Galatia 6 - Bibilia Buk na Ŋun nagon koti luŋu a

Tulwöki ta ko ’börik

¹ Luŋasirik, ko lele ŋuto a ’doro i toron, ta logon a ti Mulökötyo Loke kilo gwe ta ko töilyet lo lilik i tetenakiŋdya na lepeŋ i gwon rigwo. Kunyar ta, an Satani köti tem ta.

² Tulwöki ta ko ’börik i ŋo na ’doko pömöni; ko ta koŋdya sona a ta ’diri mo koŋdi saresi ti Kristo.

³ Kogwon ko lele ŋuto yeyeju adi nye a duma kudyakan nye a ŋo kana, lepeŋ mumulugga mugun.

⁴ Ama ti ŋutu liŋ ŋadi geleŋ ti teme tem konesi kanyit, a ko gwe a na ’but a ti nye ko mugun nanyit lyöŋi lyöŋön, ti nye gwe ti tojoju konesi kanyit ko konesi ti lele.

⁵ Kogwon i ŋutu liŋ geleŋ geleŋ ŋadi ’doggu ŋo kanyit.

⁶ Ti nye logon a todiniki kulyaet lo Ŋun lo parakiŋdye katödiŋönit lonyit ko ŋo kanyit liŋ na ’but.

⁷ An ta ko mumulugga ta ’börik, Ŋun ti kweniarikin. Kogwon ŋo nagon ŋuto weja se kune, lepeŋ mo ŋepa se, köti.

⁸ Kogwon ŋuto logon weja ŋo ti mugun na na kak lo, lepeŋ mo köti ŋepa ŋo nagon ’bu ’burön kune ti mugun na na kak, ama nye logon weja ŋo nagon a ti Mulökötyo Loke lo, lepeŋ mo Ŋepa ŋo nagon a ru na yeŋ nyin kune nagon a ti Mulökötyo.

⁹ Ti yi gwe ti darai koŋdya ’bura, kogwon yi mo ŋeŋeŋa i diŋit na ’but koyi a ko doddya.

¹⁰ Nyenagon gwoso na gwoŋdi yi ko komor na ’but na, ti yi konakiŋdye ŋutu liŋ ŋo na ’but, kegga i se logon yi gwon a mede geleŋ ko se i yupet kulo.

Kulyaesi ti ’dutet

¹¹ Mete ta met wuresi dumalak logon nan a wurokin ta ko konin liŋ kilo.

¹² Ŋutu liŋ logon ’de ’dekan pupura i ŋo nagon konaki i mugunya ti na kak kilo se lo ri ’dikiŋdya ta i tawero. Lepeŋat koŋdya sona anyen se ko ’börik gwon ti sasanya kogwon kulya ti ködini na göro na Kristo.

¹³ Ma ’di kilo logon ’de ’dekan adi ti ŋutu ködyo taweroni tawero kulo lepeŋat ko ’borik kase ti ’debba Saresi, ama lepeŋat ’dek ta tatawero, anyen se böŋö bu ’ya ’börik i kulya ti ŋo nagon konaki mugunya kasu kine.

¹⁴ a ko gwe gwoso nan ko mugun nio, nan ti bu ’ya mugun i kulya ti nene ŋo kwöŋ, ake nan bu ’ya mugun i ködini na göro na Matat likaŋ Yesu Kristo. Kogwon kak na a twakin köyö, a nan iŋge twakin i kak kogwon kulya ti twan nanyit i ködini na görö.

¹⁵ Kogwon ko ŋuto a tawero kode a ko tawero ti gwon a nene ŋo; ama ŋo duma tuŋ gwon adi ŋuto ködyö gweya a ludukotyo.

¹⁶ Ti taliŋ se ko yatet gwe i ŋutu liŋ logon kebbu lo kiko kilo, iŋkoi, i Yisaraele ti Ŋun.

¹⁷ Suluja soŋinana ti lele ŋuto gwe ti sasaŋdu nan, kogwon mörikö lo na gwon köyö i mugun kune a gigirisi nagon kwekiŋdya adi nan a lo Yesu.

¹⁸ Luŋasirik, ti ’busan na Matat likaŋ Yesu Kristo gwe kasu i töilyet. Amin.