Eyobo 21 - Bibilia Buk na Ŋun nagon koti luŋu a

Eyobo a tuggo adi kulya ti ŋutu lorok tutu ’bura

¹ A kirut Eyobo waddi adi,

² Yiŋge ta kulyaesi kwe ’bura, ko ti ŋina gwe a suket nagon ta a suŋge nan na.

³ Goŋgi ta taliŋ, böŋö ti nan jambi, a ko nan aje jo jambu, kirut ’dö’döji ta.

⁴ Nan ŋona wiwinya ko ŋutu le? A ko sona, ko nyo nan ti bulo gwon ko töili lo ’dit i ŋoŋga na kulya?

⁵ Meddi ta nan, ta de sösöŋu, a ta de muŋge kutusen kasu ko könisi.

⁶ Ko nan yeyeju kine kulya a nan gwe ko delya, a mugun nio böŋdi böŋdu.

⁷ Nyo nagon ŋutu lorok gwogwolor diŋit a najo, a gwe ko riŋit i tomodoŋan nase?

⁸ A ŋwajik ’duŋe kase kiden, a se meddi nyakwariat kase.

⁹ Kötumitön kase si ’da ’bak kujönö, Ŋun a ko ’biddyö lepeŋat.

¹⁰ Dwönin kase lulujö ’bak ’yako’yu, a kisuk kase yuŋwene yuŋwe ’bak yoŋ na torela.

¹¹ A ŋutu lorok kölöddi lupudiet kase gwoso yisi na lyölyöŋi, a ŋwajik kase gwoji gwoja.

¹² A se yoloddi ki ko tiŋgiliet se ko tomon, a se lyöŋi lyöŋön i kuta na kili ’ba-jin.

¹³ A se tutuŋge perok kase ’bura, a se iti kak i pirit na mulökö ko taliŋ.

¹⁴ A se kulyani ko Ŋun adi, Wuddye wuddya kayaŋ ni, yi ti ’deggi deŋdya kikolin kulök.

¹⁵ Kabulönit lo ŋo liŋ a ŋa anyen yi ködyö kitakiŋdya lepeŋ? Koyi a kwakwaddu lepeŋ, a yi ryeji nan ’bulit?

¹⁶ Mete ta, gwolor na ’but na ŋutu lorok ti gwon kase i könisi le? Jujuwesi kase ’bayin pajo ko Ŋun le?

¹⁷ Daŋin muda nagon lombo lo ŋutu lorok tatatua? Daŋin muda nagon tukaresi pokin kase loki? Ŋun korakiŋdya tömiesi i woran nanyit daŋin muda?

¹⁸ Daŋin muda nagon se gwon gwoso kudit na ’doko ko köbu-ŋöt, gwoso pudi na wuköji ko libibiu?

¹⁹ A ta kulyani adi, Ŋun a ’dela-kiŋdya ŋwajik toronjin kase komonye; iŋkoi, ti Ŋun ropakiŋdye komonye toronjin kase, anyen se deden.

²⁰ Ti lepeŋat mete met ko konyen kase tukara nase, ko ti se möji woran na Kabulönit lo ŋo liŋ.

²¹ A lepeŋat lyöŋi ada ko kötumitön kase i mukök na twan nase, nagon Ŋun aje ’duŋökin yapala kase ajo?

²² Lele ŋuto ŋona bubulö todiŋdyö Ŋun lo ’duŋgö putesi ti ŋutu lo gwon ki yu le?

²³ Kulye ŋutu twatwa nagon se nyuŋ gwolor a lo ’but, na si ’dari se ko taliŋ ’bak yöyöŋesi nu,

²⁴ mugunya kase a napir, a welet na kuyu kase gwe a ko gworan.

²⁵ A kulye ŋutu twatwane ko delyaesi na pötwör i töilyet, logon.

²⁶ A lepeŋat liŋ pere kak i kujöŋ i pirit na geleŋ, a kuru muŋge se.

²⁷ Mete ta, nan aje kurun yeyeesi kasu, se ko ŋo nagon ta yeye i kulya kwe kune.

²⁸ Ta pija adi, Niya kadi na ŋuto lokukwön? Niya kadi nagon ŋuto loron köju si ’da kata na?

²⁹ Ta ŋona a ko pija kajölök, ta ŋona a ko yuŋ tokoret nase le,

³⁰ adi ŋutu lorok a pitöki i lor tukaret, a se iŋge lwökö i lor lo woran le?

³¹ Ŋutu ’bayin lo kwekiŋdya se kikolin kase a lokomor, ŋutu ’bayin lo ropakiŋdya ŋo na kon se kune.

³² A na ’dököri ŋuto loron i nuka nu, a gulöm nanyit tiyuni tiyu.

³³ A liŋo na ’boka i pirit na ’dir anyen yikörikin lepeŋ na gwe a na ’but kanyit, a ŋutu liŋ logon ti bulö kena kulo nyömöddi lepeŋ, kulye i mukök ko kulye ŋerot.

³⁴ Nyena sugga nasu na nan gwon ko nan ’bulit? Wasesi kasu liŋ a ’burönö. a ko ryö gwolor na ’but kwöŋ.