Eyobo 17 - Bibilia Buk na Ŋun nagon koti luŋu a

¹ Nan rökti röktu, perok kwe ’bakani ’baka, dili nuket mömöŋdu nan.

² Kakwekweniak kata köyö nyona, a konyen kwe ’depakiŋdye i ’do’döyösi kase.

³ Ti do ko mugun inot lo gwo ’deköyö i kulya, kogwon ŋuto a ŋa logon bubulö tiŋdu mugun a togwoet liŋ?

⁴ Do aje muggö töilyet kase anyen gwon ti kuruŋdyö kulya, nyenagon a do tine ’bön lepeŋat i te ’ya.

⁵ Ŋuto gwoso lo lo jambu arabat i kulya ti julin kase i wuju na koret na ŋo kase lo, konyen ti ŋwajik kanyit mo mu-soni musö.

⁶ Karin kwe jamaki arabat i jurön liŋ, nan a ŋuto logon yaka kamulak i komor.

⁷ Konyen kwe a musö kogwon delyaesi, swötön kwe liŋ ti mugun lika kine likaki.

⁸ Ŋutu lo ’but a söŋu ko ŋina ŋo, a ŋutu logon ’bak kulya iŋge woran ko ŋutu lo renya Ŋun.

⁹ Ama ŋuto lo rigwo ’depakiŋdya i kiko lonyit, a nye logon ko könisi a loke lo worani a iŋgo parik.

¹⁰ Ama ta liŋ, po ta, möŋi ta köti! Nan mo ti ryö ŋuto lokoŋ kasu kiden kwöŋ.

¹¹ Perok kwe aje lwöpöddu, ŋo na yeye nan nagon töili liŋ ’de ’deggi kune aje körö.

¹² A se löpuŋge tukwaje a tuparan, a se kulyani adi parara gwe nyona parik lwölwöŋ mudwe.

¹³ Ko nan yeyeju adi pirit na mulökö a kadi nio, ko nan petakiŋdya dotoet nio i mudwe,

¹⁴ ko nan kulya ko dili nuket adi, Do a baba, ko nan kulya ko kurutöt adi, Do a yaŋgo ko a kiaser nio,

¹⁵ a kirut yenet nio na ru gwe ya, a ŋa mo lo ryeji lepeŋ?

¹⁶ Nye ŋona mo tutu kak tojo i rigilesi ti pirit na mulökö? Yi ŋona mo tutu kak i ŋutu i pirit na geleŋ le?