Eyobo 22 - Bibilia Buk na Ŋun nagon koti luŋu a

Elipaja a pökiŋdyö Eyobo adi nye gwon ko toron duma

¹ A kirut Elipaja lo po Teman nyöggi pija adi,

² Ŋuto ŋona gwon ko ’bulit ko Ŋun le? Iŋkoi, ’bulit na ŋuto lokoŋ a nanyit ka ’de.

³ Ko do gwon a lo rigwo ŋona a na ’but ko Kabulönit lo ŋo liŋ? Lepeŋ a ryö ’bulit konut ko do a teteŋdya kikolin kulok ’bura?

⁴ Lepeŋ ŋona ririŋ do, a joŋgi do i ri, kogwon do kugga lepeŋ le?

⁵ ’Bayin, kölumbö kogwon toronjin kunök jore, a lyaŋesi kunök tine ’duddyö.

⁶ Kogwon do ’dumaddu ŋo ko luŋösurök a togwoet ’bak kwe na kulya, do iŋge riŋuŋdya boŋgwat kase a kölökiŋdye se i woro kana.

⁷ Do a ko tiŋdu ŋuto lo dara ko kure pioŋ, a do iŋge renya tiŋdu ŋuto lo magora kinyo.

⁸ Ŋuto lo riŋit lo ’debba jur, a ŋutu lo nyanyara lo si ’dani kata.

⁹ Do a soŋdu karu ’bejin kaŋo ko könisi kana, a do ’be ’beleŋgi könisi ti kikijikö.

¹⁰ Nyenagon patala lokesi a lokaki konut i mara, a do iŋge moka ko kujönö nagon totorigwöggu;

¹¹ a parara worani a mudwe a do tine bulö meddya, a pioŋ jore muluje do.

¹² Ŋun ŋona ti gwon pajo ki yu le? Meddi kaser ti ki se gwon ki pajoparik!

¹³ Nyenagon a do kulyani adi, Ŋun deŋdya nyo? Nye bubulö meddya i mudwe logon adi ’dii anyen ’duŋgö putet le?

¹⁴ A lepeŋ iŋge mukö ko ’dikolo, a nye tine bulö meddya, a wöröjine i loki na ’diko.

¹⁵ Do ŋona de bubulö ’depakiŋdya i kikolin ti ’beron, logon ŋutu lorok köju a wöröri kulu le?

¹⁶ Kilu ŋutu aje jekaji ko twan i ŋerot nagon perok kase a ko temakiŋdya, a kare muluje pipilesi kase.

¹⁷ A lepeŋat kulyani ko Ŋun adi, Wuddye wuddya kayaŋ ni, Kabulönit lo ŋo liŋ ŋona bubulö konakiŋdya yi nyo?

¹⁸ Kölumbö a lepeŋ töjoreji kadijik kase ko ŋo na ’but, ma ’di nagon yeyeesi kase ko yeyeesi kanyit gwon pajo pajo.

¹⁹ A ŋutu lo rigwo meddi meddya a lyöŋi lyöŋön, a ŋutu logon ’bak kulya ’dö ’döji se,

²⁰ adi, Tukwörienjin kase a kakaŋu, a ŋo kase jore iŋge totumö kokimaŋ.

²¹ Toruköki ta ko Ŋun, a do gwon ko taliŋ;anyen kulya na ’but po konut.

²² Böŋö wuji todinesi na po kanyit i kutuk, ko ’delaki kulyaesi kanyit konut i töili.

²³ Ko do a yitwe ko Kabulönit iŋgo liŋ ni ko tokoyok, ko do a wusara konesi narok kaŋo konut i ’baŋ,

²⁴ ko do a lu tukwörien inot gwoso ŋutu, ko dakap na jwe Opir gwoso ŋurupö lo gwon i kare kiden,

²⁵ a kirut Kabulönit lo ŋo liŋ gwe a dakap inot, ko a pödö inot daŋin murek.

²⁶ A kirut do mo lyöŋi lyöŋön ko Kabulönit lo ŋo liŋ, do mo ’biluddu komor inot ki ko Ŋun yu.

²⁷ A do mo kwakwaddi lepeŋ, a nye mo yiŋge do; a do mo koŋdi milyejin kulök.

²⁸ Ko do a yiyiuŋdyö kulya nagon do kökon, a mo iti ’bura, a parara mo pararakiŋdye konuti kikolin.

²⁹ Kogwon Ŋun nyönyökun ka ’du’duŋak kak, a lwöggi ŋutu lokoyokak.

³⁰ Lepeŋ lwölwök ŋutu logon ’bak kulya, a do mo lwökwene kogwon könisi kulok a loke.