Eyobo 26 - Bibilia Buk na Ŋun nagon koti luŋu a

Eyobo a kulya adi Ŋun a MATAT lo ŋo liŋ

¹ A kirut Eyobo waddi ’do ’doju adi,

² Do ’diri a parakiŋdya ŋuto logon ’bak riŋit! Do ’diri a lwöggu ŋuto logon könisi kanyit a lomunyak!

³ Do ’diri a jujuja ŋuto logon ’bak koŋon, do a kwekiŋdya yeyeesi jore nakoŋ!

⁴ Ŋa parakiŋdya do i jambu na kulyaesi kulok? Mulokötyo liŋ a logon a po kaŋo konut i kulyaesi?

⁵ Ŋutu lutwatwa, ko pioŋ, se ko ŋo liŋ na gwon i lukata nase kune böböŋdu kak yu i pirit na mulökö.

⁶ Pirit na mulökö gwon ŋa ko Ŋun i komor, pirit tukaret gwon kana ’bak muket.

⁷ A nye rikiŋdye ’diko i loki na pirit nagon nene ŋo ’bayin kata kwoŋ, a nye lilikiŋdye kak i wöli kana.

⁸ A nye torakiŋdye pioŋ i lukata na ’dikolo, a ’dikolo tine tu ’yö kogwon se pömöni.

⁹ A nye muŋge komor na yapa duma, a petakiŋdye ’dikolo kanyit loki.

¹⁰ Lepeŋ a geraddu lite i loki na pioŋ i koŋa na parara ko mudwe.

¹¹ A na riŋge lepeŋ nu, a togwi ’diesi ti ki böböŋdi böböŋdu, a söŋi soŋu ko riŋga nanyit.

¹² Lepeŋ ko riŋit nanyit a togwo ’ya tör duma, a lepeŋ ko koŋon nanyit iŋge gwutokin kijakutat Raba kak.

¹³ Köbuŋöt lo lupuŋdyö kanyit i kutuk a kut ’diko a nake; a könin lonyit rembi munu kanininanit lo mugun.

¹⁴ Mete, kine kulya gwon a suluesi ti kitaesi kanyit; yi yiŋga kulya kanyit jama adi koyok koyok ka ’de! Ama ŋa logon bubulö kuruŋdyo rumön na riŋit nanyit?