Marako 3 - Bibilia Buk na Ŋun nagon koti luŋu a

ŋuto logon könin a lokworok

¹ A Yesu köti lupöni i kadi momoret, a lele ŋuto gwe nyu logon könin a lokworok.

² a kulye ŋutu diŋe Yesu, a meddi kode nye ŋona totoke ŋilo ŋuto i Sabata, anyen se bubulö tuggö adi nye a koŋdya toron.

³ A nye takiŋdye ŋuto logon könin a lokworok lo adi, Ŋine ki ko ŋutu kiden.

⁴ A kirut Yesu pije se adi, Nan nagon saret a ruk adi ti konani kona i Sabata? Ŋo na ’but, kode ŋo naron? I lwöggu na ŋutu kode i tatuja na se? Ama a lepeŋat yiŋani taliŋ.

⁵ a nye boŋgi lepeŋat ko woran a iŋge delya kogwon töilyet kase a iŋgo, a nye takiŋdye ŋuto lo adi, Riörö könin ilot. A lepeŋ riöddi riöddu, a könin lo lepeŋ gwe a lo ’but.

⁶ A Parusijin lupuŋdye kaŋo i kadi momoret, a momori ’de ’de ko ŋutu lo juŋdyö Erode kilo i pirit na geleŋ, a suluje yeyeet nagon mwönyörikin Yesu, ko lepeŋ tatua ada.

Lodir lo ŋutu i kijit na tor

⁷ A Yesu se ko ŋutu kanyit kajujumuk kulo kö ’yi ŋinu pirit a iti i tor na Galilaya, a ŋutu jore kepoddi lepeŋ, logon a po Galilaya ko Yudaya,

⁸ ko Yerusalema, ko i kak na Idumea, ko i nu pele na Yardene, se ko ŋutu ti jur lo Turo ko Sidona. Kilo ŋutu jore parik a tu ko lepeŋ yu kogwon se a yiŋ liŋio ti ŋo liŋ nagon lepeŋ aje kon kune.

⁹ A nye takiŋdye ŋutu kanyit logon a kajujumuk kulo anyen ki ’bo lo ’dit möŋdu kanyit nyona kogwon ŋutu jore parik, an lepeŋat ködyö ri ’dija nye;

¹⁰ kogwon lepeŋ aje toke ’ya ŋutu jore, nyena a ŋutu liŋ lo gwon ko twana ri ’diaddi ’börik ko lepeŋ yu i ’bo ’yu na lepeŋ.

¹¹ A na meddi mulökö lorok lepeŋ nu, a se ’do ’done kak ko lepeŋ i komor, a woŋe adi, Do a Ŋuro lo Ŋun.

¹² A nye kukuji se parik adi an se ködyö tin nye i dena.

Yesu a wuluŋdyö luyökie puök wot murek

¹³ A kirut Yesu kiyaddi i merya a luŋukiŋdye mugun ŋutu logon nye ’de ’dekan kulo; a se iti ko lepeŋ yu.

¹⁴ A nye wuluŋdye ŋutu puök wot murek anyen gwon ko lepeŋ, ko anyen yökiöji i tokuöddu na Loŋe Lo ’but,

¹⁵ ko anyen wuju kido nagon riköddi mulokö lorok kaŋo.

¹⁶ Nyena a karin kase gwe a ko Simona logon nye a gwijö a Petero;

¹⁷ ko Yakobo Ŋuro lo Jebedayo se ko Yoane luŋaser Yakobo, logon nye a gwijö se a Boanerege, logon nyönyökö adi rörö ’yu gwoso kipya lo ki;

¹⁸ ko Aŋöarea, ko Pilipo, ko Bartolomayo, ko Matayo, ko Toma, ko Yakobo Ŋuro lo Alapayo, ko Tadayo, ko Simona Kawelonit,

¹⁹ ko Yuda Isikariota lo tiŋdu lepeŋ i tatua lo. A kirut Yesu iti mede.

Yesu a nöki adi lepeŋ gwon komulökötyo Joron logon a Belejebula

²⁰ A ŋutu jore köti momoruŋdye i pirit na geleŋ, nyena a Yesu ko ŋutu kanyit tine bulö nyesu.

²¹ A na yiŋge karu kanyit kine kulya nu, a se lupuŋdye kaŋo i morga na lepeŋ, kogwon se kulya adi, Lepeŋ a mamala.

²² A katodinök ti Saresi ti Mose logon po Yerusalema yu köti kulyani adi, Lepeŋ gwon ko Belejebula, a nye riköddi mulökö lorok kaŋo ko riŋit na duma lo mulökö.

²³ a Yesu lupundye ŋutu kulo kanyit ni, a pije lepeŋat i lilim adi, Satani bubulö riköddu Satani kaŋo ada?

²⁴ Ko ködyö tumatyan a koŋa mugun, ŋina tumatyan ti bulö yeŋon a tumatyan.

²⁵ a ko ködyö mede a koŋa mugun, ŋina mede ti bulö yeŋon a mede.

²⁶ A ko Satani ködyö a ŋien ki i mörö ko mugun nanyit, a iŋge koŋa, a nye tine bulö yeŋon, a ŋina gwe a ’dutet nanyit.

²⁷ Ama ŋuto ’bayin logon bubulö lupö ko ŋuto lo riŋit kadi i ryaggu na tito kanyit, a kokwe kiyaŋ lepeŋ totor ŋuto lo riŋit lo; a kirut a nye ’diri bulöni bulö ryaggu kadi nanyit.

²⁸ ’Diri nan takiŋdya ta adi, ŋutu bubulö pitöki i toronjin kase liŋ ma ’di laesi liŋ nagon se lalauŋdye kine;

²⁹ ama ŋuto logon lauŋdya Mulökötyo Loke lo ti bulö pitöki kwöŋ, ama lepeŋ gwon ko toron nagon ti ’baka.

³⁰ Yesu jambu kine kulya kogwon lepeŋat a kulya adi nye gwon ko mulökötyo loron.

Ŋote Yesu se ko luŋasirik ti Yesu a po

³¹ A kirut ŋote Yesu se ko luŋasirik kanyit lo ’dure; a se gwo ’de kaŋo, a se soŋdi ŋuto i dogga na lepeŋ.

³² a ŋutu jore iŋge si ’daki ko Yesu nyona, a se takiŋdye lepeŋ adi, Ŋuti ko luŋösurök kulu kaŋo pija do.

³³ a Yesu pije adi, Ŋa nagon a yaŋgo? Ko ŋa logon a luŋasirik kwe?

³⁴ a nye boŋgi ŋutu logon si ’da kanyit nyona kulo, a nye kulyani adi, Kulo ŋutu a yaŋgo ko a luŋasirik kwe!

³⁵ ŋuto logon kökon ŋo nagon Ŋun ’de ’dekan na, nye lo gwon a luŋaser lio, ko a kiaser nio, ko a yaŋgo.