Marako 1 - Bibilia Buk na Ŋun nagon koti luŋu a

Yoane Kabatisanit a tokujo Loŋe Lo ’but

¹ Loŋe lo ’but lo Yesu Kristo ŋuro lo ŋun a suluja sona.

² A wuro i buk na nebi Yisaya adi, Mete, nan soson luyökie lio konut ŋerot, logon mo tetenaddu kiko ilot.

³ Gworo lo lele ŋuto wowoŋon i yobu adi, Yayaraki ta kiko lo MATAT jojo, rine ta gwokiot kanyit gwogwo.

⁴ Nyena a Yoane Kabatisanit puku i yobu, a tokuje adi ti ŋutu ködyö löpuŋge toilyet ko ti batisani batisa, anyen toronjin kase pipitoki.

⁵ A ŋutu liŋ ti jur lo Yudaya, se ko ŋutu lio ti Yerusalema iti ko lepeŋ yu, a lepeŋ iŋge batiddya se i kare Yardene, a se tuŋge toronjin kase.

⁶ A Yoane iŋge jupu boŋgo nagon tetena ko kupir ti kamilo, ko a duku-kiŋdyö kamba nagon a ’böriköt kanyit i mukok, a nye nyesi mayat ko siwatat na mu ’diŋ.

⁷ A nye tokuje adi, Lele ŋuto ŋilo popo köyö i mukok logon riŋit nanyit a duma Iwolwoŋ nio, a nan tine jukin dulaki kak i laggu na patala ti kamuka kanyit.

⁸ Nan aje batiddya ta ko pioŋ ama lepeŋ mo batiddya ta ko Mulökötyo Loke.

Batisa na Yesu

⁹ A gwe sona i kilu perok, a Yesu poŋdi kaŋo i Najareta na Galilaya a Yoane batiddye lepeŋ i Yardene.

¹⁰ A nagon Yesu nyuŋ po kaŋo i pioŋ kata nu, a ’de ’de lepeŋ meddi ki a ŋaju a Mulökötyo Loke poŋdi kak kanyit loki gwoso gure.

¹¹ A gworo lo kuu ki yu adi, Do a pilili lio lo ŋuro lo nyanyara, nan a lyöŋön ko do parik.

Satani a temba Yesu

¹² ’De ’de kijek a Mulökötyo Loke ri ’diaddi Yesu i yöbu nagon ŋutu ’bayin kata.

¹³ A lepeŋ gwe nyu perok merya iŋwan Satani temba lepeŋ. A lepeŋ gwe i pirit na geleŋ ko kijakwa ti mu ’diŋ, a malaikajin kitakiŋdye lepeŋ.

Yesu a suluja kita nanyit Galilaya

¹⁴ Nyena i mukok nagon Yoane aje moka nu, a Yesu poŋdi Galilaya i tokujö na lore lo ’but lo Ŋun,

¹⁵ adi, diŋit aje temakiŋdya; Ŋun aje yepuŋdya i tumatyan; löpuŋge ta töilyet ko yubbe ta lore Lo ’but.

Yesu a lungu ŋutu iŋwan kalokak ti somot

¹⁶ A na wöröjine Yesu i kijit na tor na Galilaya nu, a nye meddi Simona se ko Aŋöarea luŋaser Simona gubaddu ku ’yi i tor, kogwon se a ŋutu kalokak ti somot.

¹⁷ A Yesu kulyani ko lepeŋat adi, Kipuŋdye ta nan, a nan mo tiŋdi ta i jikuŋdyo na ŋutu köyö ni gwoso ŋutu logon jikuŋdyo somot ko ku ’yi.

¹⁸ A lepeŋat kö ’yi ku ’yilan kase adi wulek, a kepoddi lepeŋ.

¹⁹ A na tirikin ŋerot diŋit a na ’dit nu, a nye meddi Yakobo ŋuro lo Jebedayo se ko Yoane luŋaser Yakobo, logon gwon kase i ki ’bo i ririgga na ku ’yilan.

²⁰ ’De ’de a nye luŋgi lepeŋat, a se kölökiŋdye Jebedayo monye lose i ki ’bo se ko ŋutu lo ropaki i kita kulo, a se kepoddi lepeŋ.

ŋuto lo gwon ko mulökötyo loron

²¹ A lepeŋat iti Kaperanauma. ’De ’de kijek i ŋilu lor lo Sabata a Yesu luponi i kadi momoret i todiŋdyo.

²² a ŋutu iŋge söŋu ko todiŋdyö nanyit, kogwon lepeŋ todiŋdyö se gwoso ŋuto logon ko kido ko ti gwon gwoso katodinök ti Saresi ti Mose.

