Marako 15 - Bibilia Buk na Ŋun nagon koti luŋu a

Yesu a joŋa ko Pilato i komor

¹ A ’de ’de nagon kak aje waran, A a koanejin temejik, ko ŋutu temejik, ko katodinök ti Saresi ti Mose se ko momoret liŋ na ŋutu kaliliyak ti kulya teteŋdi yeyeet nase; a se toŋi Yesu, a nyomöddi lepeŋ kaŋo, a wukiŋdye lepeŋ ko Pilato i könin.

² A Pilato pije lepeŋ adi, Do nye ŋilo Mor lo Yudayaki lo? A Yesu waddi lepeŋ adi, Do lo jambu sona.

³ A koanejin temejik ŋökiŋdye lepeŋ ŋo jore.

⁴ A Pilato köti pije lepeŋ adi, Do ’bak ruket i kine kulya le? Meddi, lepeŋat aje ŋökin do ŋo jore.

⁵ Ama a Yesu gwe a ko waddu nene ŋo köti, nyena a Pilato iŋge söŋu.

Yesu a ’duŋöki i tatua

⁶ Nyena temba i diŋit na ŋilo rorwe Pilato yeŋ yukukiŋdyö lepeŋat ŋuto geleŋ lo rereka logon lepeŋat a piyun.

⁷ A lele ŋuto karin kanyit a Baraba gwe i kadi rereket, i pirit na geleŋ ko ŋutu logon a ŋikin i mörö ko miri kulo, ŋilo ŋuto a tatuja ŋutu i ŋinu diŋit.

⁸ A ŋutu jore mimijörö nyona a suluje pija Pilato anyen konakiŋdya se gwoso na yeŋ na.

⁹ A lepeŋ pije se adi, Ta ’de ’dekan nan yukukiŋdyö ta Mor lo Yudayaki le?

¹⁰ Kogwon nye a den ’bura adi koanejin temejik aje wukiŋdya Yesu kanyit i könin kogwon se yiyinöri lepeŋ.

¹¹ Ama a koanejin temejik jujukiŋdye lodir lo ŋutu anyen Pilato yukukiŋdyö se Baraba ti gwon a Yesu.

¹² A Pilato köti pije lepeŋat adi, A kirut nan de konakiŋdye ŋilo ŋuto nyo logon ta luŋ a Mor lo Yudayaki ŋilo?

¹³ A lepeŋat köti woŋe adi, Ti lepeŋ ’bikikine i ködini na görö!

¹⁴ A Pilato pije se adi, Ko nyo? Nan toron nagon lepeŋ a kon? Ama kölumbö a lepeŋat woŋe bia parik adi, Ti lepeŋ ’bikikine i ködini na görö!

¹⁵ a Pilato ’deke tulyöŋgu lodir lo ŋutu, nyena a nye yukukiŋdye lepeŋat Baraba; a nye tiŋdi Yesu i ’bitö ko kurubat logon a kwara, a kirut nye wukiŋdye lepeŋ i ’bikiki i ködini na görö.

Kamörök a kwekweni ko Yesu

¹⁶ A kamörök nyömuŋdye Yesu i ’baŋ lo gwon i lukata na mödöria lo; a lepeŋat luŋgi teŋ na kamörök liŋ i pirit na geleŋ.

¹⁷ A se tojubbi Yesu ko boŋgo na ’bule, a se iŋge doggu kikwa a Iŋguya, a sukiŋdye ko lepeŋ i kwe.

¹⁸ A se suluje roman ko lepeŋ adi, Madaŋ, pon Mor lo Yudayaki!

¹⁹ A se ’biddye lepeŋ i kwe ko pa ’duŋi, a yaggi kamulak ko lepeŋ ki, a se rugwuŋökine kak i twöju na lepeŋ ’dö ’döju.

²⁰ A nagon se aje kwekweni ’e lepeŋ nu. a se rusuŋdye boŋgo na ’bule na kaŋo ko lepeŋ i mugun, a se tojubbi lepeŋ ko boŋgwat kanyit kune. A se nyömöddi lepeŋ kaŋo i ’bikikiŋdyö i ködini na görö.

Yesu a ’bikiki i ködini na göro

²¹ A i kiko a se ri ’dikiŋdye lele ŋuto logon po i jur i ’doggu na ködini na görö na Yesu. Karin ti ŋilo ŋuto a Simona lo po Kurene. Lepeŋ a monye lose Alesaŋöero ko Rupa.

²² A kamörök joŋgi Yesu tojo i pirit na luŋu a Gologota (nagon nyönyökö adi Pirit na kululuŋ).

²³ A se tiŋdi Yesu binyo a ŋola ko mur, ama a nye gwe a ko mat se.

²⁴ A se ’bikikiŋdye lepeŋ i ködini na görö, a se kökorakiŋdye ’börik boŋgwat kanyit kune, a se gumbe guralan anyen kwekiŋdya kode ŋona ŋuto geleŋ joŋga kunen boŋgwat.

