Marako 13 - Bibilia Buk na Ŋun nagon koti luŋu a

Yesu a jambu i kulya ti luro na Kadi na Ŋun kak asut

¹ A nagon Yesu aje lupuŋdyö kaŋo i Kadi na Ŋun nu, a lele lo ŋutu kanyit kajujumuk kulyani ko lepeŋ adi, Katodinönit! Meddi kine ŋurupö dumalak parik se ko kadijik nakwekwelen!

² A Yesu pije lepeŋ adi, Do meddya kine kadijik dumalak le? Ŋurupit nene geleŋ molu ti kölöki ni i nene loki nagon mo ti gubaki kak.

Yöyöŋesi se ko sasanyesi

³ A nagon Yesu gwon i si ’da i Mere lo Jeitun komorga Kadi na Ŋun nu, a Petero, ko Yakobo, ko Yoane se ko Aŋöarea pije lepeŋ na gwoŋdi se ka ’de nu, adi,

⁴ Taki yi diŋit nagon kine ŋo mo kokonari, köti kweyet mo a nyo nagon kine ŋo liŋ mo tetemakiŋdya?

⁵ A Yesu suluje jambu ko lepeŋat adi, Kunyar ta an lele ŋuto togir ta.

⁶ Ŋutu jore mo popo i karin kwe a kulyani adi se a nan, a se mo togiŋe ŋutu jore.

⁷ A na yiŋge ta kulya ti mörö ko lodokon ti mörö nu, an ta ko kujönö ta; kine ŋo agu ködyö kokona, ama ’dutet nyuŋ ’bak.

⁸ Kogwon jur mo mömörö ko lele jur, a tumatyan mo möröni ko nene tumatyan, a rigirigilön mo gwe i piriton ka ’de ka ’de, a dyaŋan mo lo gwe; kine ŋo a ŋoŋesi suluesi.

⁹ Ama kunyar ta ’börik; kogwon kulye ŋutu mo momok ta a joŋgi ta i putet; a ta mo ’bitöni ’bitö i kadijik momoresi, a ta mo gwo ’de i komor na mödirön ko na moran kogwon kulya kwe, anyen tokurukiŋdyö kine kulya kase i komor.

¹⁰ Ama Loŋe Lo ’but ködyö totokuoŋ i ŋutu liŋ ti jurön a kokwe na ’dutet na ŋo liŋ.

¹¹ A nagon lepeŋat aje momorga ta a joŋgi ta i putet nu, an ta ko wiwinya ta a kokwe i ŋo nagon ta mo jajam kine; ama jambi ta ŋo nagon mo titiki ta i ŋinu diŋit, kogwon mo ’bayin a ta lo jambu ama a Mulökötyo Loke lo jambu.

¹² A luŋaser mo wukiŋdye luŋaser i tatua, monye mo wukiŋdye Ŋuro lonyit, a ŋwajik mo ŋiki i mörö ko monye lose ko ŋote nase, a tiŋdi lepeŋat i tatua;

¹³ a ŋutu liŋ mo mane man ta kogwon karin kwe. Ama ŋuto logon a ŋoŋga tojo ko ’dutet lo mo lwölwökö.

Ŋoŋga duma parik

¹⁴ Ama ko ta a met ŋo na mamana parik nagon koŋu keri a togwi ’diki ki i pirit nagon ködyö ’bayin a nanyit na, (ti ŋuto logon kekeŋdya lo kuru kurun), a kirut ti ŋutu lo gwon Yudaya kulo wöki i merya.

¹⁵ Ti ŋuto lo gwon i lo ’dek lo kadi lo gwe ti kiyuŋdya kak anyen lupö kanyit kadi i ’dumaddu na nene ŋo.

¹⁶ Ti ŋuto lo gwon i melesen lo gwe ti yitwe i ’dumaddu na boŋgo nanyit.

¹⁷ Ama gwon a delya i ŋutu na gwon ko pelela, ko i se na tutunöggu i kilu perok!

