Eyobo 4 - Bibilia Buk na Ŋun nagon koti luŋu a

¹ A kirut Elipaja lo po Teman suluje pija adi,

² Ko lele ŋuto a moru jamakiŋdya do kulyaet, do ŋona de dadara le? Ama ŋa logon bubulo yiŋa taliŋ?

³ Mete, do aje todiŋdyo ŋutu jore, do aje togo ’yu konisi lokolokak.

⁴ Kulyaesi kulok aje mok ŋutu logon a köpukö, a do aje togo ’yu kuŋwat lukadaŋak.

⁵ Ama sopinana do gwe i dara na pokiŋdye ŋoŋesi konut loki nu; a se ’bole ’bo do, a do gwe ko delya.

⁶ Kugga inot na Ŋun ŋona ’bayin a nye na tiŋdu do i gwo ’dan go le? Gwiliŋit ilot loke ŋona ’bayin a nye lo gwon a yenet inot le?

⁷ Böŋo yeyeji yeyeju, lon nuto logon a tatua ’bak kwe na kulya? Kode ŋona ŋutu lo rigwo a tukara ya?

⁸ Nan jambu ŋo nagon nan deden, nutu logon kuŋu kulya narok a weji nyomot ti yoŋesi kulo ŋepa jojo;

⁹ a se tatuani ko köbuŋöt lo Ŋun, a se tutuŋoni ko yukan na woran nanyit.

¹⁰ A rumön na kömiru ko woŋon nanyit na tukaŋan iŋge toyiŋa; a kala ti komiruöt lo ’di ’dik iŋge ’be ’beleŋo;

¹¹ a kömiru duma twane kogwon lokore ’bayin, a torela ti kömiru nakwan reki rekin.

¹² Köju kulyaet a kweki nan a lwön, a morakine köyö i swö;

¹³ na yeyeji ŋutu i rudweesi ti tukwaje, i diŋit nagon doto duma a mok ŋutu nu,

¹⁴ a kujönö iŋge tusör nan, a tiŋdi kuyu kwe liŋ i böböŋdu.

¹⁵ A köbuŋöt wuköddi köyö i komor, a kupir kwe ti mugun iŋge ŋien ki;

¹⁶ a nye gwo ’de adi lii ama a nan tine bulö gwulu ’yu lepeŋ, a nene ŋo iŋge gwo ’dan köyö i komor, a nan yiŋge gworo logon jambu madaŋ adi,

¹⁷ ŋuto logon a lipo kana ŋona a lorigwo lwölwöŋ Ŋun le? ŋuto ŋona a loke lwölwöŋ Kagweyanit lonyit le?

¹⁸ Ma ’di Ŋun a ko yinikin kölipönök kanyit; iŋkoi, nye a ryö giresi ti malaikajin kanyit,

¹⁹ a kirut gwe ada i ŋutu logon a lipo kana, logon pipilesi kase gwon i kujöŋ, logon munyeta gwoso kapoporat.

²⁰ Lepeŋat a tukara i tuparan geleŋ, a se twatwane a ’dutet ’bak lele ŋuto lo yeyeju se.

²¹ Ko ködyö kaluti toret na kemia a ’dute kaŋo kase kiden, a se ködyö tine twatwa ’bak koŋon le?