Eyobo 13 - Bibilia Buk na Ŋun nagon koti luŋu a

Eyobo a juŋdyö mugun adi nye a lo rigwo

¹ Kine ŋo liŋ nan aje met ko konyen kwe, nan a yiŋ ko swö kwe ko aje kurun se.

² Ŋo nagon ta deden nan koti a den, ta ti bulö lwöŋgu nan.

³ Ama nan ’de ’dekan jambu ko Ŋun Kabulönit lo ŋo liŋ, nan ’de ’dekan rerenya ko lepeŋ,

⁴ ama ta liŋ bubuddyö kulya ’diri ko ’burönö; ta liŋ gwon gwoso ’bunuk logon ’bak ’bulit.

⁵ Ko ta ködyö a yiŋa taliŋ, a yiŋa nasu taliŋ ködyö gwe a koŋon nasu!

⁶ Nyena, böŋö yiŋge ta rerenyesi kwe, tiki ta swö kasu i yiŋga na kulya kwe na jambi nan i ri na.

⁷ I diŋit na jambi ta kulya ’burönö na ta juŋdyö Ŋun le, a ta jambi mumulukesi kogwon kulya kanyit?

⁸ Ta gwo ’dan ko Ŋun i swöt i töggu na lepeŋ le, ta ’dek jambu kulya kanyit i ri?

⁹ Ŋona mo gwon a na ’but kasu ko nye a temba ta, kode ta ŋona bubulö mumulugga lepeŋ gwoso na mumuluŋge ta ŋutu na le?

¹⁰ Ko ta nyaŋu swöt geleŋ a lwön nye ’diri mo ririŋ ta.

¹¹ Todumalan nanyit ti rusuggö töilyet kasu le? Kujönö na lepeŋ ŋona ti mok ta?

¹² Kulyaesi kasu lokoŋ gwon gwoso kurök ti kamaŋ, a kulyaesi kasu logon ta gaji ’börik kilo mo munyetani gwoso liŋo.

¹³ Yiŋani ta taliŋ, kölöki ta nan i jambu, ko ŋo nagon ’dek pokin köyö loki ti poki!

¹⁴ Nan a tin mugun nio i koa, a nan pakiŋdye mugun.

¹⁵ Ma ’di ko lepeŋ ’dek tatuja nan a nan mo tine dyadyaŋgu, a nan mo yeŋe jambu kulya kwe kanyit i komor.

¹⁶ Kine kulya mo kwekiŋdya lwö-kit nio, kogwon ŋuto logon ti twöju Ŋun ti bulö po kanyit i komor.

¹⁷ Yiŋge ta kulyaesi kwe ’bura, ti swö kasu yiŋge kulya nagon nan nyönyökökin ta kine.

¹⁸ Mete ta, nan aje teteŋdya kulya nagon nan jajam i ri, nan deden adi nan mo kurwe adi nan ’bak kulya.

¹⁹ Ŋa logon de tete nan i rerenya? Ko ködyö nan a tela a nan yiŋ anita liŋ a twane twan.

²⁰ Ti do Ŋun ruköki nan ŋo murek ka ’de, a kirut nan mo tine ’de ’ya mugun konut i komor.

²¹ Böŋö ’dumara könin ilot lo pömöni pajo köyö, ko ti tokujöŋdu inot gwe ti mok nan.

²² Nyena luŋi nan, a nan de ruŋge ruggö; kode ti nan jambi, a do de nyobbi nan.

²³ Kulya lyaŋesi se ko toronjin kwe muda? Kweki nan lyaŋesi kwe se ko toronjin kwe.

²⁴ Ko nyo nagon do ’de ’de komor inot, a do kiŋdye nan a miriku ilot?

²⁵ Do ’dek tokujöŋdu nan? Nan tuŋ a koropoti na ’doko ko köbuŋöt. Do ’diri ’dek riköddu pudi nateyok le?

²⁶ Kogwon do a wurökiŋdyö nan riŋesi na pötwör, do tiŋdi nan i ’debba na lyaŋesi kwe ti toteton,

²⁷ a do kwakakiŋdye mokosi kwe i kaden kata, a do titimbe kikolin kwe liŋ, a do tembi ’dapari kwe.

²⁸ Ru nio gwon adi dolok gwoso ŋo lo ’burön, gwoso boŋgo nagon logwokyo a nyö.