Eyobo 20 - Bibilia Buk na Ŋun nagon koti luŋu a

Sopar a kwekiŋdya ko ŋutu lorok mo tiki nyo

¹ A kirut Sopar lo po Nama nyöggi jambu adi,

² Yeyeesi kwe na tiŋdu nan i ruggö, nyenagon ŋina a kwe nagon nan a nyuŋga jambu.

³ Nan a yiŋ yuyukesi nagon moro-rikin nan, a mulökötyo logon lwölwöŋ kuruŋdyö nio lo tiŋdi nan i ruggö.

⁴ Do ŋona a den adi suluja ’beron nagon ŋutu a tiki i gwolor i kak,

⁵ ŋuto loron bu ’ya mugun diŋit a na ŋutu, iŋkoi, ŋuto logon ti twöju Ŋun lyölyöŋi ko diŋit a na ’dit döŋdi. ’Bayin sona le?

⁶ Ma ’di ködyö nye a ’duröddu tojo ki, a kwe nanyit yeŋgi i ’dikolo,

⁷ a nye mo kakaŋi kakaŋu asut gwoso kin kanyit, a ŋutu logon köju a met lepeŋ kulo mo pipije adi, Lepeŋ liya?

⁸ A nye mo liki likin gwoso ru-dweesi, a tine rye; a nye wöki kaŋo gwoso ŋo na meta i tukwaje.

⁹ A ŋutu logon köju a met lepeŋ kulo mo tine met lepeŋ köti kwöŋ, nye köti mo ti meta kanyit i pirit gwiliŋit.

¹⁰ A ŋwajik kanyit mo ga ’yi nyara ko lomerika, a se nyökökiŋdye tukwörien nanyit bot.

¹¹ A riŋit na kuyu kanyit ti toteton mo nukani ko lepeŋ i pirit na geleŋ.

¹² Ma ’di ködyö toron gwon paleleŋ kanyit i kutuk, a nye ’delakiŋdye lepeŋ i ŋedep,

¹³ ma ’di ko nye a ’dep go a tine wilöddu, a morgi go kanyit i kutuk,

¹⁴ ama a kinyo nanyit löpuŋge ka ’de kanyit i pele, a worani kanyit i monyet a wirikö ti munuö gwoŋ korokokan.

¹⁵ A nye wi ’ye tukwörienjin a nye köti jau se kaŋo, a ŋun tiŋdi lepeŋ i yakuŋdya na se kaŋo kanyit i pele.

¹⁶ Nye aje ’bija wirikö ti munuö gwoŋ korokokan, a wiri lo ŋedep lo munu tatuje lepeŋ.

¹⁷ A nye mo tine met karya, kweja adi luruki logon ’dokon asiwatat ko a gwoŋali.

¹⁸ A nye mo nyökuŋdye ’bulit na kita nanyit, a mo tine wilörö se; a nye mo tine ryö lyöŋön i ’bulit na ŋo na tugwör lepeŋ kune.

¹⁹ Kogwon nye a ryogga lomerika a kölökiŋdye se sonu, a nye aje riŋaddu kadijik nagon nye a ko ’duk kune.

²⁰ Nyena kogwon goma nanyit tine kö ’yu lepeŋ, a nye tine pitun nene ŋo nagon nye nyanyar na,

²¹ a nene ŋo gwe ’bayin na pituŋdyö nagon lepeŋ a ko nyö, nyena a gwon nanyit ’bura tine yeŋon,

²² a nye mo gwe i nagusu i kiden na tojore na ŋo nagon nye ’de ’deggi kune, a delyaesi mo ’duki ko lepeŋ ki ko riŋit a duma.

²³ A Ŋun sunyukiŋdye lepeŋ woran nanyit na pape, a to ’doji loya ko lepeŋ i mugun gwoso kudu.

²⁴ A nye mo wöki wökön an nye ko böŋöji ko tito möriesi logon a witiöt, ama a lowe logon a mölwö lo keggi lepeŋ;

²⁵ a ŋilo lowe Iwoŋoddi kaŋo kanyit i mugun, a kutuk na lowe nagon a namilyaŋ puku kaŋo i ’deŋgele; a kujonöesi morgi lepeŋ.

²⁶ A mudwe logon adi ’dii mö-möŋdi lepeŋ, a kimaŋ nagon a ko kuta mo totumbe lepeŋ; a ŋutu logon a pituŋdyö kanyit kadi kulo mo noke nokan asut.

²⁷ A ki mo kweji toronjin kanyit, a kak mo ŋine i tuggo adi lepeŋ a loron.

²⁸ A bar mo ’dokoddi kadi nanyit kaŋo I lor lo woran na Ŋun.

²⁹ Ŋina a koret nagon Ŋun a tikin ŋuto loron, kweja adi lomore nagon Ŋun a sarakin lepeŋ na.