Eyobo 15 - Bibilia Buk na Ŋun nagon koti luŋu a

Elipaja a ririŋga Eyobo

¹ A kirut Elipaja lo po Teman nyöggi pija adi,

² Ŋuto lokoŋ ŋona bubulö ruggö kulyaesi logon a köbuŋöt kana, a toyimönöji mugun ko köbuŋöt lo ’yure le?

³ Lepeŋ ŋona bubulö rerenya ko kulyaesi kana, kode ko jamiat logon ’bak ’bulit le?

⁴ Iŋkoi, do a paju twöju inot na Ŋun, do a kö ’yu yeyeju kulya kanyit kanyit i komor,

⁵ kine kulya gwon sona kogwon ŋonyesi kunök na todiŋdyö do i jambu, a do wuluŋdye ŋedep kamumulukanit.

⁶ Kutuk inot na ’duŋökiŋdyö do putet loron, ti gwon a nan; a ŋedep ilot lo tokoŋ kulya kunök arabat.

⁷ Do ŋona a ŋuto togeleŋ logon aje yuŋwe le? Do a ta ’due a kokwe na gweya na merya le?

⁸ Do ŋona a yiŋ kulya lwönö na jama ko Ŋun i momoret? Do yeyeju adi do geleŋ logon a lokoŋ le?

⁹ Ŋo a nyo nagon do a den nagon yi köti a ko den? Ŋo a nyo nagon do a kurun nagon yi köti a ko kurun?

¹⁰ Ŋutu kata kayaŋ kiden logon aje kwekweja kupir logon ko kiŋajin jore lwölwoŋ ti munyi.

¹¹ Do Ŋona yeyeju adi kulyaesi ti Ŋun ku ’dik logon sukarikin do, kode kulyaet logon jamaki do madao?

¹² Nyo nagon toili ilot nyuŋ gwon a kaŋa, ko nyo nagon konyen kulök ruja kaŋo,

¹³ anyen do ŋisa ko Ŋun, anyen kilo kulyaesi ko rurutuŋdye kaŋo konut i kutuk na?

¹⁴ Ŋuto a nyo anyen nye gwon a loke, kode nye lo yuŋweki i na kak lo anyen kurwe a loke ’bak kulya?

¹⁵ Mete, ko Ŋun kodyo a ko yinikin ŋutu kanyit loke, a ki ködyö tine gwon a nake kanyit i komor,

¹⁶ bia parik ŋuto ’bayin a loke, logon a manatti ko a ŋo lo ’bu ’burön, logon möju toron gwoso pioŋ!

¹⁷ Yiŋge nan, nan de kwekwekin do; nan de nyönyökökin do ŋo na met nan kune,

¹⁸ se ko ŋo na yiŋun nan i keriat logon ŋutu lokoŋ aje todin, a merenyejin kase gwe a ko ’de se kune.

¹⁹ (Jur a tiki kilo merenyejin ka ’de, a Lwaka gwe a ko morakiŋdya ko lepeŋat kiden.)

²⁰ Kulya na met nan kune kweja adi, ŋuto loron totomie i perok kanyit liŋ. ŋuto logon töili lonyit a lurwö sasanya i kiŋajin liŋ lo ’delaki lepeŋ kulo.

²¹ Lepeŋ yiyio ’gworolo tokujönöesi, a katukaranit ’bunyökiŋdye lepeŋ i diŋit nagon taliŋ kata;

²² lepeŋ ’bak yenet nagon nye rwoddi mudwe lo twan, a yeyeji adi nye a wuloki i tatua;

²³ a nye mo gubajine kaŋo i nyei ko logulusen; a deŋdi adi lor lo mudwe gwe kanyit nyona;

²⁴ a delya ko tömiesi tokujöŋdi lepeŋ, a te ’yi lepeŋ gwoso mor logon aje teteŋdya ajo i gor.

²⁵ Kine kulya gwon sona kogwon lepeŋ aje ’bi ’yu könin lonyit ki i möro ko Ŋun Kabulönit lo ŋo liŋ, a lauŋdye lepeŋ,

²⁶ a burunyaddi ko lepeŋ yu ko ’buku nagwögiŋ nagon ko suŋgu ’diat.

²⁷ Ma ’di komor na ŋilo ŋuto loron gwe a napir parik, a mukök nanyit gwe ko welet a duma,

²⁸ nyena a nye mo si ’dani i köjinö nagon a murwoki, ko i kadijik nagon ŋutu ti bulö si ’da kata, nagon ’dek ’do ’do anyen wora a sudiet.

²⁹ A nye mo tine gwon a kwörinit, a tukwörien nanyit mo tine yeŋon, a nye mo tine ’bekoddu kokori kak;

³⁰ a nye mo tine rwöddu i mudwe; a ŋedep lo kamaŋ mo tokworoggi adi kuyum kenia kanyit na wilun, a köbuŋöt mo wuköddi köturön kanyit kaŋo.

³¹ Ti lepeŋ gwe ti mumulugga mugun i yeŋdu na ŋo kana, kogwon ropet nanyit mo gwon a ŋo kana.

³² A ŋina ropet nanyit mo ropakine lepeŋ ’bukuluŋ i ŋerot na diŋit nanyit, a kene nanyit mo tine gwon a nadon;

³³ a nye mo gwe gwoso ködini lo binyo logon ludweki kanyit yo-yoŋ a ’do ’done kak, a gwe gwoso ködini lo jeitun logon köturön kanyit a ’do ’do kak.

³⁴ Kogwon ŋutu liŋ logon ti twöju Ŋun kilo gwon gwoso ŋutu nagon a ’baŋin. a midijik kase nagon a tukworienyo ko ’dokesi na ropaki a Iwon kune mo noke nokan;

³⁵ kilo ŋutu pigga ’burönö, a yuŋuŋdye toron, a pelela kase na pikarikin kune gwe a mumulukesi.