²⁵ A i diŋit na ’bikikiŋdye se lepeŋ i ködini na görö nu gwe a saa buŋwan na ko ’bure.

²⁶ a ŋoit nanyit iŋge wurö adi, MOR LO YUDAYAKI.

²⁷ a i ŋinu diŋit na geleŋ nu, a se ’bikikiŋdye karyakak murek nyu i kaden na görö, lele ko Yesu i swot lo lutaten ko lele i swot lo kadoŋe. [

²⁸ A kulya ti Ŋun na wurö kune iŋge kona adi, Nye a kena ko katoronyak i pirit na geleŋ.]

²⁹ A ŋutu logon lwöŋöddi nyona kulo ’dö ’döji lepeŋ, dodoŋga kusik kase, a kulyani adi, Aha! Do logon ’de ’dekan dukakiŋdya Kadi na Ŋun kak a ’duke ’duk nye i perok musala lo!

³⁰ Lwöki mugun koi! Poŋdi kak i ködini na görö!

³¹ Nyena koti a koanejin temejik se ko katodinök ti Saresi ti Mose kwekwenine ko ’börik i kulya ti lepeŋ adi, Lepeŋ lwöggu kulye ŋutu; ama nye ti bulö lwöggu mugun.

³² Ti Masia Mor lo Yisaraele poŋdi kak i ködini na görö soŋinana, anyen yi böŋö memet a yupe yuŋ. A ŋutu logon ’bikiki ko lepeŋ i pirit na geleŋ kulo köti ’do ’döji lepeŋ.

Twan na Yesu

³³ A nagon gwe a tuparan kiden nu, a kak liŋ worani a mudwe tojo ko saa musala na koriri.

³⁴ a i saa musala na koriri, a Yesu woŋe ko gworo lobot adi, Eloi, Eloi, lama sabakatani? nagon nyönyökö adi, Ŋun liŋ, Ŋun liŋ, nyo do kökölökin nan?

³⁵ a kulye ŋutu logon gwo ’dan nyona kulo ko yiŋge lepeŋ i luŋgu sona, a lepeŋat kulyani adi, Yiŋge ’ta, nye luŋgu Eliya.

³⁶ a lele ŋuto lo wöku, a jurutökiŋdye liŋa i binyo naparoroŋ, a sukiŋdye i pa ’duŋi, a ŋutukiŋdye lepeŋ anyen mamat, a kulyani adi, Möni ta mön, ti yi mete ta met kode ŋona Eliya de popo i ’dumuŋdya na lepeŋ kak.

³⁷ a kirut Yesu woŋe parik ko gworo lobot, a duwuŋdye duwuŋdya.

³⁸ A boŋgo koret na Kadi na Ŋun iŋge ki ’ya murek. suluuŋdya ki tojo ko kak.

³⁹ A nagon duma lo kamörök mia geleŋ logon gwo ’dan komorga lepeŋ lo ko meddi Yesu i duwuŋdya, a nye kulyani adi, Lo ŋuto ’diri a Ŋuro lo Ŋun.

⁴⁰ A kunie ŋutu gwo ’de pajo i meddya. A kunie kase na gwon nyu kunu gwe a ko Maria na po Magadala, ko Salome, se ko Maria ŋote Yakobo lo ’dit ko Yose.

⁴¹ Kine wate köju na kebbu lepeŋ Galilaya yu a iŋge parakiŋdya lepeŋ. Kunie wate jore köti gwon nyu nagon koju a moraddu ko lepeŋ Yerusalema.

Nuka na Yesu

⁴² A nagon kolor gwe nyona ko ’doro nu, nyena kogwon a Lor Tetenet i ŋerot na Sabata,

⁴³ a Yosepa lo po Arimataya gwe ko töili iŋgo a iti ko Pilato yu a piyuŋdye öpu na Yesu. (Ŋilo ŋuto kukwon i teŋ na ŋutu kaliliyak ti kulya, logon ko mugun nanyit yeyeŋdu Tumatyan na Ŋun.)

⁴⁴ A Pilato iŋge soŋu i yiŋga adi Yesu aje twan, a nye luŋgi duma lo kamörök a pije lepeŋ kode Yesu ŋona ’diri aje twan.

⁴⁵ a nagon nye aje denun ’bura ko duma lo kamorök adi lepeŋ aje twan nu, a nye rukökiŋdye Yosepa öpu na Yesu na.

⁴⁶ A Yosepa gwöruŋdye boŋgo na ’but, a ’dumuŋdye öpu na kak i ködini na görö, a doggi ko boŋgo na ’but, a ’delakiŋdye i gulom nagon a kuruwe i lurutat logon a ŋurupit; a nye gwuluŋökiŋdye ŋurupit duma anyen muggo kutuk na gulom.

⁴⁷ A Maria na po Magadala se ko Maria ŋote Yose iŋge met pirit na ’delari lepeŋ nu.