Eyobo 12 - Bibilia Buk na Ŋun nagon koti luŋu a

Eyobo a tuggö adi Ŋun gwon ko riŋit ko a lokoŋ

¹ A kirut Eyobo waddi adi,

² ’Diri gwak ta a ŋutu, a koŋon mo kakaŋi kakaŋu se ko ta i pirit na geleŋ!

³ Ama nan köti kukurun kulya gwoso ta; ta ti bulö lwöŋgu nan. Ko ŋa logon ti den ŋo gwoso kine?

⁴ Julin kwe kwekweni ko nan gwoso ŋo lo kwekweniarikin; nan a ŋo lo kwekweniarikin, nan logon a momo ’yu Ŋun a nye ruŋge nan, nan logon a ŋuto logon ’bak kulya ko a loke.

⁵ ŋutu logon ’bak yöyöŋesi, logon kulya kase tutu ’bura, kwekweni ko ŋuto lo sasanya, logon mokosi kanyit a jeleta, a sasanyesi gubakiŋdye lepeŋ kak.

⁶ Midijik ti karyakak gwon ko taliŋ, a ŋutu logon towoŋa Ŋun si ’dani ’bura, logon yeŋdu riŋit nanyit gwoso Ŋun lonyit.

⁷ Nyena pipije ta kijakwa, se de totodinikin ta; pipije ta kwen ti ki, se de tatakin ta;

⁸ kode pipije ta ŋo lo gwögwöŋtu kak, se mo totodinikin ta; pipije ta somot ti tör, se mo totoku-rukin ta.

⁹ ŋa logon ti bulö denuŋdya i kiden na kine ŋo lio adi MATAT aje gweja se ko könisi kanyit?

¹⁰ Ru na ŋo liŋ lo gwon jörun se ko yukan na ŋutu liŋ gwon kanyit i könin.

¹¹ (Ti gwon sona adi swö kökör kulyaesi logon a jama gwoso ŋedep ’de ’deŋdi kinyo na le?

¹² ŋutu muduŋin a lokoŋ, ŋutu logon a si ’da kiŋajin jore kukuruŋdyö kulya.)

¹³ Koŋon se ko riŋit a ti Ŋun; lepeŋ gwon a jujuwet na ’but se ko kuruŋdyö na kulya.

¹⁴ Ko lepeŋ a dukakiŋdya nene ŋo kak, a lele ŋuto gwe ’bayin logon bubulö nyöggu ’duggö; ko lepeŋ a reregga ŋutu, a lele ŋuto gwe ’bayin lo yupuŋdyö se kaŋo.

¹⁵ Ko lepeŋ a teŋgu piŋo, a kak gwe a nateyon; a ko lepeŋ a kölöddu se kaŋo, a se wulöggi kak.

¹⁶ Riŋit se ko koŋon a kanyit, ma ’di ŋuto logon a giran se ko ŋuto katogiranit a kanyit.

¹⁷ Lepeŋ rurusun boŋgwat ti kaju-juwak kaŋo, a nye tiŋdi ka ’duŋök ti putesi i wora a mamala;

¹⁸ a nye ’dumaddi kido saret na moran, a rereggi lepeŋat;

¹⁹ a lepeŋ rusuŋdye boŋgwat ti koanejin kaŋo, a nye rusuŋge ŋutu ti riŋitön kak;

²⁰ a nye ’dumaddi jamesi ti ŋutu lo yiyiniki kaŋo, a nye joŋgi koŋon na ŋutu muduŋin kaŋo nagon a liliet na kulya;

²¹ a nye ’do ’döji kasarak, a laggi riŋit na ŋutu temejik.

²² A nye ŋauŋdye kulya nagululök ti mudwe, a tiŋdi parara i pararaju i mudwe logon adi ’dii.

²³ A nye toduma ’yi jurön a tukaŋi se, a nye tugalaŋgi jurön a toreaddi ŋutu kase kaŋo.

²⁴ A nye joŋgi koŋon na kasarak ti jurön kaŋo, a tiŋdi se i wörö a wuya i yöbu na gwon kana, nagon ’bak kikolin;

²⁵ a se wawaji i mudwe ’bak parara, a nye tiŋdi lepeŋat i luluŋtö gwoso kamere.