye nan nyu nu, a nan iŋge ryeju toron nagon Eliasiba a kon i tetenakiŋdya na Tobia kadi i lukata na ’baŋin ti kadi na ŋun.

⁸ A nan iŋge woran parik, a gumbe tito liŋ ti Tobia kaŋo i lukata na kadi.

⁹ A kirut nan tiŋdi saret anyen lepeŋat totoke kadijik na ’di ’dik; a iŋge toyitun tito ti kadi na Ŋun i lukata nase, se ko ’dokesi ti ’bolot ko bökur.

¹⁰ A nan köti iŋge denun kaŋo adi Lewijin a ko wuju koresi kase ti kinyojin, nyena a lepeŋat ko kayolok lo kita nyu kulu iŋge wökön kase i meleseno.

¹¹ A nan kekeŋdi ko woran ko ŋutu temejik adi, Ko nyo kadi na Ŋun kökölöki? A nan köti nyökuŋdye lepeŋat bot a soŋdi se i kitajin kase.

¹² A kirut ŋutu liŋ ti Yuda joŋdi swötön topuökisi ti ’bolot, ko ti binyo, se ko ti welet i kadijik ’delesi.

¹³ A nan wuluŋdye kamemetak ti kadijik ’delesi logon a ko Selemia koane, ko Sadok kawurönit, ko Pedaya Lewityo, ko Kanan a yumi lose logon a ŋuro lo Takur, ŋuro lo Matania, kogwon lepeŋat a dena a ŋutu lo yiyiniki i kita kulo; a kita nase gwe a na korakiŋdya na luŋasirik kase kinyojin.

¹⁴ Böŋö ko na ŋo, yeyene yeye nan pon Ŋun lio, an do ko seyara kaŋo kitajin na ’but nagon nan a kon a ti kadi inot Ŋun lio, se ko kita nanyit.

¹⁵ A i kilu perok a nan iŋge meddya ŋutu ti Yuda i ryoggaŋ na ludweki ti binyo i piritön ryokesi i lor lo sabata, ko kulye suggö ’domio ti ’bolot a sopakiŋdye i kaineki loki. Köti a nan iŋge meddya binyo, ko ludweki ti binyo, ko ki ’biet, ko kunie ŋo jore ka ’de ka ’de nagon lepeŋat a yekun Yerusalema i lor lo sabata. A nan saŋi lepeŋat i ŋilu lor lo tugwöŋ i se kinyojin lu.

¹⁶ A ŋutu ti Turo logon si ’da i köji na Yerusalema kulu köti yekuŋdye somot ko kunie ŋo jore anyen tugwörökin ŋutu ti Yuda i lor lo sabata Yerusalema yu.

¹⁷ A kirut nan kekeŋdi ko woran ko ŋutu loku­kwön ti Yuda adi, Ŋina toron a nyo na kon ta i köŋu na lor lo sabata?

¹⁸ ’Bayin a merenyejin kasu ŋona lo koŋdya sona, ko ’bayin a Ŋun likaŋ lo tiŋdu yi kune ŋo narok liŋ kayaŋ loki ko i na köji le? Ama ta köti yöŋö joŋdya nene woran ludukötyo i Yisaraele ko kulya ti köŋu na lor lo sabata.

¹⁹ A nagon kötumitön ti gorom nagon a mariŋ na köji na Yerusalema aje tokela i ŋerot na sulua na sabata nu, a nan saŋi saŋu anyen kötumitön ködyö kikinu, adi ti ŋutu gwe ti ŋaju tojo ko sabata aje tutuŋgö. Nan köti a korakiŋdya köliŋönök kwe i meddya na kötumitön anyen teŋgu ŋutu i yekuŋdya na kinyojin i lor lo sabata.

²⁰ Nyena a katugwörök ko katujarak ti gweyajin ti ŋo liŋ ka ’de ka ’de mönuŋdye kaŋo na Yerusalema ko diŋitan ku ’dik.

²¹ Ama a nan iŋge kekeŋdya ko lepeŋat ko woran adi, Ko nyo ta mönuŋdyö nyona ko gorom? Ko ta köti a koŋdya sona nan de ririŋ ta. Nyena suluja i ŋinu diŋit tojo ko ŋerot lepeŋat a ko po i sabata.

²² A nan saŋi Lewijin adi ti se toke ’yi ’börik anyen po i tiju na kötumitön ti gorom nagon a mariŋ, anyen ’debba lor lo sabata a loke lo rurwan. Böŋö ko na ŋo köti, yeyene yeye nan pon Ŋun lio, i kenaki­ŋdya na nan ’bulit, ko pitöki nan gwoso i todumalan na nyaŋu inot nagon ti ’duddyo kwöŋ na.

²³ I kilu perok köti nan meddya Yudayaki logon a yemba ŋutu wate ti Asedoda, ko ti Amon, se ko ti Moaba;

²⁴ a lojore ti ŋwajik kase jambi kutuk na ŋutu ti Asedoda, a tine den jambu kutuk na ŋutu ti Yuda, ama a jambi kutusen ti kilu ŋutu ka ’de ka ’de.

²⁵ A nan kekeŋdi kekeŋdya ko wotan a lömbi lepeŋat, a nan gwuddye kulye kase a roŋdi kupir kase; a nan tiŋdi lepeŋat i milyeju i karin ti Ŋun adi, Yi mo ti tiŋdu ŋwajik kaŋ i yema ko ŋwajik kase, kode tiŋdu ŋwajik kaŋ i yemba na ŋwajik kase, ma ’di yi köti ti bulö yemba se.

²⁶ A nan köti kulyani adi, Solomona mor lo Yisaraele ŋona a ko toroŋdya a kwe na kulya ti wate gwoso kine le? Lele mor ’bayin gwoso lepeŋ i kiden na juron jore, a ŋun lonyit iŋge nyar lepeŋ a tiŋdi lepeŋ a mor lo Yisaraele ’bukuluŋ; ma ’di sona ŋutu wate nagon ’bayin a gweyari nikaŋ a tikin lepeŋ i toroŋdya.

²⁷ Nyena yi de ŋona bubulo ruggo kulya kasu i koŋdya na ŋina toron duma, anyen lauŋdya Ŋun likaŋ i yemba na ŋutu wate nagon ’bayin a gweyari nikaŋ le?

²⁸ A lele lo ŋwajik ti Yoyada ŋuro lo Eliasiba koane duma gwe a komonit lo Sanabalat lo Koron; nyena a naniŋge rikokin lepeŋ koyo ni.

²⁹ Böŋö yeyene yeye lepeŋat pon Ŋun lio, kogwon se a toluddya kita na koanejin ko tomoret nagon do Ŋun, ko koanejin, se ko Lewijin a teten na.

³⁰ Nyena nan a toke ’ya lepe i ŋo liŋ ka ’de ka ’de nagon a ti Lwaka, a nan tetenakiŋdye koanejin se ko Lewijin saresi ti kitajin kase ka ’de ka ’de;

³¹ a nan koti tetenakiŋdye saresi yekesi ti kaden namesi, ko ti kinyojin waŋesi i diŋitan kase na wulwe. Bönö yeyene yeye nan i kenakiŋdya na nan ’bulit pon ŋun lio.