Eyobo 7 - Bibilia Buk na Ŋun nagon koti luŋu a

Eyobo a rerenya ko Ŋun

¹ Ŋuto gwon ko kita nago i kak ni, perok kanyit gwoso ti kakitanit lo ropet,

² gwoso ’dupiet logon yöpö tölimöt ko gwoso kakitanit logon möŋdu ropet nanyit. ’Bayin sona le?

³ Nyena yapala logon a ti kana a koraki nan; ko tukwajeni sasanyesi a wulöki nan.

⁴ A na piriki ’e nan kak nu, a nan kulyani adi, Kak de ko waran nanu anyen nan ŋien ki? Ama tukwaje a lojo, a nan lölöpu-köni lölöpukö teŋ ko baŋun na kak.

⁵ Lokore liŋ lo mugun a wora a kuru ko a kujöŋ; a ’böriköt liŋ lo mugun roggi roggu, a pu ’döni a ’butöt.

⁶ Perok kwe lwöpöddu ’de ’de lwö-lwöŋ ködini gweyet lo boŋgwat i kita nanyit, a ’bakani ’baka ’bak yenet na ŋerot.

⁷ Ti do Ŋun yeyene yeye adi ru nio gwoso yama; a konyen kwe mo köti tine meddya ŋo na ’but kwöŋ.

⁸ Do logon meddya nan lo mo ti met nan köti kwöŋ; a nagon do nyuŋ didiŋa nan nu a nan liki likin.

⁹ Nyena gwoso nagon ’dikolo rere-kin a liki likin nu, a nye lo tu kak i pirit na mulökö lo mo tine pukun ki köti;

¹⁰ nye ti yitwe kanyit kadi kwöŋ, a mede nanyit köti mo tine met lepeŋ asut.

¹¹ Nyenagon a nan de tine teŋgu mugun i jambu; a nan de jambi delya na ködudwö nio, a nan de wiwinyani wiwinya ko toili lo delyaesi.

¹² Nan ŋona a tör kode a sumuti duma, anyen do tiji nan na?

¹³ Ko nan kulya adi dotoet nio de ’bo ’bolakin nan, a ko nan a piriki kata a mugun nio de gwe payoyo,

¹⁴ a kirut do tusöŋi nan ko rudweesi, a tokujöŋdi nan parik i ŋo na met nan köyö i töili kune,

¹⁵ anyen nan ködyö wuluŋdyö tolo na murut se ko twan lwölwöŋ ŋoŋesi kwe.

¹⁶ Nan maman gwon jörun; nan ti ’bön yeŋon gwolor. Kölöki nan geleŋ, kogwon perok kwe gwe gwoso yama.

¹⁷ Ŋuto a nyo nagon do bu ’ya lepeŋ? ’Bulit na lepeŋ a nyo nagon do tiŋdu töili ilot ko lepeŋ,

¹⁸ i wöŋu na lepeŋ temba i ko ’bure, ko i möŋu na lepeŋ i saalan liŋ na?

¹⁹ Do ŋona ti bulö löpuköddu konyen kulok kaŋo köyö ko diŋit a na ’dit le? Do ŋona ti bulö kölökiŋdyö nan i wi ’yö na kamulak kwe le?

²⁰ Ko nan aje toroŋdya, nan ŋona a konakin do nyo, do kamemetanit lo ŋutu? Ko nyo do a kon nan a biso ilot, ko a togwi ’dikin nan ki i ŋoro?

²¹ Ko nyo nagon do ti pitökiŋdyö lyaŋesi kwe, a joŋgi toronjin kwe kaŋo? Kogwon soŋinana nan lo pirikine kak i gulöm; a do de ga ’yi nan, a nan mo gwe ’bayin.