¹⁸ Momo ’yi ta anyen kine kulya böŋö gwon ti pokin i diŋit na katirut.

¹⁹ Kogwon i kilu perok ŋoŋga duma mo gwon kata gwoso nagon ’beron a ko gwoŋdi na, suluja i diŋit na gweji Ŋun kak nu, tojo ko na diŋit, a molu tine pokin köti kwöŋ.

²⁰ a ko ködyö MATAT a ko nyökun perok kak, a ŋuto ködyö gwe ’bayin lo lwölwökö; ama a nye iŋge nyökun perok kak kogwon kulya ti ŋutu lo wulwe logon nye aje nyumun kulo.

²¹ Nyena a ko lele ŋuto kulya ko ta i ŋinu diŋit adi, Meddi ta, Masia malo! kode adi, Meddi ta, nye malu! an ta ko yuŋ ta ŋo na jam lepeŋ kine.

²² Masiajin ’burönök ko nebijin ’burönök mo pupukun, a mo kweji kweyesi ko ŋo sörösi, anyen togiŋa ma ’di ŋutu lo wulwe ko bubulö.

²³ Ama kunyar ta; nan aje tukokin ta ŋo liŋ a kokwe nagon kine ŋo a ko nyuŋ pokin nu.

Po na Ŋuro lo ŋuto

²⁴ Nyena i kilu perok, i mukök na ŋinu diŋit ŋoŋet, a kolor mo musöni musö, a yaŋa mo tine pararaju,

²⁵ a kaser ki yu mo ’do ’done kak, a riŋitön ti ki mo yeyeti yeyeta.

²⁶ a kirut ŋutu mo meddi nan Ŋuro lo ŋuto popo i ’dikolo ko riŋit a duma parik se ko minyo.

²⁷ A kirut nan mo soŋdi malaikajin i momoruŋdya na ŋutu kwe lo wulwe i swötön iŋwan ti kak, suluja i ’dutet na kak tojo ko nene ’dutet.

Todinet i kulya ti ki ’bi

²⁸ Denuŋdye ta lilim lo ki ’bi adi, ’De ’de nagon kenia kanyit wile wilan a koropo nu, a ta dene den adi kiser gwe nyona.

²⁹ Nyena köti na meddi ta kine ŋo i kona nu, a ta deŋdi adi nan gwe nyona ko po, ’diri nan gwe i kötumit.

³⁰ ’Diri nan takiŋdya ta adi, ŋutu ti na toberon mo ti ’duddyö a kokwe nagon kine ŋo liŋ mo kokonari nu.

³¹ Ki ko kak mo ’du ’duddyö, ama kulyaesi kwe mo ti ’duddyö kwöŋ.

ŋuto ti den ŋilu lor kode ŋinu diŋit

³² Lele ŋuto ti den ŋilu lor kode ŋinu diŋit, ma ’di malaikajin ti ki a ko den, ma ’di nan Ŋuro a ko den, ama ka ’de Baba lo deŋdya.

³³ Kunyar ta, an ta ko dodoto ta; kogwon ta ti den ko diŋit na kine ŋo mo gwon nanu.

³⁴ Kine kulya gwon gwoso nagon lele ŋuto tu i jölö, a na kö ’yi nye ’baŋ nanyit nu, a nye sarakiŋdye kölipönök kanyit i meddya na ’baŋ, ŋutu liŋ geleŋ geleŋ ko kitajin kase, a nye sarakiŋdye katiyunit lo kötumit adi ti nye gwe ti doto.

³⁵ Nyenagon an ta ko dodoto ta, kogwon ta ti den ko monye ’baŋ mo yiyitwe nanu, i sömukö kode i tukwaje kiden, kode i sira na sokoro, kode i waran na kak;

³⁶ a ko lepeŋ a ’durökin adi dut an lepeŋ ko ryö ta i doto.

³⁷ ŋo nagon nan jamakin ta na a na ŋutu liŋ adi, Ti konyen kasu gwe ŋa.