Eyobo 19 - Bibilia Buk na Ŋun nagon koti luŋu a

Eyobo a yuŋ adi Ŋun mo tuggö adi nye ’bak kulya

¹ A kirut Eyobo pipije adi,

² Diŋit ŋoman nagon ta tomije nan, a kököröji nan ka ’de ka ’de ko kulyaesi?

³ Ta a ’dö ’döju nan diŋitan jore; a kusik kasu tine yu i toroŋdya na nan.

⁴ A ma ’di ködyö ko a gwak adi nan a giran, giran nu ködyö nyuŋ gwon a nio.

⁵ Ko ta ’diri ’dek toduma ’yu ’börik ko nan, a ta yuyuŋge nan adi nan a loron kogwon nan a nyökwe kak na,

⁶ dene ta den adi Ŋun lepeŋ aje kiun adi nan a loron, a iŋge kalapakin birya nanyit köyö i mugun.

⁷ Mete, a nan luluöddi ki adi, Mwönyörikin nio dyoŋ! ama a lele ŋuto gwe ’bayin lo yiŋga nan; a nan gwine paraki, ama a ŋuto gwe ’bayin lo lilija kulya kwe ’bura.

⁸ Lepeŋ a göm kiko liŋ ko mariŋ anyen nan gwon ti lwöpöddu kata, ko aje tomudweju kikolin kwe.

⁹ Lepeŋ aje yokporo minyo liŋ, ko aje ’dumara Iŋguya kaŋo köyö i kwe.

¹⁰ A nye duduyömbi nan i swötön liŋ gwoso gorom, a nan liki likin, a nye iŋge gwunyun yenet nio na ru kaŋo gwoso ködini.

¹¹ A woran nanyit tuleki köyö ki, a nye koŋdi nan a miriku lonyit.

¹² Teŋon kanyit ti kamörök wökun köyö ni i pirit na geleŋ; a se ga ’yi kiko logon se mörö ko nan, a se lorakiŋdye kadi nio kiden ko merajin kase.

¹³ Lepeŋ aje tin luŋasirik kwe i gwon pajo ko nan, a julin kwe liŋ aje renya nan.

¹⁴ A kötumit nio se ko julin kwe lo nyanyara parik aje kö ’yu nan;

¹⁵ a kömu lo gwon köyö kadi kulo iŋge böŋö nan; a kö ’disi kölipönök kwe koŋdi nan gwoso lwakatyo; a nan metani a lepetyo kase i komor.

¹⁶ A nan luŋgi köliŋönit liŋ, ama a nye tine ruk nan, ma ’di nan ködyö a mo ’yu lepeŋ.

¹⁷ A narakwan nio kujönöni kujönö yukan nio nagon mon a ’burwö, a luŋasirik kwe moji nan a loron.

¹⁸ A ma ’di ŋwajik lo ’di ’dik momo-rone momoro nan, a lepeŋat ’dö ’döji nan na pije nan ki nu.

¹⁹ A julin kwe liŋ logon yi tatuja-makin lwönö kulo mane man nan, a se logon nan nyanyar kulo löpukuŋdye a merok kwe.

²⁰ A lokore nio gwe ’bayin, a ’böriköt liŋ ’depakiŋdye köyö i kuyu, nan gwe nyona ko twan.

²¹ Ta julin kwe, won ta konyen ko nan, böŋö won ta konyen ko nan; kogwon könin lo Ŋun aje gwuddyö nan.

²² Ko nyo nagon ta riköddu nan gwoso na riköddi Ŋun nan na? Ta a ko nyuŋ yimönö i tomijö na nan?

²³ Ko ködyö kulyaesi kwe a wurö! Ko ködyö wuresi kase a na gigiru!

²⁴ Ko ködyö se a gigiriki i mere ko witi wuret, a iŋge tojore ko risasi anyen gwon nyu a ’dutet!

²⁵ Kogwon nan a den ’bura adi kajunyönit liŋ gwon jörun,

²⁶ a i ’dutet a nye mo gwo ’de i jambu na kulya kwe i ri; a nan mo timuŋdye adi katokoronit liŋ gwo ’dan köyö i merete,

²⁷ a nan mo meddi katökönit liŋ logon a Ŋun lepeŋ, a nan ko mugun nio mo meddi lepeŋ ko konyen kwe, ti gwon a lele ŋuto.

²⁸ A töili liŋ doddi doddya i kine kulya! A ko ta kulya adi, ta mo rikörö nan ada, adi, kokori ti kulya aje rye köyö;

²⁹ nyena kujönöni ta baŋdu, kogwon woran joŋdya riŋit tatuet, anyen ta böŋö deden adi ’duŋet na putet kata.