Eyobo 23 - Bibilia Buk na Ŋun nagon koti luŋu a

Eyobo ’de ’dekan kwekiŋdya Ŋun kulya kanyit anyen Ŋun lilija se

¹ A kirut Eyobo waddi adi,

² I lo lor yeyeesi kwe nyuŋ tiŋdu nan i rerenya, a könin lo Ŋun gwe pömöni ma ’di nagon nan ’du ’duatu.

³ Ko nan ködyö deden pirit nagon lepeŋ si ’da kata, a nan ködyö iti ko lepeŋ yu.

⁴ A nan ködyö jambi kulya kwe ko lepeŋ i komor ko rerenyesi jore;

⁵ a ködyö nan deŋdi ko nye ruggoada, anyen nan kukurun ŋo nagon nye jamakin nan kune.

⁶ Lepeŋ ŋona bubulö riŋitö i rerenya ko nan le? ’Bayin sona; lepeŋ ködyö titiriku yiŋga nan.

⁷ Ŋutu lo rigwo ködyö bubulö lilija kulya ko lepeŋ, a ka ’duŋönit lo putet liŋ köd ’duŋökiŋdye kulya kwe a ’dutet adi nan a loke.

⁸ Mete ta, ko nan tu ŋerot, lepeŋ ’bayin nyu, a ko nan yitwe bot, a nan tine met lepeŋ;

⁹ ko nan galara lepeŋ i köninkadoŋe nan ti ryö lepeŋ, a ko nan löpuköji i könin lutaten, a nan tine met lepeŋ kwöŋ.

¹⁰ Ama lepeŋ deden wörö nio; a nagon nye tembi nan gwoso ŋuto lo ŋoŋoja dakap nu, a nan puku a dakap.

¹¹ Mokosi kwe a ’depakiŋdya go i kepöddu na lepeŋ; nan a kebbu kiko lonyit a gwe a ko girara a swöt.

¹² Nan a ko girara kaŋo i saresi lo lupe kaŋo kanyit i kutuk; nan a ’delakin kulyaesi kanyit köyö i töili gwoso tukwörien.

¹³ Ko lepeŋ a yeyeju kulya kanyit, ŋa logon bubulö löpuggö yeyeesi kanyit? Lepeŋ koŋdya ŋo nagon töili lonyit ’de ’deggi.

¹⁴ Kogwon lepeŋ tetenakin ŋo nagon nye a wulökin nan na; ŋo jore gwoso kine kata kanyit i töili.

¹⁵ Nyenagon a nan kujönöni kujönö parik kanyit i komor, a ko nan yeyeju kine kulya a nan kujönöni lepeŋ.

¹⁶ Ŋun aje tomunyan töili liŋ; Kabulönit lo ŋo liŋ aje tokujön nan,

¹⁷ ama mudwe a ko ri ’dikin nan i yiŋa taliŋ, ma ’di nagon mudwe logon adi ’dii a muk komor nio.