Eyobo 14 - Bibilia Buk na Ŋun nagon koti luŋu a

Eyobo a yeyejutu adi Ŋutu ti si ’da i na kak diŋit a najo

¹ Ŋutu lo yuŋweki i na kak kilo si ’da ko perok ku ’dik, a gwe ko yöyöŋesi jore parik.

² A se gwe gwoso köturön nagon tuture a teteyone teteyon; a se liki gwoso tölimöt nagon ti yeŋon.

³ A do Ŋun kölumbö diŋe nan logon a ŋuto kana gwoso lo, a joŋgi nan i ri i ’duŋöki na kulya kaŋ ko do.

⁴ ŋa logon bubulö topukuŋdyö ŋo nake i ŋo narok? ŋuto ’bayin kwöŋ!

⁵ ŋuto gwoso lo perok kanyit aje temaki, a do iŋge den kenet na yapala kanyit, a do iŋge wulökin lepeŋ ’dutet nagon nye ti bulö lwöpöddu,

⁶ nyena ko sona ko diŋa lepeŋ, kölöki lepeŋ ka ’de, anyen lepeŋ tutuŋgö kita nanyit na lor nagon nye roropari na.

⁷ Ko ködini a tukuki kak, a ŋutu yeŋdi adi mo wiwilan köti, a tine jaran.

⁸ Ma ’di ködyö kokori kanyit na gwon kak i liŋo gwe a ti ’beron, a kumut nanyit teteyone teteyon i kujöŋ,

⁹ ama ko nye a moja pioŋ a nye wile wilan, a garani gara gwoso ködini lo wilan.

¹⁰ Ama ŋuto twatwan, a gwe ’bak ’bulit; a ŋuto duwuŋdye duwuŋdya a ’dutet, nyena lepeŋ liya?

¹¹ Pioŋ ti tor wewereyo, a kare ’bije ’bija a ’bakani ’baka,

¹² nyena köti ŋuto a topiriki kak, a tine ŋien kwoŋ; a nye mo tine purwe kode ŋien ki i doto, tojo ko kak a ’duddyö.

¹³ Ko ködyö do ŋun a ’delakin nan i pirit na mulökö, a do ködyö muŋge nan nyu tojo ko woran inot a yukörö, a do ködyö wulökiŋdye nan diŋit nyu, a kirut ködyö yiyiuŋdye nan!

¹⁴ (Ko ŋuto aje twan, nye ŋona ruru köti le?) Nan ködyö momon perok kwe liŋ ti kita tojo ko nan a kölwe.

¹⁵ A do ködyö luŋgi nan, a nan kodyö ruŋge do; a do ködyö yöŋöni meddya ŋo logon do aje gweja lo.

¹⁶ Ama soŋinana do keken lasesi wöriesi kwe liŋ a do meddi toronjin kwe.

¹⁷ Do a ’delakin lyaŋesi kwe liŋ konut i jurak; a do iŋge liŋyökin toronjin kwe i lukata.

¹⁸ Ama mere duduyömuŋdyo a kakaraddi kakaraddu, a ŋurupit lukujine kaŋo kanyit i pirit;

¹⁹ pioŋ lalaju ŋurupö, a kuduöt ’dokoddi kujöŋ ti kak, nyena gwoso na köti a do seyaddi yenet na ŋuto kaŋo.

²⁰ Do tete lepeŋ asut, a nye lwöŋöddi lwöpöddu; a komor nanyit worani ka ’de, a do riköddi lepeŋ kaŋo.

²¹ A ŋwajik kanyit bulani bula a nye gwe a ko den bula nase; a se iŋge nyökwe kak, ama a nye gwe a ko met nyökwe nase kak.

²² Nye tuŋ deŋdya mien nanyit na mugun, a nye delyani mugun nanyit ka ’de.