Eyobo 18 - Bibilia Buk na Ŋun nagon koti luŋu a

Biladada kwekiŋdya ko ŋutu lorok mo konaki ada

¹ A kirut Biladada lo po Suak nyöggi pija adi,

² Diŋit ŋoman nagon do ga ’yu kulyaesi gwoso katogoranit? Yeyeji yeyeju a kirut yi de lo jambi.

³ Nyo nagon do met yi gwosoki jakwa? Nyo nagon yi meta a lu ’böŋ konut i komor?

⁴ Do logon kököröju mugun ko woran, kak ŋona mo kökölöki kogwon kulya kunök le, kode lelya ŋona mo totomijöji kaŋo kase i piritön?

⁵ Iŋkoi, kimaŋ na katoronyanit mo tatatua, a ŋedep lo kimaŋ nanyit tine kobbu köti;

⁶ a kimaŋ na lombo twaara twaara kanyit i kadi, lombo lonyit lo togwi ’diki ki lo tatatua.

⁷ A lepeŋ tine wörö ko riŋit ama a luŋörö luŋörö, a yeyeesi kanyit to ’doroji lepeŋ.

⁸ A lepeŋ wököki i birya kata, lepeŋ wöröji i meyi loki a ’dorone nyin.

⁹ A boyi morgi lepeŋ i loru ’yum, widi reregga lepeŋ go.

¹⁰ A pata iŋge ’delaki kak lokari-kin lepeŋ, ridiket a ’delaki i gwoke lonyit.

¹¹ Kujönöesi totokujön lepeŋ i swötön liŋ, a kebbi mokosi kanyit.

¹² Lepeŋ a ’birwe ko magor a nye gwe ’bak riŋit, a delyaesi gwe kanyit i merete.

¹³ A twanti nyesi ’böriköt lonyit, kayu lo twan a tutuŋ swötön ti mugun nanyit.

¹⁴ A lepeŋ iŋge riŋwe kaŋo kanyit kadi nagon nye a yinikin na, a lepeŋ iŋge joŋa ko Mor lo Tokujönöesi yu.

¹⁵ A ŋutu logon ’bayin a kanyit si ’dani kanyit kadi, a pisek nagon gwoso kurök kwi-kwiyöni i pirit nanyit si ’daet.

¹⁶ A kokori kanyit lilike lilik kak yu, a kenia kanyit ki teteyone teteyon.

¹⁷ A ŋutu tine yeye lepeŋ köti kwöŋ, a gwe ti ’diŋdya karin kanyit na tiri se i kiko na.

¹⁸ A nye riköjine kaŋo i parara tojo i mudwe; nye a turöji kaŋo i kak.

¹⁹ A nye gwe ’bak ŋuro kode nyakwari i kiden na ŋutu kanyit, a lele ŋuto gwe ’bayin lo pituŋdyö i pirit nagon nye köju yeŋ si ’da kata nu.

²⁰ A ŋutu lo gwon i swöt lo tokötyaŋ kulu soŋi söŋu ko lor lonyit, a kujönö iŋge mok ŋutu ti swöt lo ’yure.

²¹ ’Diri kadijik si ’daesi ti ŋutu lorok ko ti ŋutu logon ti twöju Ŋun kilo mo ’duddyö sona.