Marako 12 - Bibilia Buk na Ŋun nagon koti luŋu a

Lilim lo luköbi na binyo se ko kakuruk

¹ A nye suluje jambu ko lepeŋat i lilimön adi, Lele ŋuto a ’yuddu kaden ti binyo i lukobi, a rikije rikija ko mariŋ, a ’boggi dili ryoket na ludweki ti binyo, a tetenakiŋdye taka, a nye sarakiŋdye ko kulye kakuruk i konisi, a nye iti i lele jur.

² A nagon gwe a diŋit na ’butun nu, a nye soŋdi kölipönit ko kakuruk yu i joŋdya na kulye ludweki ti binyo ko lepeŋat yu.

³ A kakuruk morgi lepeŋ a ’biddye lepeŋ, a riköddi lepeŋ kaŋo ’bak nene ŋo i könin.

⁴ Köti a nye soŋdi lele kölipönit ko lepeŋat yu, a se iŋge böŋörö lepeŋ i kwe, a sasaŋdi lepeŋ parik.

⁵ A nye soŋdi lele a se iŋge tatu lepeŋ; a se konakiŋdye kulye ŋutu lo son lepeŋ kulo jojo, lepeŋat gwugwut kulye, a tatuje kulye.

⁶ Nye nyuŋ gwon ko ŋuto geleŋ tuŋ logon a pilili lonyit lo Ŋuro lo nyanyara; a i ’dutet a nye soŋdi ŋilo Ŋuro ko lepeŋat yu, kulya adi, Lepeŋat ŋona de twötwö Ŋuro liŋ.

⁷ Ama a kilu kakuruk tokulyaki ko ’börik adi, Malo ŋuto logon mo ruddya lukobi na monye lo. Po ta, ti yi tatune ta tatu lepeŋ, a ŋina lukobi mo gwe a nikaŋ.

⁸ A se morgi lepeŋ, a tatuje lepeŋ, a gubaddi öpu nanyit kaŋo i luköbi na kaden ti binyo.

⁹ Nyena monye luköbi na binyo mo koŋdya nyo? Lepeŋ mo popo i tukaŋu na kulu kakuruk, a mo sarakiŋdye ŋinu lukobi ko kulye ŋutu i könisi.

¹⁰ Ta ŋona a ko ken kulya ti Ŋun na wurö kune le? Adi, Ŋurupit logon ka ’dukök a renya lo aje wora a ŋurupit tutuŋet lo goŋet lo kadi.

¹¹ Ŋina ŋo MATAT lo kita; a yi mete a ŋo sorit.,

¹² A se ga ’yi kiko logon morgi Yesu, ama a se kujono ni lodir lo ŋutu, kogwon se a kurun adi nye jambu ŋilo lilim i kulya kase; nyena a se kö ’yi lepeŋ a se iti tu.

Kaisar bubulö ropaki usur?

¹³ A kilo ŋutu temejik soŋdi kulye Parusijin se ko kulye ŋutu lo juŋdyö Erode kulo ko Yesu yu, anyen logga lepeŋ i jamesi kanyit.

¹⁴ a lepeŋat poŋdi po a kulyani ko lepeŋ adi, Katodinönit, yi deden adi do a ŋuto lo to ’diri, a do tine nyunyumbö ŋutu; kogwon do ti yeyeju todumalan na ŋutu, ama do todiŋdyö kiko lo Ŋun ko to ’diri. Saret ŋona a ruk adi Kaisar bubulö ropaki usur, kode ti bulö ropaki?

¹⁵ Yi ködyö roröŋ kode ’bayin? Ama a nye iŋge den adi lepeŋat a kamumulukak, a nye pije se adi, Nyo ta möŋu nan? Taki ta nan gurusutöt, anyen nan memet.

¹⁶ A se joŋdi joŋdya. A Yesu pije se adi, Ŋina ŋöjinoti se ko kilo wuresi a ti ŋa? A se waddi lepeŋ adi, A ti Kaisar.

¹⁷ a Yesu kulyani ko se adi, Ropaki ta Kaisar ŋo nagon a ti Kaisar, köti ropaki ta Ŋun ŋo nagon a ti Ŋun. A kulo ŋutu iŋge soŋu parik i kulya ti lepeŋ.

Yesu a piya i kulya ti ŋien i twan

¹⁸ A kulye Sadokejin poŋdi ko Yesu ni. (Kilo ŋutu jambu adi ŋutu ti bulö ŋien i twan.) A se pije lepeŋ adi,

¹⁹ Katodinönit, Mose aje wurökiŋdyo yi ŋilo saret adi, Ko luŋaser lo lele ŋuto a tw ’an a kölökiŋdye nakwan ’bak Ŋuro, a luŋaser lo ŋuto lo twan lo kodyö ruddye ŋina karu ’be, anyen yuŋwekiŋdyo luŋaser lonyit ŋwajik.

²⁰ Nyana luŋasirik kata buryo, a kayu lo iŋge yemba nakwan, a ŋilo ŋuto twane twan ’bak ŋwajik.

²¹ a loponi ruddye ŋina karu ’be, a ŋilo ŋuto twane twan ’bak ŋwajik. A ŋuto tomusala köti gwe sona;

²² tojo se liŋ buryo a twatwa ’bak ŋwajik. A i ’dutet nase liŋ a ŋina ŋuto köti iŋge twan.

²³ a i toŋiu na ŋutu lo twatwa a ŋina nakwan mo gwe a niŋa? Kogwon se liŋ buryo aje ’debba lepeŋ a nakwan.