²³ I ŋinu diŋit gwak a lele ŋuto gwe kata logon ko mulökotyo loron kase i kadi momoret.

²⁴ a lepeŋ woŋoro ki adi, Yesu lo Najareta, do ’dek nyo kayaŋ? Do yöŋö tukaŋu yi? Nan a den ko do a ŋa, do a Loke lo Ŋun.

²⁵ Ama a Yesu riŋge lepeŋ, a kulyani adi, Yiŋani taliŋ, poŋdi kaŋo ko ŋilo ŋuto i mugun.

²⁶ a mulökotyo loron kiki iŋge lepeŋ, a woŋe parik ko gworo lobot, a poŋdi kaŋo ko lepeŋ i mugun.

²⁷ A ŋutu liŋ iŋge söŋu, nyena a se totopine ko ’börik adi, Kine kulya a nyo? Todinesi kanyit gwon ka ’de! Lepeŋ jambu ko kido, a saŋi ma ’di mulöko lorok a yiŋge lepeŋ.

²⁸ ’De ’de a kulya kanyit kuorö i turon liŋ ti Galilaya lo didiŋö.

Yesu a toke ’ya ŋutu jore

²⁹ A nagon se aje kö ’yu kadi momoret nu, a se iti gwo i ’baŋ na Simona ko na Aŋöarea; a Yakobo se ko Yoane moraddi ko se.

³⁰ A moken na Simona roggi kak kogwon mugun nanyit sa ’yu pape. ’De ’de kijek a se takiŋdye Yesu kulya ti ŋina ŋuto.

³¹ a nye iti ko lepeŋ yu a morgi lepeŋ ko könin a ’biluŋdye lepeŋ ki, a sa ’yu na mugun kö ’yi lepeŋ, a lepeŋ parakiŋdye se.

³² A i ŋilu koriri i ’doro na kolor, a ŋutu joŋdi ko Yesu ni ŋutu kase Liŋ logon a gigilötu se ko logon a moka mulöko lorok.

³³ a ŋutu liŋ ti köji momoruŋdye i pirit na geleŋ nyona ko kötumit na kadi.

³⁴ a nye iŋge toke ’ya ŋutu jore lo gwon ko twana ka ’de ka ’de, a iŋge rikörö mulökö lorok jore kaŋo, a nye tine rukokin mulökö lorok i jambu, kogwon se aje den ko nye a ŋa.

Yesu a wörö totokuöddu Loŋe Lo ’but i Galilaya liŋ

³⁵ A i ko ’bure nagon kak a ko nyuŋ waran nu, a-Yesu ŋine ŋien a dikara i pirit nagon ŋutu ’bayin kata kwoŋ, a nye poki i kwakwaddu i ŋinu pirit.

³⁶ A Simona se ko ŋutu logon gwon ko lepeŋ kulo galaddi Yesu,

³⁷ a se ryeji lepeŋ, a takiŋdye lepeŋ adi, ŋutu liŋ ga ’yu do.

³⁸ a nye kulyani ko lepeŋat adi, Ti yi Iwoŋöddi ta i kulye turön dumalak, anyen nan köti böŋö tokujö nyu, kogwon nan a po kak ni kogwon kine kulya.

³⁹ A nye wöröni i Galilaya liŋ, totokuöddu i kadijik kase momoresi a riköddi mulökö lorok kaŋo.

Yesu a toke ’ya ŋuto lo rimajin

⁴⁰ A ŋuto lo rimajin poŋdi ko Yesu ni, a rugwuŋökine kak a mamaŋdi lepeŋ adi, Ko do nyanyar, do bubulo toke ’ya nan.

⁴¹ a Yesu wone konyen ko lepeŋ, a nye riöddi könin lonyit a ’bo ’yi lepeŋ, a kulyani ko lepeŋ adi, Iŋkoi, nan nyanyar; ti do kele kelan.

⁴² ’De ’de a rimajin kö ’yi lepeŋ, a mugun nanyit iŋge po a na ’but.

⁴³ A Yesu sonyoddi lepeŋ, kukuju lepeŋ parik,

⁴⁴ adi, Meddi ’bura, an do ko jamakin lele ŋuto kine kulya; ama iti, kweki mugun ko koane ko wukiŋdye rubaŋga a tokelet ilot gwoso na sarakiŋdye Mose nu, anyen ŋutu deden adi do aje tokela.

⁴⁵ Ama a ŋilo ŋuto iti tu, a suluje jamaddu kine kulya abur, nyena a Yesu tine bulo lupö i nene köji memetaji ama a si ’dani i yöbu nagon ŋutu ’bayin kata, ma ’di sona a ŋutu ti turön liŋ yeŋe tu ko lepeŋ yu.