Eyobo 8 - Bibilia Buk na Ŋun nagon koti luŋu a

Biladada a tuggö adi ŋun konakiŋdya ŋutu ko torigwo

¹ A kirut Biladada lo po Suak loruddye pija adi,

² Do jamaddu a ’dö tojo nanu, na wuŋge kulyaesi kulök ti kutuk gwoso köbuŋöt duma na?

³ ŋun ŋona ’duŋgö putet a lukwölöŋ le? Kabulönit lo ŋo liŋ ŋona karuddya kulya na rigwo a nakwölöŋök le?

⁴ Ko ŋwajik kulök aje toroŋdya lepeŋ, a nye aje wukiŋdya se i riŋit na lyaŋesi kase.

⁵ Ko do ködyö a ga ’yu Ŋun parik a momo ’yi Kabulönit lo ŋo liŋ,

⁶ ko do ködyö a ŋuto loke ko a lo rigwo, ’diri nye de ŋiŋien ki i parakiŋdya na do, a mo robbi do ko pirit gwiliŋit na ’but.

⁷ Ma ’di suluet inot köju a na ’dit, a i ’dutet a do mo gwe a duma parik.

⁸ Böŋö pine ŋutu ti ’beron kulu, yeyene yeye ŋo nagon kobaba köju a ryö kunu;

⁹ kogwon yi kulo a ti kaje a tine den nene ŋo, kogwon perok kaŋ i kak ni gwon gwoso tölimöt.

¹⁰ Lepeŋat ŋona ti bulö todini-kiŋdyö do, a jamakiŋdye do kulyaesi lo po kase i töilyet le?

¹¹ Adi, gwu ’de ŋona ’du ’duŋö i pirit nagon ’bayin a wo ’do ’do le? Pa ’doŋ ŋona bubulö ’duŋö i pirit nagon ’bayin a pioŋ le?

¹² I diŋit nagon nyuŋ tuture ko a ko nyuŋ ŋera nu, a se teteyone teteyon i ŋerot na kulye dörwö.

¹³ Kikolin ti ŋutu liŋ logon a böŋö Ŋun kilo gwon sona; a yenet na ŋuto logon a renya Ŋun lo mo liki likin;

¹⁴ a yenet nanyit giŋdye giŋdya, a yupet nanyit gwe gwoso kadi na lugögöri.

¹⁵ Lepeŋ tikö ko kadi nanyit ama a nu kadi tine bulö gwo ’dan go; a nye morgi lepeŋ ama a ’bakani ’baka.

¹⁶ A nye gwe gwoso ködini lodon i kolor, a kenia kanyit ririkörö i melesen.

¹⁷ A kokori kanyit totolubbe ’börik i ’dome lo ŋurupö, a roŋoni roŋo i lelya kata.

¹⁸ A ko lepeŋ a gwunye kaŋo kanyit i pirit, a ŋinu pirit mo renyani renya lepeŋ adi, Nan ’beron a ko met do.

¹⁹ Nyena a kwelen nanyit lilikara sona, a kulye ŋo mo lo wilu kak.

²⁰ Mete, ŋun mo ti renya ŋuto logon ’bak toron, a tine parakiŋdya katoronyak.

²¹ A nye mo köti töjoreji kutuk inot ko kwekweni na lyöŋon, a mo tiŋdi do i woŋoro ki ko lyönon.

²² A kamanak kulok mo gwe ko yu na kusik a duma parik, a midijik ti ŋutu lorok mo liki likin asut.