Eyobo 24 - Bibilia Buk na Ŋun nagon koti luŋu a

Eyobo wiwinya adi Ŋun ti yeye kulya ti toron

¹ Ko nyo nagon Kabulönit lo ŋo liŋ ti ’debba perok ’duŋesi ti putet? Ko nyo nagon ŋutu logon deden lepeŋ ti met kilo perok?

² Ŋutu lorok totomijörö ŋurupö logon a koresi ti kak; a ryakaddi yidin a meyaddi meyaddu i yuggu a kase.

³ Se a meyaddu kaineki ti kikijikö; a se joŋgi dwönin ti karu ’bejin atogwoesi.

⁴ Lepeŋat dukara ŋutu lo yöŋo ŋo kaŋo i kiko; lomerika ti kak ’de ’ya ’börik i pirit na geleŋ.

⁵ A se gwe gwoso kaineki ti mu ’diŋ, nagon rumara i yöbu kata, i ga ’yu na kinyo, ama ma ’di nagon se a kita tojo ko tukwaje, ŋwajik kase nyuŋ gwon ko magor.

⁶ A se pepi pitönö ti ’bolot logon toro ’bo nyönyö, a kwökwöddi pitönö ti ludweki ti binyo i melesen na ŋuto loron.

⁷ Lepeŋat doto ’busön tukwaje liŋ ’bak boŋgwat; a se gwe ’bak mukesi i diŋit na katirut.

⁸ Lepeŋat a woko ko kudu lo merya, a ’depakiŋdye i morga na lelya kogwon pirit duŋöet ’bayin.

⁹ Ŋutu lorok kata logon a ’dutun-dyo lupudiet kikijikö logon nö-nöggu, a joŋgi lupudiet ti ŋutu lomerika a togwoesi.

¹⁰ A ŋutu lomerika wöröjine ’busön ’bak boŋgwat; a se yekaddi kusikön ti ’bolot na gwoŋdi se ko magor nu.

¹¹ A lepeŋat ’yoroddi welet i tölimöt na goŋet lo goroma murek; a se ryokaddi ludweki ti binyo i piritön ryokesi na gwoŋdi se ko kure nu.

¹² Ŋutu logon gwe nyona ko twatwa rurumön köji kata, a ŋutu lo böŋöji gwine paraki; ama a Ŋun tine tiriku yiŋga momolesi kase.

¹³ Kulye ŋutu kata logon ti ’bön tuparan, logon a ko diniki kikolin ti parara, a tine wörö i gwokiot gwoso kulo.

¹⁴ Katatuanit yeŋ ŋi i kwökö i tatuja na ŋuto lomeri se ko ŋuto lo yöŋö ŋo, kwaje a lepeŋ gwe a kolanit.

¹⁵ Kalupe köti yeŋ möŋdu sömukö, yeyeju adi anyen nye gwon ti gwuluwa, a muggö komor nanyit.

¹⁶ Kwaje a kolak tutuluje kadijik, ko paran a se kinuddi ’börik kadi; lepeŋat ti den tuparan kwöŋ.

¹⁷ Kogwon mudwe logon adi ’dii gwon a ko ’bure ko lepeŋat liŋ; lepeŋat a diniki tokujönöesi ti tukwaje lurwö.

¹⁸ Ŋutu gwoso kilo a ŋo na ’dokon pa ’de ’de i pioŋ loki; a meleseno kase iŋge lömö i jur, a karyokak ti ludweki ti binyo gwe a ko tu i meleseno ti binyo ti kulu ŋutu.

¹⁹ Meliŋ ko tupape nanyit totolikin luru lo gworan, köti pirit na mulökö kak yu konakiŋdya katoronyanit sona.

²⁰ A ŋote yupuŋdyö mo böŋöri böŋöri lepeŋ, a kuru mo ’bi ’bije lepeŋ tojo a teteyon, a i mukök a nye mo tine yeyeŋ kwöŋ, nyena a toron ’deŋoni ’deŋo gwoso ködini.

²¹ Lepeŋ a konakiŋdya ŋutu nagon ti yupuŋdyö ŋwajik ŋo narok, a nye gwe a ko parakiŋdya karu ’bejin;

²² ama Ŋun ko riŋit nanyit momokara ŋutu ti riŋitön; se ködyö bubulö ŋien ama se ti yeŋdu ru nase.

²³ A nye tiŋdi lepeŋat i yeyeju adi se sisi ’da ’bura; ama a nye diŋe kikolin kase.

²⁴ Lepeŋat ’duruŋdyö ki diŋit a na ’dit, a kirut liki likin, iŋkoi, a lepeŋat nopara nopara gwoso köturön; a se ŋerajine kaŋo gwoso kusik ti ’bolot lo ŋeŋera.

²⁵ Ko ködyö ’bayin sona, ŋa logon bubulö kulya adi nan a ’burönit? Ŋa logon bubulö kwekiŋdya adi kulyaesi kwe a ŋo kana?