²⁴ A Yesu waddi lepeŋat adi, Ta a lyaŋan. Lyaŋan nasu ŋona ti gwon kogwon ta a ko den kulya ti Ŋun na wuwurö kune ma ’di riŋit nanyit le?

²⁵ Kogwon i diŋit nagon ŋutu mo aje ŋien i twan nu, a se mo tine yemba kode yema, ama a se mo gwe gwoso malaikajin ki yu.

²⁶ Ama i kulya ti toŋiyu na ŋutu lo twatwa, ta kwoŋ a ko ken buk na Mose i ŋo na wurö i kulya ti rudu le? Adi, Ŋun a kulya ko Mose adi, Nan a Ŋun lo Abarayama, ko a Ŋun lo Yisaka, ko a Ŋun lo Yakobo.

²⁷ Lepeŋ ti gwon a Ŋun lo ŋutu lo twatwa, ama a Ŋun lo ŋutu lo gwon jörun; ta ’diri a lyaŋan parik.

Saret logon a duma lwölwöŋgu

²⁸ A lele lo katodinök ti Saresi ti Mose gwe kata logon a yiŋ lepeŋat i rerenya ko ’börik. A nye iŋge den adi Yesu a waddu se ’bura, a nye miju nyona, a pije Yesu adi, Lon saret logon a lo kokwe lo saresi liŋ?

²⁹ a Yesu waddi adi, Saret lo kokwe adi, Yiŋge ta pon kötumit na Yisaraele; MATAT Ŋun likaŋ a MATAT geleŋ;

³⁰ do ködyö nyanyar MATAT Ŋun ilot ko toili ilot liŋ, ko ködudwö inot liŋ, ko yeyeesi kunök liŋ, se ko riŋit inot liŋ.

³¹ Saret tomurek malo adi, Do kodyö nyanyar marate ilot gwoso mugun inot. Lele saret ’bayin logon a duma lwölwöŋ kulo.

³² A katodinönit lo Saresi lo kulyani ko lepeŋ adi, ’Diri koi Katodinönit; do a jambu ko to ’diri adi Ŋun geleŋ, a lele gwe ’bayin ama nye geleŋ tuŋ.

³³ Nyena ko ŋuto nyanyar Ŋun ko töili lonyit liŋ, ko kuruŋdyö nanyit liŋ, ko riŋit nanyit liŋ, a ko lepeŋ nyanyar marate gwoso mugun nanyit, kweja adi kine kulya lwölwöŋ rubaŋgajin liŋ lo ’yu ’yura se ko ’dokesi liŋ.

³⁴ A nagon Yesu aje den adi ŋilo ŋuto aje nyobba ko tokoŋon nu, a nye kulyani ko lepeŋ adi, Do ’bayin pajo i Tumatyan na Ŋun. A i mukök na ŋina a lele ŋuto gwe ’bayin logon pija lepeŋ ko nene piyet kogwon se kukujönö.

Yesu a pija i kulya ti Masia

³⁵ A na gwoŋdi Yesu i todiŋdyo i Kadi na Ŋun nu, a nye pije adi, Ada lolor nagon katodinök ti Saresi ti Mose kulya adi Masia a Ŋuro lo Dawidi?

³⁶ Dawidi lepeŋ lo kulya ko riŋit na Mulokötyo Loke adi, MATAT Ŋun a kulya ko MATAT liŋ adi, Si ’dakine köyö i könin lutaten, tojo ko nan a tin do i ryokakiŋdya na merok kulök kak.

³⁷ A ko Dawidi lepeŋ luŋgu Masia a MATAT lonyit, a Masia gwe a Ŋuro lonyit ada? A lodir duma lo ŋutu lyöŋi lyöŋön i yiŋga na Yesu i jambu.

Yesu a kunyaŋu ŋutu i kulya ti katodinök ti Saresi ti Mose

³⁸ a na todiŋdye nye nu, a nye kulyani adi, Kunyar ta i kulya ti katodinök ti Saresi ti Mose logon nyanyar walaŋ a jupu boŋgwat najo a nyare nyar romarikin i piritön gwöriesi.

³⁹ Lepeŋat nyanyar si ’da i si ’daesi ti ŋerot i kadijik momoresi, a nyaŋi si ’da i piritön ti ŋutu lo kukwön i rorweki.

⁴⁰ Kilo a ŋutu logon nyesu ŋo ti karu ’bejin, kölumbö a se kwakwaddi diŋit a najo mumulugga. Lepeŋat mo ririŋa bia parik.

’Dogga na karu ’be

⁴¹ A Yesu si ’dani komorga saŋduk na gwon i Kadi na Ŋun nagon ’dokesi guba kata na, a nye meddi ŋutu i gumba na gurut i saŋduk ŋutu jore logon a kwörinikö ’dogga ko gurut jore.

⁴² A ŋuto nagon a lomeri ko a karu ’be na poŋdi, a gubakiŋdye milin murek nagon momora a taripatat na jur lose.

⁴³ A nye lupundye ŋutu kanyit kajujumuk kulo kanyit ni, a kulyani ko se adi, ’Diri nan takiŋdya ta adi, na ŋuto nagon a lomeri ko a karu ’be na aje ’dogga bia parik lwölwöŋ ŋutu liŋ logon aje gumba i saŋduk kata kulo.

⁴⁴ Kogwon lepeŋat liŋ ’dumuŋdya ’dokesi i tukwörienjin kase; ama na ŋuto ’dumuŋdya i tolomerian nanyit, a iŋge ’dogga ko ŋo kanyit liŋ, kweja adi gurut kanyit liŋ nyeesi.