Eyobo 6 - Bibilia Buk na Ŋun nagon koti luŋu a

Eyobo a yuyuggö julin kanyit

¹ A kirut Eyobo waddi adi, Ko kodyo daraesi kwe a tema,

² Ko ködyö sasanyesi kwe a tiki i mijan i pirit na geleŋ!

³ A kirut ködyö gwe pömöni lwölwöŋ tupömöni na sese na tör; ŋina a kwe nagon nan jambu gwoso lo mamala.

⁴ Kogwon loya ti Kabulönit lo ŋo liŋ gwon köyö i mugun, a mulökötyo liŋ möji wiri lose; a tokujönöesi ti Ŋun ’dakaki i mörti ko nan.

⁵ Kaine lo mu ’diŋ ŋona bubulti woŋon na gwoŋdi nye ko doru nu le? Kode dwot rurumön na gwoŋdi nye ko kinyo lo nyenye nu le?

⁶ Ŋuto ŋona bubulo nyesu ŋo nagon poto ’bak ’balaŋ? Mulukia ka ’de ŋona paleleŋ le?

⁷ Kamulak kwe ti ’bon se; lepeŋat gwoso kinyo loron köyöi kutuk.

⁸ Ko kodyo nan a wuju ’dekesi kwe, ko ködyö Ŋun a rukökin nan ŋo nagon nan a yoŋori kune;

⁹ ko ködyö a na ’but a ti ŋun pasaggi nan, ti nye koluŋdye könin lonyit i tatuja na nan!

¹⁰ A ködyö gwe a na ’but köyö, a nan ködyö lyoŋi lyoŋon parik ma ’di i poŋga duma, kogwon nan a ko renya kulyaesi ti ŋilo Loke.

¹¹ Nan ŋona ko riŋit nagon nan momordi le? a ’dutet nio gwe a nyo ko nan a mordu ko taliŋ?

¹² Riŋit nio ŋona a na ŋurupit le, kode mugun nio ŋona a mölwö le?

¹³ ’Diri gwak paret ’bayin köyöi mugun, nene riŋit paret nio a joŋa pajo köyö.

¹⁴ Ŋuto logon a doddya i toili ko a kolokiŋdyo twoju nanyit na Kabulönit lo ŋo liŋ lo, julin kanyit agu ködyö kwekwekin lepeŋ ’busan;

¹⁵ a kudyakan luŋasirik kwe gwe a kamu mulu kak gwoso luruki, gwoso wokiesi ti pioŋ nagon a wereyo.

¹⁶ I diŋit na lika pioŋ kase wora a nago gwoso torok a gwe a narwök;

¹⁷ a i diŋit nagon kak yuyuk a se wereyone wereyo, a ko kak gwe pape a ’bakani ’baka.

¹⁸ A teŋon ti kajölök girara a swöt, a se iti tu i yöbu nagon a sese kana, a twatwane twatwa.

¹⁹ A teŋon ti kajölök ti Tema galaddi pioŋ, a kajölök ti Seba ’yeŋdi kinu pioŋ;

²⁰ a se inge yaŋan ma ’di nagon se a yeŋdu; a se ’dure nyu a kulya kase iŋge ka ’yu.

²¹ Nyena ta gwon gwoso kilo luruki köyö ni; ta meddya nan a ŋo sörit a ta kujönöni kujönö.

²² Nan ŋona a luŋgu adi, Tiki ta nan ’dokesi le? Kode adi, paraki ta nan ko ’dokesi ti tukwörien nasu nagon tiki a lwön?

²³ Kode adi, Lwöki ta nan i könisi ti miriku liŋ? Kode adi, Dakuŋdye ta nan kaŋo i könisi ti karudak le?

²⁴ Tokuruki ta nan, a nan mo yiŋani taliŋ; tiki ta nan i deŋdya na kulya nagon nan a lyaŋgi kune.

²⁵ Kulyaesi ti ŋulu lorigwo a iŋgo parik! Ririŋesi kasu kweja nyo köyö?

²⁶ Ta ’dek rerenya ko nan i kulyaesi kwe le? Nan a Ŋuto logon a doddya i töili, a ta yöŋöni seddya kulyaesi kwe gwoso pudi na wuköji ko köbuŋöt.

²⁷ Ta yöŋö gumbe ma ’di ŋwajik kikijikö guralan le? Ta yöŋö tugwoŋu julin kasu ko ropet na teten ta ko kulye ŋutu na le?

²⁸ Nyenagon soŋinana, böŋö meddi ta nan; kogwon nan ti ’burönö kasu i komor.

²⁹ Böŋö yeyeji ta yeyeju köti, an ta ko ’duŋökin ta kulya kwe arabat. Soŋinana köti yeyeji ta kogwon nan a lo rigwo.

³⁰ Nene toron ŋona kata köyö i ŋedep le? Ŋedep liŋ ti bulö ’de ’deŋdya kulya narok le?