Kweyatti 1 - Bibilia Buk na Ŋun nagon koti luŋu a

Tirikwet na na buk

¹ Kine a no nagon Ŋun a kwekin Yesu Kristo. Lepeŋ a tikin Yesu anyen kwekiŋdya koliponok kanyit ŋo nagon gwe nyona ko pukun. A Kristo soŋdi malaikatat lonyit anyen ko tu takiŋdya koliponit lonyit Yoane kine kulya,

² a Yoane tuŋge ŋo liŋ na met nye kune. Kine a kulya na jam Yoane i kulya ti kulyaet lo po ko Ŋun se ko kulya ti to ’diri na tokor Yesu Kristo kune.

³ Ŋuto lo kenakiŋdya ŋutu kilo kulyaesi keesi lo a kalyoŋi, koti se lo yiŋga kine keesi a ’depe ’dep ŋo nagon a wuroki kata kine a kalyoŋok, kogwon ditiŋ na kine kulya gwe nyona.

Yoane a roman ko kanisajin buryo

⁴ Nan Yoane roman ko kanisajin buryo na gwon i Jur lo Asia kine adi, Ti ’busan ko taliŋ gwe ko ta na ŋo ko Ŋun logon soŋinana kata, logon koju ’beron gwon kata, ko lo ŋoŋo lo, na ŋo ko muloko kanyit buryo logon gwo ’dan i komor na si ’daet nanyit na Ŋun kilo,

⁵ na ŋo ko Yesu Kristo, katokoronit lo yiyiniki a gwak, logon a ŋien a togeleŋ i twan, ko a duma lo moran ti kak lo. Ti bulet gwe ko lepeŋ logon nyanyar yi lo, logon a lakuŋdya yi kaŋo i toronjin kaŋ ko rima kanyit lo,

⁶ logon a tiŋdu yi tumatyan i kitakiŋdya na Ŋun Monye lonyit a koanejin lo, koti ti kido saret gwe ko lepeŋ Ŋupi ŋupi. Amin.

⁷ Mete, lepeŋ ŋoŋo ko ’dikolo. A ŋutu liŋ mo meddi lepeŋ. Se lo rembu lepeŋ i kulo mo memet lepeŋ, a gweyajin lio ti ŋutu ti kak mo gwine lepeŋ. Ti gwe sona. Amin.

⁸ Matat Ŋun logon soŋinana kata, logon koju ’beron gwon kata, ko lo ŋoŋo lo, ko a Kabulönit lo ŋo liŋ lo kulya sona adi, Nan a Alapa ko a Omega.

Yoane a meddya kulya ti Kristo kanyit i töili

⁹ Nan a Yoane luŋaser losu. Nan ko ta naruŋdya ŋoŋga duma, ko tokimakan, se ko ŋoŋaddu taliŋ nagon a kaŋ ko Yesu i mugun. Nan koju gwon i tikon lo luŋu a Patmo, kogwon nan a tokujo kulyaet lo Ŋun a nan iŋge tökoŋu kulya ti Yesu Kristo.

¹⁰ A Mulökötyo Loke iŋge mok nan i Lor lo Matat, a nan yiŋge gworo lobot woŋon gwoso buruŋ i köyo i ki ’diŋ.

¹¹ A woŋe adi, Wuroki ŋo na met do kine i buk, ko sonye se i kanisajin buryo na gwon Epeso, ko Samurna, ko Pergamo, ko Tuwatira, ko Sardi, ko Piladelapia, se ko Laodikia.

¹² A nan lopukoni i meddya ko ŋa lo jambu ko nan; a na lopukori nan nu, a nan meddi lombojin buryo logon a dakaŋ i gwo ’diesi loki,

¹³ a lele Ŋo gwoso ŋuro lo ŋuto gwe i kiden na lombojin, a jupu jolobiya tojo kanyit i ’dapan ti mokosi, ko gom nagon a dakaŋ a dukuki kanyit i kido.

¹⁴ Kupir kanyit ti kwe a lokwe gwoso waratat ko gwoso luru lo lilik; a konyen kanyit poŋi gwoso ŋedepa ti kimaŋ;

¹⁵ a mokosi kanyit kobbi gwoso mölwö nagon aje nama ko aje ŋoto a nake; a gworo lonyit gwe gwoso woŋon na karya jore adi wunu.

¹⁶ Lepeŋ gwon ko kaser buryo kanyit i konin lutaten, a baŋdu lo pilan swötön murek lupene kaŋo kanyit i kutuk, a komor nanyit kobbi gwoso kolor na sa ’yu parik i tuparan kiden.

¹⁷ A na meddi nan lepeŋ nu, a nan ’dorone kanyit i mokosi gwoso ŋuto lo twan. A lepeŋ sopakiŋdye könin lonyit lutaten koyo loki, a kulyani adi, An do ko kujöno; nan a suluet ko a ’dutet,

¹⁸ ko a lo gwon jörun lo. Nan koju a twan soŋinana nan gwe jorun ŋupi ŋupi, a nan gwe ko ŋaesi ti twan ko ti pirit na muloko.

¹⁹ Nyena wure wur ŋo na met do kune, ŋo nagon soŋinana kata, se ko ŋo nagon molu pupukun i mukok.

²⁰ Tokoret na Iwono ti kaser buryo logon do a met koyo i könin lutaten kulo, se ko lombojin buryo logon a dakaŋ kulo, gwon sona adi, kaser buryo kulo a malaikajin ti kanisajin buryo kune, a lombojin buryo kulo gwe a kanisajin buryo kune.